रूसी राष्ट्रपति भ्लादिमिर पुटिनले युक्रेनमा सुरक्षाको ग्यारेन्टी दिने उद्देश्यले तैनाथ गरिने पश्चिमा देशका सेनामाथि आक्रमण गर्ने चेतावनी दिएका छन्।
उनले यो भनाइ युरोपेली नेताहरूले युक्रेनलाई युद्धपछिको सुरक्षा ग्यारेन्टी दिने घोषणा गरेको भोलिपल्ट सार्वजनिक गरेका हुन्।
फ्रान्सेली राष्ट्रपति इमानुएल म्याक्रोनले २६ देशले युक्रेनलाई युद्धपछिको सुरक्षाको ग्यारेन्टी दिने वाचा गरेको भनेर बिहीबार बताएका थिए। त्यसका लागि स्थल, समुद्र र हवाई फौज पनि समावेश हुने उनले जानकारी दिएका थिए।
यदि युक्रेनमा सुरक्षा प्रत्याभूति दिन पश्चिमी देशका सेना पठाइए, ती सेना रूसको वैधानिक निशाना बन्नेछन् भनेर पुटिनले चेतावनी दिएका हुन्।
नेटोले युक्रेनलाई सदस्य बनाएर त्यहाँ आफ्ना सेना राख्न नपाओस् भनेर युक्रेनमाथि आक्रमण गरेको पुटिनले बताउँदै आएका छन्।
'त्यसैले, विशेष गरी अहिले सैन्य कारबाहीको समयमा, यदि केही सेना त्यहाँ देखा परे, हामी यो मान्नेछौँ कि तिनीहरू नष्ट गर्नका लागि वैधानिक निशाना हुनेछन्,' पुटिनले रूसमा भएको एक कार्यक्रममा भने, 'र, यदि दीर्घकालीन शान्तिमा पुग्ने निर्णयहरू भए, तब युक्रेनको भूमिमा उनीहरूको उपस्थितिको म कुनै अर्थ देख्दिनँ।'
पुटिनको यो टिप्पणीले रूस र युक्रेनको युद्ध अन्त्य गर्ने कुनै पनि सम्झौता अहिले नै हुने सम्भावना कम भएको देखिएको छ।
शान्ति सम्झौताका लागि रूसले फेरि युक्रेनमा आक्रमण नगरोस् भनेर प्रत्याभूतिको माग युक्रेनले मुख्य रूपमा उठाइरहेको छ।
अमेरिकी राष्ट्रपति डोनाल्ड ट्रम्प समेत त्यसका लागि पछिल्लो समय तयार देखिन्छन्। ट्रम्पले युरोपेली नेताहरूलाई युक्रेनलाई अमेरिकी सुरक्षा प्रत्याभूति दिन आफू तयार रहेको बताएको भनेर युरोपेली अधिकारीहरूको हवाला दिँदै द वाल स्ट्रिट जर्नलले केही समय अघि लेखेको थियो।
रूसी राष्ट्रपति भ्लादिमिर पुटिनसँग अमेरिकाको अलास्कामा गत महिना भएको छलफलबारे युक्रेनी राष्ट्रपति भोलोदिमिर जेलेन्स्की र युरोपेली नेतारूलाई अवगत गराउने क्रममा उनले सो कुरा खुलाएका थिए।
युद्ध अन्त्यका लागि आफ्नो कब्जामा रहेको क्राइमिया र डोनबास क्षेत्र लगायत युक्रेनी भूभाग रूसी भूमि भएको मान्यता दिनुपर्ने माग पुटिनले ट्रम्पसँग राखेका थिए।
अहिलेसम्म रूसले कब्जा गरेको युक्रेनी भूभाग मात्र नभएर आफ्नो नियन्त्रणमा नभएका डोनबास क्षेत्रको केही भागको पनि स्वामित्व दिनुपर्ने पुटिनले माग गरेका छन्।
जेलेन्सकीले त्यस्तो माग अमान्य हुने बताइसकेका छन्। तर अमेरिकी सुरक्षा प्रत्याभूति भने युक्रेनका लागि महत्त्वपूर्ण छ।
युक्रेनमा फेरि रूसले आक्रमण नगरोस् भनेर आफ्ना ३० हजार सैनिक राख्न बेलायत र फ्रान्स पहिलेदेखि नै तयार छन्।
शान्ति सम्झौतालाई दिगो बनाउनका लागि युक्रेनमा पश्चिमी सेनाको उपस्थिति आवश्यक हुने कुरा पुटिनले आफूसँगको छलफलमा स्वीकारेको ट्रम्पले जेलेन्स्की र युरोपेली नेताहरूलाई बताएका थिए। अमेरिकाले त्यस्तो सुरक्षा प्रत्याभूति दिने कुरामा त्यसअघि ट्रम्प तयार थिएनन्।
बेलायत, फ्रान्स लगायत युरोपेली देशका सेना युक्रेनमा राखेर दिने प्रत्याभूतिमा अमेरिकाको पनि सहभागिता हुनुपर्ने जेलेन्सकीले माग गर्दै आएका छन्। ट्रम्प भने त्यसका लागि तयार थिएनन्। तर अलस्कामा पुटिनसँग कुरा गरेपछि युरोपेली देशका सेनालाई अमेरिकाले प्राविधिक र बन्दोबस्तीमा सहयोग गर्न ट्रम्प तयार भएका थिए।
त्यसै अनुसार युरोपेली देशहरूले युक्रेनलाई सुरक्षा प्रत्याभूति दिनेबारे बिहीबार छलफल गरेका थिए। त्यसको भोलिपल्ट पुटिनले युक्रेनमा तैनाथ हुने पश्चिमा देशका सेनामाथि आक्रमण गर्ने चेतावनी दिएका हुन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
