नेकपा (एमाले)को विधान महाधिवेशन आज पनि जारी रहनेछ।
शुक्रबारदेखि ललितपुरको गोदावरीस्थित सनराइज हलमा सुरू भएको विधान महाधिवेशनको दोस्रो दिन विभिन्न प्रतिवेदनमा छलफल हुने कार्यसूची छ।
विधान महाधिवेशनको पहिलो दिन शुक्रबार प्रधानमन्त्रीसमेत रहेका अध्यक्ष केपी शर्मा ओलीले राजनीतिक प्रतिवेदन प्रस्तुत गरेका थिए।
त्यस्तै महासचिव शंकर पोखरेलले सांगठानिक प्रतिवेदन र उपाध्यक्ष विष्णु पौडेलले विधान संशोधन प्रस्ताव पेस गरेका थिए। केन्द्रीय सल्लाहकार परिषद्का अध्यक्ष अमृतकुमार बोहोराले प्रतिवेदन प्रस्तुत गरेका थिए।
त्यस्तै स्थायी कमिटी सदस्य कर्णबहादुर थापाले फरक मत प्रस्तुत गरेका थिए।
एमाले प्रचार विभाग प्रमुख राजेन्द्र गौतमका अनुसार शनिबार बिहान ८ बजेदेखि सुरू हुने विधान महाधिवेशनमा निर्वाचन आयोग, लेखा आयोग र अनुशासन आयोगका प्रतिवेदन प्रस्तुत गरिनेछ।
शुक्रबार समयअभावका कारण ती प्रतिवेदन प्रस्तुत हुन पाएको थिएन।
प्रतिवेदनको प्रस्तुतीकरण सकिएपछि बिहान १० बजेदेखि सबै प्रतिवेदनमाथि समूहगत छलफल हुने उनले बताए।
केन्द्रीय अनुशासन आयोगका तर्फबाट अध्यक्ष केशव वडाल, केन्द्रीय लेखा आयोगका तर्फबाट अध्यक्ष डा पुष्प कँडेल र केन्द्रीय निर्वाचन आयोगका तर्फबाट अध्यक्ष डा विजय सुब्बाले प्रतिवेदन प्रस्तुत गर्नेछन्।
शनिबार प्रतिनिधिहरूलाई १० वटा समूहमा विभक्त गरेर दस्तावेजमाथि छलफल गराइनेछ। आइतबार १० वटा समूहका नेताहरूले राजनीतिक प्रतिवेदनमाथि समूहगत सुझाव प्रस्तुत गर्नेछन्।
नेतृत्वले त्यसमाथि जवाफ दिएपछि पार्टी केन्द्रीय निर्वाचन आयोगको निर्वाचन प्रक्रिया सुरू हुनेछ।
विधान महाधिवेशनले केन्द्रीय निर्वाचन आयोग निर्वाचित गर्ने एमालेमा परम्परा छ। आगामी महाधिवेशनको नेतृत्व चयन त्यसैले गर्नेछ।
निर्वाचन आयोगका पदाधिकारी र सदस्य निर्वाचित गरेपछि समसामयिक प्रस्तावसहित विधान महाधिवेशन सकिनेछ।
यो विधान महाधिवेशनमा कुल २३४१ सहभागी छन्। जसमध्ये २०२६ जना प्रतिनिधि हुन् भने ३१५ जना आयोजकको हैसियतमा सहभागी हुनेछन्।
-1757056588.jpg)
-1746009348.jpg)
