प्रधानमन्त्री केपी शर्मा ओलीले चिनियाँ राष्ट्रपति सी चिनफिङसँगको भेटमा लिपुलेकको विषय स्पष्टसँग राखेको बताएका छन्।
शुक्रबारदेखि सुरू भएको विधान महाधिवेशनलाई उद्घाटन गर्दै उनले लिपुलेकलाई व्यापारिक मार्ग बनाउन भारत र चीनले सहमति गरेको विषयमा नेपालको असमझदारी रहेको स्पष्टसँग राखिएको बताएका हुन्।
'चीनका राष्ट्रपति सी चिनफिङसँगको द्धिपक्षीय औपचारिक वार्तामा मैले अरु कुराहरुसँगै लिपुलेक सम्बन्धमा भारत र चीनका बीचमा भएको सम्झौता हाम्रो भूमिमाथि, हाम्रो भूमिबाट व्यापार आदानप्रदान गर्ने भन्ने सम्झौता दुई वटा देशले गर्न मिल्दैन । त्यसकारण यसमा हाम्रो असहमती रहेको छ भन्ने कुरा मैले स्पष्ट ढंगले राखेको छु,' उनले भने, ' यो कुरा रेकर्डेड छ। यो अडियोमा छ, यो भिडियोमा छ। यो नोटहरुमा छ।'
उनले जबाफमा चिनियाँ राष्ट्रपति सीले नेपालको सार्वभौमसत्ताको सम्मान गर्ने भनेको प्रधानमन्त्री ओलीले बताए।
'कुनै तपाईहरुको राष्ट्रको सार्वभौमसत्तामा तलमाथि पर्ने छैन । तलमाथि पर्न दिइनेछैन । त्यसमा हामी सम्पूर्ण रुपमा समर्थन गछौं । यो सिमानाको विषय नेपाल र भारतको विषय हो । तपाईहरुले वार्ताद्धार कूटनीतिक माध्यामबाट समाधान गर्नु हुन्छ भन्ने हामीले विश्वास गरेका छौं । र, त्यसो गर्नुपर्छ भन्ने हाम्रो धारणा पनि हो । यस विषयमा तपाईहरुको देशको सार्वभौमसत्ता, भौगोलिक अखण्डतप्रतिको हाम्रो विश्वास, समर्थन दृढ छ भनेर उहाँले स्पष्ट गर्नु भएको छ,' उनले भने।
भारतसँग पनि यसबारेमा कुरा गर्ने प्रधानमन्त्री ओलीले बताए।
'यस सन्दर्भमा हामी भारतसँग पनि कुरा गर्नेछौ । हामीले यो समस्याको समाधान गर्नुपर्ने त भारतसँग नै हो,’ उनले भने। -न्युज एजेन्सी नेपाल।
-1746009348.jpg)
