नेपाली कांग्रेस केन्द्रीय कार्यसमिति बैठक महाधिवेशन कार्यतालिकामा सहमति नजुट्दा पटक पटक स्थगित हुँदै आएको छ।
आज दिउँसो १ बजे सानेपास्थित केन्द्रीय कार्यालयमा बस्ने गरी बोलाइएको केन्द्रीय समिति बैठक कात्तिक १८ गतेसम्म स्थगित भएको छ।
आइतबार दिउँसो पार्टी केन्द्रीय कार्यालयमा केन्द्रीय समिति बैठकका लागि नेताहरू पुगेका पनि थिए।
सोही बेला नेपाली कांग्रेस सुधार अभियानका नामबाट युवाहरूले प्रदर्शन गरे भने केन्द्रीय कार्यालयको मुख्य गेटमा तालाबन्दी गरेका छन्।
नेपाल विद्यार्थी संघको केन्द्रीय कार्यसमिति सदस्यहरू नै प्रदर्शनमा उत्रिएका थिए भने तालाबन्दीमा सरिक भए। उनीहरूले मुख्य गरी २ वटा एजेन्डा अघि सारेका छन्।
पहिलो- कांग्रेसको नियमित महाधिवेशन कार्यतालिका माग।
दोस्रो- युवाहरूको प्रतिनिधित्व कांग्रेस पार्टीमा सुनिश्चित हुने व्यवस्था माग।
यो प्रदर्शनको नेतृत्व नेविसंघ पूर्वकोषाध्यक्ष शिव रिमालले गरेका हुन्। साथै नेविसंघका केन्द्रीय सदस्यहरू प्रेमिका राना मगर, भुवन भट्ट, विनोद शाही ठकुरीलगायत प्रदर्शनमा सहभागी थिए। उनीहरू नेता शेखर कोइरालानिकट हुन्।
नेता कोइरालाले मंसिरभित्रै १५ औं महाधिवेशन गर्नुपर्ने बताउँदै आएका छन्।
नेविसंघ पूर्वकोषाध्यक्ष शिव रिमालले भने, ‘युवाको प्रतिनिधित्व ४० प्रतिशत हुनुपर्ने र १५ औं महाधिवेशन कार्यतालिका छिटो ल्याउनुपर्ने मागसहित हामीले आज तालाबन्दी गरेका हौं।’
कार्यवाहक सभापति पूर्णबहादुर खड्काले आज बिहानदेखि पदाधिकारी तथा पूर्वपदाधिकारी बैठक गरिरहेका छन्। साथै उनले एक-एक जना नेतासँग पनि छलफल गरिरहेका छन्। ललितपुरको धोविघाटस्थित एक होटलमा कार्यवाहक सभापति खड्काले नेताहरूसँग अनौपचारिक छलफल गरेका हुन्।
-1746009348.jpg)
