जेन–जी युवाहरूको एउटा समूहले अन्तरिम सरकार प्रमुखका रूपमा पूर्वप्रधानन्यायाधीश सुशीला कार्कीको नाम प्रस्ताव गरे पनि यसमा सबै युवा समूह एकमत हुन सकेका छैनन्।
सैनिक मुख्यालय बाहिर बुधबार साँझ भेला भएका विभिन्न समूहका युवाले विभिन्न नाम लिँदै गरेको नाराबाजीका आधारमा उनीहरू कुनै एउटा नाममा सहमत हुन नसकेका देखिन्छन्।
जेन–जीको एउटा समूहले सामाजिक सञ्जाल 'डिस्कर्ड' मा करिब पाँच घन्टा छलफल गरेर कार्कीको नाममा सहमति जुटाएका थिए।
त्यही सहमतिका आधारमा कार्कीको नाम लिएर जेन–जी युवाहरूको एक टोली सेनासँग वार्तामा गइसकेको उनीहरूले कार्यक्रममै बताएका थिए।
सैनिक मुख्यालय बाहिरको अवस्था भने फरक थियो।
त्यहाँ जेन–जीकै प्रतिनिधि भन्दै विभिन्न समूह विभिन्न नाम लिएर उपस्थित भएका थिए।
तीमध्ये कतिपयले काठमाडौं महानगरपालिकाका मेयर बालेन शाहको नाम लिँदै थिए भने कतिपयले धरानका मेयर हर्क साम्पाङको नाम लिँदै थिए।
बालेन र हर्कका ती समर्थकले सुशीला कार्कीको नाम आफूहरूलाई मान्य नहुने बताइरहेका थिए।
छुट्टाछुट्टै समूहमा भेला भएका युवाहरू आफू–आफूमै कुराकानी गरिरहेका देखिन्थे। कोही भने पत्रकारहरूलाई फलानो व्यक्तिबाहेक अरू नाम स्वीकार नगर्ने बताउँदै थिए। अबेर हुँदै गएपछि केही सैनिकले माइकिङ गरेर 'आपसमा छलफल गरी भोलि आउनू' भन्दै थिए।
यसैबीच बदलिँदो राजनीतिक परिस्थितिमा प्रधानसेनापतिसँग कुराकानी गर्न धरानका मेयर हर्क साम्पाङ काठमाडौं आइपुगेका छन्। बुधबार साँझ काठमाडौं आउनेबित्तिकै सैनिक मुख्यालय गएर प्रधानसेनापति अशोकराज सिग्देलसँग छलफल भएको उनले बताएका छन्।
सैनिक मुख्यालयबाहिर पत्रकारहरूसँग कुराकानी गर्दै उनले भने, 'दसौं हजार युवाहरूले तपाईं काठमाडौं आउनैपर्छ भनेर बोलाएपछि म यहाँ आएको हुँ।'
प्रधानसेनापतिसँग अब बन्ने अन्तरिम सरकारबारे कुराकानी भएको उनले जानकारी दिए।
उनले पनि अन्तरिम सरकार प्रमुखका रूपमा पूर्व प्रधानन्यायाधीश सुशीला कार्कीको नाम आएको उल्लेख गरे। त्यसपछि पत्रकारहरूले सुशीला कार्कीको नाममा 'तपाईंको सहमति छ?' भनेर सोधेका थिए।
जबाफमा साम्पाङले भने, 'सहमति वा असहमति जनाउने म को हुँ र? यसमा युवा पुस्ताले नै निर्णय लिने हो।'
उनले आफ्नोबारे वा प्रधानसेनापति सिग्देलसँग भएको कुराकानीबारे थप केही बताएनन्। उनले 'कुराकानी अझै जारी छ' मात्र भने।
राष्ट्रपति रामचन्द्र पौडेल र प्रधानसेनापति अशोकराज सिग्देलले मंगलबार साँझ नै वार्ताका लागि आह्वान गरेका थिए।
वार्ता आह्वानपछि जेन–जीहरूको छुट्टाछुट्टै समूह छलफल निम्ति सैनिक मुख्यालय पुगेको पाइएको छ। सुशीला कार्कीको नाममा सहमति हुनुअघि नै अर्को समूह सैनिक मुख्यालयमा छलफल गरेर बाहिरिएको कुरा पनि लाइभ छलफलमै उठेको थियो।
त्यसैमध्ये सैनिक मुख्यालयमा छलफल गर्न पुगेको समूहका प्रतिनिधि रक्षा बमले 'प्रधानसेनापति सिग्देलले दुर्गा प्रसाईं र राष्ट्रिय स्वतन्त्र पार्टीका प्रतिनिधिसँग छलफल गरेर आउनू भनेपछि आफूहरू बाहिरिएको' बताएकी छन्।
‘राष्ट्रपतिसँग भेट्न बोलाएर दुर्गा प्रसाईं र रास्वपा समूहसँग वार्तामा बस्नुस्, उहाँहरू पनि स्टेकहोल्डर हो भनेर स्वयं प्रधानसेनापतिले भनिसकेपछि जेन–जी आन्दोलन क्रममा भएको बलिदान र युगान्तकारी परिवर्तनको यात्रा तुहिने भएकाले हामी प्रस्ताव अस्वीकार गर्दै नेपाली सेनाको मुख्यालयबाट बाहिरिएर प्रदर्शनकारी जेन–जी समूहसँग छलफलका निम्ति तयारी गरिरहेका छौं,’ उनले भनिन्।
रक्षा बमको यो प्रतिक्रिया जेन–जीहरूको लाइभ छलफलमा पनि उठेको थियो। उनीहरूले दुर्गा प्रसाईं र रास्वपासँग वार्ता गर्ने कुरा अस्वीकार गरेका छन्।
छलफलमा सहभागी जेन–जी युवाहरूले लोकतन्त्र रक्षा गर्नुपर्नेमा जोड दिए। संवेदनशील समयको फाइदा उठाउँदै देशको नेतृत्व कुनै चरमपन्थी समूहको हातमा जानबाट रोक्नुपर्ने उनीहरूले बताए।
त्यस्तै, प्रधानसेनापतिसँग छलफलको निम्ति जंगी अड्डा पुगेका निमेश श्रेष्ठ र रेहानराज दंगालले सामाजिक सञ्जाल इन्स्टाग्राम मार्फत नेता को बन्ने भन्ने छलफल गर्न 'हामी नेपाली' का संस्थापक सुदन गुरूङलाई पठाएको बताएका थिए।
‘हामीले आधिकारिक रूपमा 'हामी नेपाल' भन्ने संस्थाका सुदन दाइलाई कुरा गर्न पठाएका छौं,' दंगालले भनेका छन्, 'हामीलाई एउटा राम्रो लिडर चाहिएको छ। त्यो लिडर कसलाई बनाउने भनेर छलफल हुँदैछ।'
सबै तस्बिर: नेपाल फोटो लाइब्रेरी
-1746009348.jpg)
