नेपाली कांग्रेसका कार्यवाहक सभापति पूर्णबहादुर खड्का आजको केन्द्रीय समिति बैठकबाट पनि महाधिवेशन कार्यतालिका ल्याउन मानेका छैनन्।
महामन्त्रीद्वय गगन थापा र विश्वप्रकाश शर्मासँग आज निवासमै छलफल गरेका कार्यवाहक सभापति खड्काले आजको केन्द्रीय समितिबाट कार्यतालिका ल्याउन नमानेका हुन्। केन्द्रीय समिति बैठक आज दिउँसो १ बजेका लागि बोलाइए पनि अहिलेसम्म सुरू हुन सकेको छैन।
महामन्त्रीद्वयले छलफलका क्रममा सभापति शेरबहादुर देउवाले समयमै महाधिवेशन गर्न कार्यवाहक सभापतिलाई जिम्मेवारी दिएकोले त्यसअघि अघि बढ्न खड्कालाई आग्रह गरेका थिए। साथै तत्काल महाधिवेशनको वातावरण बनाउने काम नेतृत्वको भएको उनीहरूको भनाइ थियो।
आफू यो केन्द्रीय समिति बैठकबाट महाधिवेशन कार्यतालिका ल्याउन सकारात्मक भए पनि सबैसँग छलफलका लागि केही समय आवश्यक परेको कार्यवाहक सभापति खड्काले महामन्त्रीहरूलाई जानकारी गराएका थिए।
सभापति देउवानिकट नेताहरूले फागुन २१ को चुनाव सकेर वैशाखमा मात्रै नियमित महाधिवेशन गर्नुपर्ने बताइरहेका छन्।
महामन्त्री विश्वप्रकाश शर्माले मंसिरभित्र महाधिवेशन गर्न समय अभाव हुन्छ भन्ने लाग्छ भने पुस १६ देखि १९ गतेसम्म १५ औं महाधिवेशन गर्ने गरी निर्णय गर्नुपर्ने कुरा राखेका थिए। त्यसमा अर्का महामन्त्री थापाले पनि सहमति जनाए।
महामन्त्री थापाले कार्यवाहक सभापति खड्कालाई आज पनि महाधिवेशन कार्यतालिका पेस गर्न नपाउने हो भने आफू केन्द्रीय समिति बैठकमै अनुपस्थित रहने जानकारीसमेत गराएका छन्।
बिहीबार महामन्त्री थापा केन्द्रीय समितिमा अनुपस्थित थिए।
-1746009348.jpg)
