आज भाइटीकाको दिन प्रधानमन्त्री सुशीला कार्कीको कुनै पनि सार्वजनिक कार्यक्रम नरहेको उनको सचिवालयले जानकारी दिएको छ।
प्रधानमन्त्रीले आफ्नो कार्यक्रम छैन भनेर यसरी किन भन्नुपर्यो त?
यसको कारण छ।
जेन-जी युवाहरूको एक समूहले प्रधानमन्त्रीको उपस्थितिमा दीप प्रज्ज्वलन सहितको कार्यक्रम रहेको भन्दै सामाजिक सञ्जालमा प्रचार सुरू गरेपछि प्रधानमन्त्री सचिवालयले त्यस्तो कुनै कार्यक्रम नरहेको जानकारी दिएको हो।
प्रधानमन्त्रीसँग त्यस्तो कार्यक्रममा उपस्थितिबारे कुराकानीसम्म नभएको सचिवालयले जनाएको छ।
'प्रधानमन्त्रीज्यूको आज कुनै सार्वजनिक कार्यक्रम छैन,' प्रधानमन्त्रीका प्रेस संयोजक राम रावलले भने, 'उहाँको आज टीका पनि छैन।'
उनका अनुसार प्रधानमन्त्री कार्कीले यस वर्ष परिवारमै सीमित रहेर पर्व मनाइरहेकी छन्। बाहिर कुनै समारोहमा सरिक हुने कार्यक्रम नभएको उनले बताए।
सामाजिक सञ्जालमा 'जेन-जी २.०' नामको एक समूहले बिहीबार माइतीघर मण्डलमा प्रधानमन्त्रीको उपस्थितिमा सहिद परिवार र आन्दोलनका घाइतेले दीप प्रज्ज्वलन सहितको कार्यक्रम राखेको भन्दै प्रचार गरेका थिए।
-1746009348.jpg)
