उत्तर कोरियाका सर्वोच्च नेता किम जोङ उनले चिनियाँ राष्ट्रपति सी चिनफिङसँग भेटवार्ता गरेका छन्।
दोस्रो विश्वयुद्ध अन्त्य भएको ८० वर्ष पुगेको अवसरमा बेइजिङमा आयोजित सैन्य परेडमा सहभागी भएपछि किमले बिहीबार बेलुकी राष्ट्रपति सीसँग भेटवार्ता गरेका हुन्।
बेइजिङको ग्रेट हल अफ द पिपुलमा भएको वार्तामा चिनियाँ राष्ट्रपतिसीले आफ्नो देशले उत्तर कोरियासँगको परम्परागत मित्रतालाई निकै महत्व दिएको र बेइजिङ द्विपक्षीय सम्बन्ध सुदृढ गर्न इच्छुक रहेको बताएका थिए।
किमले उत्तर कोरिया सधैँ चीनको सार्वभौमसत्ता र भौगोलिक अखण्डताको पक्षमा उभिने बताएका छन्।
'अन्तर्राष्ट्रिय परिस्थिति जतिसुकै परिवर्तन भए पनि, प्योङयाङ र बेइजिङबीचको मित्रताको भावना परिवर्तन हुन सक्दैन,' उनको भनाइ उद्धृत गर्दै उत्तर कोरियाको सरकारी मिडिया कोरियन सेन्ट्रल न्युज एजेन्सी (केसिएनए)ले लेखेको छ।
दुवै नेताले अन्तर्राष्ट्रिय र क्षेत्रीय मुद्दाहरूमा साझा हित संरक्षण गर्न रणनीतिक सहकार्यलाई बलियो बनाउने, उच्चस्तरीय भेटघाटहरू बढाउने र रणनीतिक संवादलाई निरन्तरता दिने विषयमा छलफल गरे।
केसीएनएका अनुसार, किम बिहीबार बेइजिङबाट उत्तर कोरिया फर्किएका छन्।
उनको बिदाइमा चिनियाँ कम्युनिस्ट पार्टीका वरिष्ठ नेता काई छी र विदेशमन्त्री वाङ यी सहभागी थिए।
किमको यो भ्रमणले दुई देशबीचको राजनीतिक विश्वास र रणनीतिक सहकार्यलाई थप मजबुत बनाएको भनेर केसिएनले लेखेको छ।
किमको यो भ्रमण उनको सन् २०२३ मा रुसी राष्ट्रपति भ्लादिमिर पुटिनसँगको भेटपछि पहिलो विदेश भ्रमण हो।
किमले बेइजिङमै रूसी राष्ट्रपति भ्लादिमिर पुटिनसँग पनि भेटवार्ता गरेका थिए।
पुटिनले उत्तर कोरियाली सेनाले युुक्रेनविरूद्ध बहादुरीपूर्वक लडेर कुर्स्क क्षेत्र जोगाएको भन्दै किमलाई धन्यवाद दिएका थिए।
जबाफमा किमले त्यसलाई एउटा भाइले अर्कोलाई गर्ने सहयोगका रूपमा हेर्नुपर्ने भनेका थिए। आगामी दिनहरूमा पनि उत्तर कोरियाले गर्न सक्ने सहयोग जारी रहने उनले बताएका थिए।
बेइजिङ परेडमा पुटिन, सी र किम कुम जोडेर हिँडेको दृश्य संसारका लागि चासो बनेको छ।
अमेरिकी राष्ट्रपति डोनाल्ड ट्रम्पले चीनमा पुटिन र किमले अमेरिकाविरूद्ध षड्यन्त्र रचेको आरोप लगाएका थिए।
त्यसमा क्रेमलिन र बेइजिङले जबाफ दिइसकेको छ।
-1746009348.jpg)
