भदौ २३ र २४ को जेनजी आन्दोलनपछि पहिलो पटक राजनीतिक दल, सरकार र जेनजी प्रतिनिधिहरूबीच बुधबार बालुवाटारमा भएको त्रिपक्षीय वार्तापछि अन्तरिम सरकार उत्साही सुनिएको छ।
सरकारका प्रवक्तासमेत रहेका सञ्चारमन्त्री जगदीश खरेलले छलफलपछि सञ्चारकर्मीलाई संक्षिप्त जानकारी दिने क्रममा यस्तो छनक दिएका हुन्।
'आजको छलफल अत्यन्तै उपलब्धिपूर्ण, असाध्यै महत्वपूर्ण र सौहार्दपूर्ण रह्यो,' मन्त्री खरेलले भने, 'खास गरेर राजनीतिक दल र जेनजी प्रतिनिधिहरूबीच संवादहीनताको अवस्था थियो। औपचारिक रूपमा संवाद हुन सकेको थिएन। आज सरकार, राजनीतिक दल र जेनजी प्रतिनिधिहरूबीच खास गरेर फागुन २१ को चुनाव, सुशासन, भ्रष्टाचार नियन्त्रण र जेनजी आन्दोलन क्रममा धनजनको क्षति भएको सन्दर्भमा अलिकति गहन रूपमा छलफल भएको छ।'
मन्त्री खरेलका अनुसार जेनजीले उठाएका आवाज, आन्दोलनले दिएको म्यान्डेट र मुद्दाहरूलाई कसरी प्राथमिकता र मान्यता दिने र कसरी कार्यान्वयन अगाडि बढाउने भन्ने सन्दर्भमा गहन छलफल भएको छ।
'यो छलफल एकदमै पहिलो भए पनि उपलब्धिपूर्ण र एकदमै सौहार्दपूर्ण भएको महसुस गरेका छौं,' उनले भने।
दुई ठूला दलहरू कांग्रेस र एमालेले फरक चासो प्रकट गरेको बारे सञ्चारकर्मीले सोधेको प्रश्नमा मन्त्री खरेलले सबै दलहरू चुनावप्रति प्रतिबद्ध रहेको तर सुरक्षाबारे चिन्ता प्रकट भएको बताए।
'आज वार्तामा भएका राजनीतिक दलहरूले चुनावमा जान्नँ भन्नुभएन,' उनले भने।
छलफलमा कांग्रेसले सरकारले चुनाव गरोस् र चुनाव गर्न जे जस्तो सहयोग गर्नुपर्छ, त्यसका लागि कांग्रेस तयार रहेको बताएको उनले जानकारी दिए। त्यस्तै नेकपा माओवादी केन्द्र, राष्ट्रिय स्वतन्त्र पार्टी (रास्वपा) र अन्य पार्टीहरूको तर्फबाट पनि यस्तै भनाइ आएको उनले बताए।
'एमालेले पनि आफूहरू लोकतान्त्रिक पार्टी भएकाले चुनावमा नजाने भन्ने आफूहरूको कुरा पटक्कै छैन भनेको छ। चुनाव हुनुपर्छ र चुनावमा भाग लिनुपर्छ भनेको छ। जनमत लिन कुनै हिचकिचाहट नभएको बताएको छ,' मन्त्री खरेलले भने, 'तर चुनावको र सुरक्षाको वातावरण बनोस् भनेको छ। त्यो बनाउन सरकारले सक्छ कि सक्दैन भनेर प्रश्न गर्नुभयो।'
सरकारले चुनाव गराउन सक्छ कि सक्दैन, सहज रूपमा निष्पक्ष चुनाव हुन्छ कि हुँदैन भनेर कुनै पार्टीले चासो राख्नु र त्यस्तो होस् भन्नुलाई सकारात्मक मान्नुपर्ने उनले बताए।
मन्त्री खरेलले जेनजीका प्रतिनिधिहरूले पनि आफ्ना कुरा ऊर्जाशील तवरबाट राखेको बताए।
जेनजीहरूले आफूहरू चुनावको पक्षमा भएको तर आफूहरूले उठाएका भ्रष्टाचार नियन्त्रण, सुशासन लगायतका मुद्दाहरूको सुनुवाइ कसरी हुन सक्छ भनेर चासो राखेको मन्त्री खरेलले बताए। त्यस्तै अरू शासकीय प्रणालीदेखि लिएर निर्वाचन प्रणालीसम्मका कुराहरू उठेका उनले जानकारी दिए।
'यसलाई वार्ताबाट हामी सबै मिलेर कसरी समाधान गर्न सकिन्छ भन्ने चासो जेनजीका प्रतिनिधिहरूको छ,' उनले भने।
बैठकमा सहभागी एकीकृत समाजवादीका वरिष्ठ उपाध्यक्ष राजेन्द्र पाण्डेले सरकारको आग्रह अनुसार आफूहरू छलफलमा बसेको बताए।
'सरकारका तर्फबाट राजनीतिक दलहरू र जेनजी प्रतिनिधिहरूबीच कुराकानी हुनुपर्यो, त्यो नहुँदा चुनावको वातावरण नबन्ने भयो, दुवै पक्ष बसेर कुराकानी गर्नुहोस् भनेपछि हामी गयौं,' पाण्डेले भने।
त्यस क्रममा जेनजी प्रतिनिधिहरूले आन्दोलनको कारण पनि बताएका पाण्डेले जानकारी दिए।
'पुराना राजनीतिक दलहरूले बोल्दै आएका कुरामा सुधार हुन नसकेको, भ्रष्टाचार, बेथिति नियन्त्रण हुन नसकेको, सामाजिक सञ्जालमा प्रतिबन्ध लगाउने काम गरिएको आदि कारणले हामीले आन्दोलन गरेको हौं,' पाण्डेले जेनजी प्रतिनिधिका भनाइ उद्धृत गर्दै भने, 'हाम्रो आन्दोलन संविधानको विरूद्धमा छैन र यो संसदमा रहेका राजनीतिक दलहरू निर्वाचनमा आउनुहोस्, तपाईंहरू आउनुपर्छ।'
पाण्डले थप भने, 'जेनजी प्रतिनिधिहरूले राजनीतिक दलहरूले भाग नलिएको चुनाव हुन सक्दैन, त्यसैले तपाईंहरू आइदिनुहोस् र अब संसद पुनर्स्थापना भनेर नबसिदिनुहोस् भन्नुभयो। तपाईंहरू संसद पुनर्स्थापनातिर नलागिदिनुहोस्, चुनावमा आइदिनुहोस् र यही ढंगले अगाडि बढौं भन्नुभयो।'
उनका अनुसार बैठकमा एमालेले संसद पुनर्स्थापना गरेर, जेनजीको पनि माग सम्बोधन गरेर जान पाए राम्रो हुन्थ्यो भन्ने कुराहरू राखेको थियो।
जेनजी प्रतिनिधि खेमराज साउदले जेनजी, सरकार र राजनीतिक दलबीच भएको त्रिपक्षीय बैठकमा चुनाव कसरी सम्पन्न गर्ने, समयमै चुनाव कसरी सम्पन्न गर्ने भन्ने विषयमा छलफल भएको जानकारी दिए।
उनले पनि एमालेको फरक धारणा आएको बताए।
'एमाले पार्टीको अलिकति फरक धारणा आयो। संसद पुनर्स्थापना हुनुपर्छ भन्ने खालको धारणा थियो,' उनले भने।
-1758542555.jpg)
-copy-1761394385.jpg)
-1746009348.jpg)
