नेपाली कांग्रेसका महामन्त्री गगन थापाले ३० वर्षमुनिका युवाहरूलाई पार्टी केन्द्रीय समितिमा ल्याउन प्रस्ताव गरेका छन्।
केन्द्रीय समिति बैठकमा केही दिनअघि महामन्त्री थापाले पेस गरेको प्रस्तावमा विधान संशोधनका विषयहरू समावेश छन् जहाँ युवालाई केन्द्रीय समितिमा स्थान सुनिश्चित गर्नेदेखि चुनावमा उम्मेदवार सिफारिस गर्ने भिन्न तरिकासमेत छ।
‘नयाँ परिस्थितमा पार्टीको आमूल सुधार गर्न, सदस्यता खुला र प्रक्रिया सहज बनाउँदै नेतृत्व चयन र निर्णय प्रक्रियामा सदस्यको निर्णयक भूमिका स्थापित गर्न, तहगत प्रतिनिधि र नेतृत्व चयन प्रक्रियाको विधि र संरचना, उम्मेदवार चयनमा प्राइमरीको व्यवस्था, भ्रातृ तथा शुभेच्छुक संस्था सञ्चालन, प्रदेश कार्यसमितिको अधिकार र जिम्मेवारी, पार्टी प्रवेश र जिम्मेवारी र शासकीय पदको अवधि, ल्याटरल इन्ट्री र जरैदेखि समावेशीता, पार्टीको संरचनागत परिवर्तन लगायतका दर्जनौं विषयमा सघन छलफल गरी विधानको संशोधन गर्नुपर्नेछ,’ महामन्त्री थापाको भनाइ छ।
यसको तयारी गर्न विधान संशोधन मस्यौदा समिति बनाउन पनि थापाले कात्तिक १८ गतेको केन्द्रीय समितिमा प्रस्ताव गरेका थिए।
‘तत्कालका लागि महाधिवेशनकै लागि यी विषय सम्बोधन गर्नुपर्नेछ। यसको लागि केन्द्रीय कार्यसमितिले विधानको धारा २२ (२) बमोजिम अन्य आवश्यक निर्णय गर्नुपर्छ,’ उनको भनाइ छ, ‘पार्टीको सबै तहमा जेनजी लगायत नयाँ पुस्ताको सार्थक सहभागिता र प्रतिनिधित्व सुनिश्चित गर्न, जरैदेखि समावेशी बनाउँदै निर्णय प्रक्रियामा पहुँच पुग्नेगरी पार्टी संरचनाको विकास गर्ने। विद्यमान संरचनालाई चुस्त र प्रभावकारी बनाउनुपर्छ।’
महामन्त्री थापाले प्रस्ताव गरेअनुसार पार्टीका सबै तहको नेतृत्व अनिवार्य तल्लो तहबाट निर्वाचित भएर आउनुपर्ने व्यवस्था गर्नुपर्नेछ।
‘वडादेखि नै ३० वर्ष मुनिको नव पुस्तालगायत युवाको सार्थक सहभागिता र प्रतिनिधित्व, केन्द्रीय समितिमा निश्चित प्रतिशत नवयुवाको प्रतिनिधित्व सुनिश्चित गर्ने,’ उनको प्रस्ताव छ।
पार्टीको केन्द्रीय समितिदेखि विभिन्न तहमा हरेक क्षेत्रका विज्ञ, पेसा र विधागत प्रतिनिधित्वको लागि छुट्टै निश्चित संख्याको अनुपातमा कलस्टरको व्यवस्था गर्न पनि थापाले प्रस्ताव गरेका छन्।
क्रियाशील सदस्यले स्थानीय तहको नेतृत्व र क्षेत्रीय प्रतिनिधि छनोट गर्दा नै आफ्नो क्षेत्रबाट कम्तिमा एक महिला, एक युवासहित विभिन्न कलष्टरका व्यक्तिमध्ये आफूले आगामी निर्वाचनमा उम्मेदवारको रूपमा छनोट गर्न चाहेका व्यक्तिलाई संभाव्य उम्मेदवारको रूपमा प्राथमिकीकरण गरेर सूचीकृत गर्नुपर्ने प्रस्ताव पनि महामन्त्री थापाको छ।
पार्टीको उम्मेदवार छनोट गर्ने निलकायले क्रियाशील सदस्यले प्राथमिकीकरण गरी सूचीकृत गरेको यो छनोटलाई नै आधार मान्ने उनको भनाइ छ।
-1746009348.jpg)
