नेकपा एमाले अध्यक्ष तथा पूर्वप्रधानमन्त्री केपी शर्मा ओली आगजनी र तोडफोडको सिकार भएको आफ्नो घर हेर्न बालकोट पुगेका छन्।
उनी आफ्नी पत्नी राधिका शाक्यसँग पहिलो पटक त्यहाँ गएका हुन्।
भदौ २४ गते प्रदर्शनकारीहरूले प्रधानमन्त्री निवास बालुवाटारमा हमला गरेपछि सेनाले ओली दम्पतीलाई हेलिकप्टरमा राखेर हेटौंडाको ब्यारेक लगेको थियो। केही दिन सेनाको सुरक्षामा बसेपछि उनीहरू गुन्डूको घरमा बस्दै आएका छन्।
ओलीले उक्त अवसरमा संवाददाताहरूसँग कुरा गर्दै अन्तरिम सरकारले आफूमाथि व्यक्तिगत दुश्मनी देखाइरहेको टिप्पणी गरे।
'मैले उहाँहरूको सीमाना मिचेको छैन, घर कहाँ हो पनि थाहा छैन, तर मैविरूद्ध उहाँहरूको दुश्मनी देखिन्छ,' ओलीले भने।
त्यही दुश्मनी देखाउँदै सरकारले जेन-जीका नाममा विभिन्न व्यक्तिलाई आफूविरूद्ध उकासिरहेको र आफूलाई पक्राउ गर्न जाहेरी दिने लगायतका गतिविधि गराइरहेको उनले बताए।
'यो सरकारलाई म के भन्न चाहन्छु भने नेकपा एमाले ज्युँदो पार्टी हो। यस्ता अवैध ढंगले अचानक पलाएको सरकारका धाकधक्कुदेखि एमाले किञ्चित विचलित हुँदैन,' उनले भने।
जलेका घरका अवशेष र आगोले खरानी भएका सामान हेर्दै उनले बालकोटको घर आफ्नी श्रीमतीले ३३ वर्ष राष्ट्र बैंकको जागिर खाएर मिहिनेतका साथ बनाएको स्मरण गरेका थिए।
'यो घर र यहाँका सबै सामान हामीले राष्ट्रका नाममा दिने भनेर राजीनामा पास गरिसकेका थियौं,' उनले भने, 'यो हाम्रो निजी सम्पत्ति थिएन। राज्यकै सम्पत्ति थियो। हामी बाँचुञ्जेल मात्र यहाँ बस्ने भनेका थियौं।'
आफू लगायत विभिन्न नेताका घरमा हमला गर्ने, संसद भवनदेखि सिंहदरबारसम्म जलाउने योजना पहिलेदेखि तयार भइरहेको उल्लेख गर्दै उनले भने, 'चैत १५ गते पनि अन्तर्राष्ट्रिय सम्मेलन केन्द्र जाऊँ, सिंहदरबार जाऊँ भनेर भनेकै थिए, तर सकेनन्। यसपालि चाहिँ त्यो परिस्थिति बन्यो।'
जलेको आफ्नो घरमा व्यक्तिगत सम्झना जोडिएका केही बहुमूल्य सामान रहेको पनि उनले सम्झे।
'सिंगापुरका एक महानुभावले भियतनामका कलाकारलाई मेरो पेन्टिङ बनाउन लगाएर उपहार दिएका थिए। पेन्टिङ बनाउने कलाकारलाई मात्र उनले ८ हजार डलर पारिश्रमिक दिएका थिए। त्यो पेन्टिङको कति मूल्य राखूँ म?' ओलीले भने, 'जो दुर्लभ छ, अप्राप्य छ त्यसको मूल्य के हुन्छ?'
त्यसबाहेक रूसी कलाकारले बनाएको चित्र पनि आगोमा सखाप भएको उनले बताए।
उनका अनुसार विभिन्न धातुका मूर्ति पनि थिए। ती सबै लुटिएका छन्। विभिन्न व्यक्तिबाट आएका उपहार सामग्री पनि लुटिएका छन्।
'काम लाग्ने चिज जति लुटिएका छन्, उनीहरूलाई काम नलाग्ने किताबमा चाहिँ आगो लगाएर गएका छन्,' उनले भने।
घरमा रहेको कुनै अविश्मरणीय चिज सम्झनुहुन्छ भनेर सोधिएको प्रश्नमा ओलीले भने, 'गुमेको चिज सम्झेर झन्झट लिन चाहन्नँ, गो अहेड!'
उनले अगाडि भने, 'मेरी श्रीमतीलाई त कुन चिज कहाँ थियो भनेर सबै थाहा छ। म त्यति धेरै सम्झन चाहन्नँ। अगाडि बढ्न चाहन्छु।'
***
-1757403510.jpg)
-1746009348.jpg)
