नेपाली कांग्रेसका नेता गोपालमान श्रेष्ठले आइतबार ललितपुरको झम्सिखेलमा पत्रकार सम्मेलन गरे।
जेनजी पुस्ताको भदौ २३ र २४ को आन्दोलन तथा पार्टीभित्र उठिरहेको नियमित १५ औं महाधिवेशन वा विशेष महाधिवेशन जस्ता विषयमा केन्द्रित रहेर श्रेष्ठले धारणा दिए।
जेनजी आन्दोलनपछि मुलुक त्रास र आतंकमा रहेको उल्लेख गर्दै उनले फागुन २१ को चुनावका लागि सुरक्षालगायत वातावरण बनाउनुपर्नेमा जोड दिए।
राष्ट्रमा अहिले देखा परेको अवस्थाको समाधान राजनीतिक दलहरूभित्रैबाट खोजिनुपर्ने उनको भनाइ थियो।
‘निषेधको राजनीति त्यागेर सहकार्य, सहअस्तित्व र संवादबाट अघि बढ्नुपर्छ। राजसंस्थालगायत परम्परागत शक्ति, राजनीतिक दलहरू, जेनजी आन्दोलन र फरक मत राख्ने सबै शक्तिहरूलाई समेटेर सर्वपक्षीय संवाद आवश्यक छ,’ १२ बुँदे सहमझदारीका एक जना हस्ताक्षरकर्तासमेत रहेका श्रेष्ठले भने।
संकटको समाधान गर्न बाह्य हस्तक्षेपबाट मुक्त रहन कांग्रेसको नेतृत्वमा सर्वपक्षीय भेला गरेर समाधान निकाल्न सकिने पनि उनको भनाइ छ।
उनले अहिलेकै अवस्थामा फागुन २१ मा चुनाव हुनेमा आशंका व्यक्त गरेका थिए।
‘अहिलेको परिस्थिति जटिल छ। जेनजीको नाममा भएको घटनाले सबैको मनमा डर छ। चुनाव हुन्छ वा हुन्न, अहिलेको परिस्थितिले शंका उत्पन्न भएको छ,’ उनले भने।
उनले कांग्रेसमा सभापति शेरबहादुर देउवापछि आफूले धेरै काम गरेको दाबी गरेका थिए।
सभापति देउवाले २८ असोजमा केन्द्रीय कार्यसमितिमा उपस्थित भएर नेतृत्व हस्तान्तरण गरेकोमा उनले धन्यवाद दिए।
‘शेरबहादुर देउवाजीपछि मैले धेरै कांग्रेसमा काम गरेको छु, कार्यवाहक सभापति भएर पनि केही समय काम गरेँ, १२ बुँदे समझदारीमा हस्ताक्षरसमेत गरेको हुँ,’ उनले भने, ‘मैले केही दिनअघि कार्यसम्पादन समिति बैठकमा पनि भनेको थिएँ- शेरबहादुर देउवा मात्रै मेरो दाइ हो, यहाँ अरू सबै भाइ छन्। ढिलै भए पनि देउवाजीले उपसभापति पूर्णबहादुर खड्काजीलाई कार्यवाहक सभापति दिनुभयो, उहाँलाई धन्यवाद छ। देउवालेजस्तो नेतृत्व हस्तान्तरण अरू दलका नेताले गर्न सकेका छैनन्।’
आफू उपचारका लागि बाहिर जानुपर्ने भएकोले केन्द्रीय समितिमा धारणा राख्न नपाउने अवस्था देखिँदा पत्रकार सम्मेलन गरी केही कुरा राखेको श्रेष्ठको भनाइ थियो।
उनले नियमित महाधिवेशन गर्न पनि आग्रह गरेका छन्।
‘मैले त महामन्त्रीजीहरू गगन थापा र विश्वप्रकाश शर्मालाई केन्द्रीय कार्यसम्पादन समिति बैठकमै तपाईंहरू विशेष होइन नियमित महाधिवेशनमा लाग्नुहोस् भनेर सुझाव दिएको थिएँ,’ उनले भने, ‘ढिलोमा पनि अबका ६, ८ महिनामा त कांग्रेसको महाधिवेशन गर्नैपर्छ।’
उनले पार्टी र सत्ता पनि अब युवाले चलाउनुपर्ने बताए।
आफू विगतमा पनि पार्टी र राष्ट्रलाई अप्ठ्यारोमा पर्दा योगदान दिएको बताएका उनले कांग्रेसको नेतृत्वका लागि आकांक्षा नरहेको बताए।
‘युवा नेताहरूले हाम्रो कुरा पनि सुन्नुपर्छ,’ महामन्त्रीद्वय गगन र विश्वप्रकाशतर्फ लक्ष्य गर्दै उनले भने, ‘पार्टी र सत्ता अब युवाकै हातमा जानुपर्छ तर हाम्रा पनि कुरा सुन्नुपर्छ भनेर पदाधिकारी र पूर्वपदाधिकारीहरूबीच हामीले छलफल गर्दै आएको सत्य हो।’
उनले पार्टीमा अब ४० देखि ५० प्रतिशतसम्म युवा आउनुपर्ने बताए। ‘पदाधिकारी र अरूमा पनि ४० देखि ५० प्रतिशतसम्म युवा आउनुपर्छ,’ उनले भने।
उनले ठूला दल कांग्रेस र एमालेबीच गठबन्धन गर्दा प्रमुख प्रतिपक्षी कमजोर भएको र अहिलेको अवस्थामा मुलुक आइपुगेको पनि बताए। ‘कांग्रेस र एमालेबीच गठबन्धन नै गर्न हुँदैनथ्यो,’ समीक्षा गर्दै उनले भने।
अन्तिममा उनले कार्यवाहक सभापति पू्र्णबहादुर खड्कालाई मुलुकमा देखा परेको समस्या समाधानका लागि पहल लिन आग्रह गरेका थिए।
‘पूर्णबहादुरजीले आफूलाई किसुनजीको चेला हुँ भन्नुहुन्छ, राष्ट्रमा देखा परेको समस्या समाधान गर्न अलिकति माथि उठेर पहल गर्नुहोस्,’ उनले भने।
यस्तो छ गोपालमानको भनाइ:
1635339834.jpeg)
-1746009348.jpg)
