अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिनबीच युक्रेन युद्ध अन्त्य गर्न हुन लागेको शिखर बैठक रद्द भएको छ।
अमेरिका र रूसका नेताहरू आगामी साताहरूमा हंगेरीको राजधानी बुडापेस्टमा भेट्ने तयारीमा थिए। तर अमेरिकी विदेश मन्त्री मार्को रूबियो र रूसी विदेश मन्त्री सेर्गेइ लावरोभबीच सोमबार टेलिफोन कुराकानी भएपछि यो योजना स्थगित गरिएको हो।
बैठक रद्द भएको सूचना ह्वाइट हाउसले मंगलबार पुष्टि गरेको 'द फाइनान्सिय टाइम्स' ले लेखेको छ।
'विदेश मन्त्री रूबियो र लावरोभबीच फोनवार्ता फलदायी भयो, त्यसैले थप प्रत्यक्ष भेट आवश्यक ठानिएको छैन,' ह्वाइट हाउसका एक अधिकारीलाई उद्धृत गर्दै फाइनान्सियल टाइम्सले लेखेको छ, 'राष्ट्रपति ट्रम्प र राष्ट्रपति पुटिनबीच निकट भविष्यमा अब कुनै बैठकको योजना छैन।'
ट्रम्पले गत बिहीबार पुटिनसँग टेलिफोन वार्ता गरेपछि बुडापेस्टमा भेट्ने घोषणा गरेका थिए।
दुवै नेताहरू अन्तिम पटक अगस्टमा अमेरिकाको अलास्का राज्यको एन्कोरेजमा भेटेका थिए। तर ती शान्ति वार्ताले कुनै ठोस नतिजा दिन सकेन।
युक्रेन युद्ध अन्त्यका लागि शान्ति वार्ता पुनः सुरू गर्न चलिरहेको कूटनीतिक प्रयासबीच बुडापेस्ट शिखर बैठक घोषणा गरिएको थियो। तर घोषणा भएको पाँच दिनमै बैठक रद्द भयो।
पछिल्लो समय पुटिनको जिद्दीपनबाट ट्रम्प रूष्ट हुन थालेका छन्। उनले युक्रेनलाई लामो दूरीका टोमहक मिसाइलहरू दिने संकेत गरेका छन्। यसले युक्रेनी सेनालाई मस्कोभित्रै हमला गर्न सक्षम बनाउनेछ।
गत साता युक्रेनी अधिकारीहरूको उच्चस्तरीय टोली वासिङ्टनमा ट्रम्प प्रशासन र अमेरिकी हतियार उत्पादकहरूसँग छलफलमा थियो।
तर पुटिनसँग बिहीबारको फोनवार्तापछि ट्रम्पले 'यसले स्थिति अझ बिग्रन सक्छ, टोमहक मिसाइल भनेको ठूलो कुरा हो' भन्दै सतर्क गराएका थिए।
अर्को दिन शुक्रबार ट्रम्प र युक्रेनी राष्ट्रपति भोलोडिमिर जेलिन्स्कीबीचको भेट निकै तनावपूर्ण भएको बताइएको छ। स्रोतहरूका अनुसार बैठक कहिलेकाहीं 'चर्काचर्की' र 'गालीगलौज' मा परिणत भएको थियो।
भेटपछि ट्रम्पले सामाजिक सञ्जालमा लेखे — 'रूस र युक्रेन दुवैले युद्ध रोकून्।'
फ्रान्स, बेलायत, जर्मनी, इटाली लगायत नौ देशका नेता र युरोपेली आयोगकी अध्यक्ष उर्सुला भोन डेर लायनले पनि संयुक्त वक्तव्यमार्फत यसमा समर्थन जनाएका छन्।
वक्तव्यमा भनिएको छ, 'युक्रेनले थप भूमि गुमाउन हुँदैन। अहिलेको मोर्चा नै वार्ताको सुरूआती आधार हुनुपर्छ।'
रूसी विदेश मन्त्री लावरोभले भने मंगलबार तत्काल युद्धविराम अस्वीकार गर्दै भने, 'यो त अलास्कामा भएका सहमतिहरू विपरीत हुनेछ।'
पुटिनमाथि युक्रेनमा गरिएको युद्ध अपराधको आरोपमा अन्तर्राष्ट्रिय फौजदारी अदालतले पक्राउ आदेश जारी गरेको छ। हंगेरीले उनलाई 'सुरक्षित प्रवेश र फिर्तीको ग्यारेन्टी' दिने आश्वासन दिएको छ। तैपनि युरोप पुग्दा पक्राउ पर्ने सम्भावनालाई उनले कसरी टार्न सक्छन् भन्ने प्रश्न उठिरहेको छ।
पोल्यान्डका उपप्रधान तथा विदेशमन्त्री राडोस्लाव सिकोरस्कीले पुटिन चढेको जहाज पोल्यान्डको हवाई क्षेत्र पार गर्न पाउँछ कि पाउँदैन भनेर आफूहरूले सुनिश्चित गर्न नसक्ने बताएका छन्।
'स्वतन्त्र पोलिश अदालतले त्यस्तो जहाज रोक्ने आदेश दिन सक्छ,' उनले मंगलबार भने।
-1746009348.jpg)
