नेपाली कांग्रेसले विगतका गल्ती-कमजोरी स्वीकार गर्दै जनतासँग माफी मागेर फेरि नेतृत्व लिन सक्ने गरी निर्णय गर्न समय लागेको कार्यवाहक सभापति पूर्णबहादुर खड्काले बताएका छन्।
उनले पार्टीलाई एकताबद्ध राखेर प्रतिकूल समयको पदचाप सामना गर्न सक्ने निर्णय गर्न केही समय लागेकाले धैर्य गर्न पनि अपिल गरेका छन्।
एक महिना केन्द्रीय समिति बैठक चले पनि अहिलेसम्म महाधिवेशनसहित केही निर्णय लिन नसकेको भन्दै नेतृत्वको आलोचना भइरहेका बेला कार्यवाहक सभापतिबाट यस्तो प्रतिक्रिया आएको हो।
'मेरो बारेमा सार्वजनिक रूपमा यहाँहरूले गर्नुभएको जस्तोसुकै टिप्पणीलाई मेरो सदा सम्मान छ र रहने छ। यिनै टिप्पणी नै मेरा लागि शक्ति र मार्गदर्शन हुन्छन्,' खड्काले शनिबार सामाजिक सञ्जाल फेसबुकमा पोस्ट गरेका छन्।
उनी अगाडि लेख्छन्, 'इतिहासमै देश र पार्टीमाथि देखिएको प्रतिकूल अवस्थालाई ध्यानमा राखेर निर्णय गर्न केही समय ढिला भए पनि हतारमा निर्णय गरेर पछि पछुताउनुभन्दा पार्टीलाई एकताबद्ध राखेर प्रतिकूल समयको पदचाप सामना गर्न, हाम्रा विगतका गल्ती-कमजोरी स्विकारी नेपाली जनतासँग माफी मागेर, विगतमा जस्तै समाधानको नेतृत्व फेरि एकपटक कांग्रेसले लिन सक्ने गरी पार्टीको उपयुक्त निर्णय गर्न समय लागेको छ।'
उनले एकताबद्ध भएर यो महत्त्वपूर्ण मर्मलाई बुझिदिन र धैर्य राखिदिन अनुरोध गरेका छन्।
गत असोज २८ देखि केन्द्रीय समिति बैठक चले पनि नेताहरूले बोल्ने क्रम सकिएर सहमति खोज्ने भन्दै बैठक स्थगित भएको छ। अब सोमबार दिउँसो केन्द्रीय समिति बैठक बस्नेछ।
यसबीच उपचार गर्न सिंगापुर गएका सभापति शेरबहादुर देउवा पनि शुक्रबार बेलुकी स्वदेश फर्किएका छन्।
कांग्रेसमा चुनावअघि वा पछि नियमित महाधिवेशन गर्ने कि ५४ प्रतिशत महाधिवेशन प्रतिनिधिहरूले हस्ताक्षर गरेर मागेअनुसार विशेष महाधिवेशन गर्ने भन्नेमा मतभेद छ।
-1746009348.jpg)
