काठमाडौं महानगरका मेयर बालेन शाहले धरान उपमहानगरका मेयर हर्क साम्पाङले जति गाली गरे पनि साथ नछोड्ने बताएका छन्।
मंगलबार सामाजिक सञ्जाल फेसबुकमा स्ट्याटस लेख्दै आफूलाई जतिसुकै गाली गरेता पनि आफूले माया गर्न नछाड्ने बालेनले बताएका हुन्।
'डियर हर्क साम्पाङ, तिमीले मलाई जति गाली गरे पनि म तिमीलाई माया गर्न छोड्दिनँ। एक तर्फी नै सही, तर मेरो माया साँचो हो। यू आर माई ट्रु लभ,' उनले लेखेका छन्।
केही दिनयता मेयर साम्पाङले मेयर बालेनलाई लक्ष्य गर्दै सामाजिक सञ्जालमा टिप्पणी गर्दै आएका थिए।
मेयर साम्पाङले लुकेर खेल्नेलाई लिडर नभनिने बताएका थिए।
'लुकेर बस्ने र लुकेर खेल्नेलाई गेमर भनिन्छ, लिडर भनिँदैन,' उनले लेखेका थिए।
यस्तै महानगरका कानुनी सल्लाहकार ओम प्रकाश अर्याल गृह तथा कानुन मन्त्री बनेपछि उनले प्रश्न उठाएका थिए।
'हिजो सिंहदरबारमा आगो लगाइदिन्छु, जलाइदिन्छु भनेर साँच्चै जलाइदिने र अहिलेको गृहमन्त्री बीचमा कुनै सम्बन्ध छ कि कुनै संयोग मात्रै हो,' उनले भनेका थिए।
भदौ २३ गते जेनजीको नाममा भएको आन्दोलनमा घुसपैठ भएपछि थुप्रै युवाहरू मारिएको थिए। त्यसपछि भदौ २४ गते पनि आन्दोलनले विध्वंस रूप लिएको थियो। जसमा आन्दोलनकारीहरूले सिंहदरबार, संसद भवन, सर्वोच्च अदालत लगायत थुप्रै सरकारी कार्यालयहरू तोडफोड गर्नुका साथै कार्यालय जलाइदिएका थिए।
अन्तरिम सरकार बनाउने डिस्कर्डमा छलफलहरू भएका थिए। त्यतिबेला कसलाई प्रधानमन्त्री बनाउने भनेर भोट भएको थियो। त्यसमा बालेनले धरै मत पाएका थिए भने त्यसपछि सुशीला कार्कीले मत पाएकी थिइन्। त्यसैगरी त्यहाँ हर्क साम्पाङको नाममा पनि भोट आएको थियो।
त्यो देखेपछि उनी धरानबाट प्रधानमन्त्री भन्ने आशासहित काठमाडौं आएका थिए। त्यसका लागि उनी सेनासँग कुरा गर्न हेडक्वार्टर समेत गएका थिए। तर उनलाई कसैले कुरा गरेनन्। अन्तिममा सुशीला कार्की प्रधानमन्त्रीमा नियुक्त भइन्।
त्यसलगत्तै साम्पाङले आफूलाई जिम्मा लगाएको अभिमत अरूलाई दिइपठाउने, असहज परिस्थितिको सामना गर्न नसक्ने भन्दै बालेनको आलोचना गरेका थिए। यस्तै, अरूले काँधमा बोकिदिओस् भन्ने किसिमको मान्छेलाई नेतृत्व मानिरहेकै कारण देशले निकास र विकास नपाएको उनको भनाइ थियो।
जब कार्कीले मन्त्रिपरिषद् विस्तार गर्ने कुरा भयो। तब आफूलाई गृहमन्त्री बनाउनुपर्ने माग गर्दै उनी बालुवाटर धाए। तर पनि उनको माग सम्बोधन भएन। त्यसपछि उनी धरान फर्किएका थिए।
आन्दोलनमा परेर ७२ जनाको मृत्यु भइसकेको छ। आन्दोलनमा परी मृत्यु भएकालाई सरकारले शहिद घोषणा गरेको छ भने उनीहरूलाई राहत स्वरूप १५ लाख रुपैयाँ दिने निर्णय भइसकेको छ।
-1746009348.jpg)
