अन्तरिम सरकारले आगामी फागुन २१ गतेका लागि प्रतिनिधिसभा निर्वाचनको मिति घोषणा गरेसँगै देशभरका निर्वाचन कार्यालयमा मतदाता नामावली संकलन भइरहेको छ।
निर्वाचन आयोगले गत असोज १० गतेदेखि मतदाता नामावली संकलनको काम सुरु गरेपछि देशभरका निर्वाचन कार्यालय मतदाता नामावली संकलन गर्न व्यस्त छन्।
निर्वाचन कार्यालय रुपन्देहीमा पनि मतदाता नामावलीमा नाम दर्ता गराउनेहरूको दैनिक भीड लागेको छ।
निर्वाचनको मिति नजिकिँदै जाँदा राजनीतिक दलका कार्यकर्ता, स्वतन्त्र युवा र जेन जी समूहका युवाहरू मतदाता नामावलीमा नाम दर्ता गराउन उत्साहित बनिरहेका छन्।
पछिल्लो पटक सुरु भएको मतदाता नामावलीमा नाम दर्ता गराउनेहरू अधिकांश युवा उमेर समूहका रहेको निर्वाचन कार्यालयले जनाएको छ।
जिल्ला निर्वाचन अधिकारी कल्पना अर्यालका अनुसार असोज १० गते कार्तिक २८ गते सम्म रुपन्देहीमा १० हजार ४८४ जना मतदाता थपिएका छन्।
सरकारले निर्वाचनको मिति घोषणा गरेपछि डेढ महिनाको अवधिमा ५ हजार ९३२ पुरुष र ४ हजार ५५२ महिला मतदाता थपिएको अर्यालले बताइन्।
कार्तिक २८ गते शुक्रवार एकै दिन ८७८ जनाले मतदाता नामावलीमा नाम दर्ता गराएका छन्।
मतदाता नामावली दर्ता गर्न दैनिक सयौंको सङ्ख्यामा सर्वसाधारण आउने गरेपछि शनिबार पनि निर्वाचन कार्यालय खुल्ला हुने भएको छ।
‘यसअघिका दिनमा भन्दा यस पटक निर्वाचनप्रति सर्वसाधारणको चासो बढेको छ, एक दिनमा ८७८ जनाले मतदाता नामावलीमा नाम दर्ता गराउनुले पनि निर्वाचनप्रति जनताको चासो बढेको छ भन्ने पुष्टि गर्छ,’ अर्यालले भनिन्।
अर्यालका अनुसार मतदाता नामावलीमा नयाँ दर्ता गर्नेमध्ये ८० देखि ९० प्रतिशत युवायुवती छन्। यहाँ दर्ता गर्न आउने रुपन्देही जिल्ला बाहिरका पनि छन्।
जिल्लामा असोज १० गतेदेखि मतदाता नामावली नयाँ दर्ता र अद्यावधिक कार्य सुरु भएको थियो। अर्यालले पहिल्यै अनलाइन फारम भरेर बल्ल मतदाता नामावलीमा नाम दर्ता गर्न आउन आग्रह गरिन्।
नेपाली नागरिकता प्राप्त १६ वर्ष पूरा गरेका सबै नागरिकले अनलाइनमार्फत मतदाता नामावली दर्ता गर्न सक्ने व्यवस्था गरिएको छ।
तर, १८ वर्ष पुगेकाले मात्र मताधिकार प्रयोग गर्न पाउने छन्।
जिल्लामा २०८२ साल कात्तिक १६ गतेसम्म १८ वर्ष उमेर पुगेका ६ लाख ४४ हजार ३५६ मतदाता रहेका थिए।
जसमध्ये तीन लाख ३० हजार ७४१ पुरुष र तीन लाख १३ हजार ६०७ जना महिला रहेको कार्यालयले जनाएको छ। त्यसयता ५ हजार भन्दा बढी मतदाता थप भएका छन्।
थप भएका समेत गरी रुपन्देहीमा मतदाताहरूको सङ्ख्या ६ लाख ५० हजार हाराहारी पुगेको निर्वाचन कार्यालयले जनाएको छ।
निर्वाचन आयोगले यसअघि कार्तिक मसान्तसम्म मात्र मतदाता नामावलीमा नाम दर्ता, अद्यावधिक र ठाउँ सारी गर्ने मिति तोकेकोमा निर्वाचन कार्यालयमा सर्वसाधारणको भिड नघटेपछि नाम दर्ता गराउने अवधि मंसिर ५ गतेसम्म थप गरेको छ।
जिल्ला निर्वाचन अधिकृत अर्यालले सुरुवाती दिनहरूमा दैनिक ४०/५० जना मात्र आउने गरेकोमा पछिल्ला दिनहरूमा नाम दर्ता गराउन आउनेहरूको संख्या बढेको बताइन्।
उनका अनुसार सबैभन्दा धेरै कार्तिक २४ गते एकै दिन १ हजार ५ सय जनाले नाम दर्ता गराएका छन्। नाम दर्ता गर्ने मिति सकिन लाग्दा कार्यालयमा सर्वसाधारणको भिड थेग्नै मुस्किल पर्ने गरेको अर्यालले बताइन्।
भिड बढेपछि कार्तिक २६ गतेदेखि कार्यालयमा २ जना कर्मचारी थप गरिएको छ। यसअघि ७ जना कर्मचारी रहेकोमा बुधवारदेखि २ जना थप गरी ९ जनाले मतदाताको नाम संकलन गर्दै आएका छन्।
अर्यालका अनुसार छिमेकी जिल्लाहरूबाट समेत रोजगारी तथा अध्ययनको लागि रुपन्देही आई बसोबास गर्दै आएकाहरूले समेत रुपन्देहीबाटै नाम दर्ता गराउँदा यहाँ भिड बढेको हो।
-1746009348.jpg)
