अख्तियार दुरूपयोग अनुसन्धान आयोगले छानबिन गरिरहेको जानकारी पाएपछि स्वास्थ्य मन्त्रीमा सिफारिस गरिएकी डा. संगीता कौशल मिश्राको नियुक्ति रोकिएको छ।
यसरी नियुक्ति हुनै लागेका बेला अख्तियारको सूचनाका आधारमा प्रक्रिया रोकिएको यो पहिलोपटक होइन।
यसअघि पनि सरकारले अख्तियारको छानबिनमा रहेका केही व्यक्तिलाई नियुक्तिको अन्तिम समयमा रोकेको थियो। यसको एउटा उदाहरण पूर्व अर्थसचिव शिशिरकुमार ढुंगाना हुन्, जसको नियुक्ति अहिलेजस्तै अख्तियारको छानबिनकै कारण रोकिएको थियो।
यो २०८० साउनको कुरा हो।
संवैधानिक परिषदले महालेखापरीक्षकका लागि आवेदन खुला गरेको थियो। पूर्व अर्थसचिव ढुंगानासहित २० जनाले आवेदन दिएका थिए।
२०८० चैत १६ गतेसम्म आइपुग्दा ढुंगानालाई नियुक्त गर्ने विषयमा करिब सहमति भएको थियो। तर अख्तियारले छानबिन चलिरहेको र मुद्दा लैजाने तयारीमा रहेको पत्र पठाएपछि उनको नियुक्ति रोकियो।
अख्तियारको पत्रपछि संवैधानिक परिषदले २०८० चैत १८ गते महालेखापरीक्षकमा तोयाम रायको नाम सिफारिस गरेको थियो।
ढुंगानाविरूद्ध अख्तियारले वाइडबडी विमान खरिदमा अनियमितता भएको आरोपमा छानबिन गरेको थियो। २०८० चैत २२ गते नै ढुंगानासहित ३२ जनाविरूद्ध अख्तियारले विशेष अदालतमा मुद्दा दायर गरेको थियो।
विशेष अदालतले पूर्व अर्थसचिव ढुंगानालाई दोषी ठहर गर्दै डेढ वर्षको कैद सजाय सुनाएको थियो। उनीसँग १२ करोड रूपैयाँभन्दा बढी बिगो र जरिवाना तिराउने फैसला पनि भएको थियो।
उक्त मुद्दामा नेपाल वायुसेवा निगमका तत्कालीन अध्यक्ष शंकर अधिकारी, महाप्रबन्धक सुगतरत्न कंसाकार र पर्यटन सहसचिव बुद्धिसागर लामिछाने पनि दोषी ठहर भएका थिए। जहाज आपूर्तिकर्तामध्ये सात जना दोषी ठहर भएका थिए। तत्कालीन पर्यटनमन्त्री जीवनबहादुर शाहीलाई भने सफाइ दिइएको थियो।
यसपालि फेरि त्यस्तै घटना दोहोरियो।
प्रधानमन्त्री सुशीला कार्कीले आइतबार स्वास्थ्य तथा जनसंख्यामन्त्रीमा डा. संगीता कौशल मिश्राको नाम सिफारिस गरेकी थिइन्। उनको नाम राष्ट्रपति कार्यालयमा पठाइएको पनि थियो।
मिश्रा मन्त्री बन्ने भनेर पत्रपत्रिकामा समाचार आउन थालेपछि अख्तियारले उनीविरूद्धको अनुसन्धान सकिन लागेको र केही समयमै मुद्दा दर्ता गर्ने तयारी रहेको जानकारी प्रधानमन्त्री कार्यालयलाई गरायो। त्यसपछि नै सरकारले उनको नियुक्ति रोकेको हो।
-1746009348.jpg)
