निजी सचिवालय विघटन गरेर सुशासनका लागि प्रतिबद्ध रहेको सन्देश दिएका लुम्बिनी प्रदेशका सभामुख तुलाराम घर्ती मगरले सरकारी निवास भने प्रदेशभित्रै दुई वटा प्रयोग गर्दै आएका छन्।
पाल्पाको तिनाउ गाउँपालिका घर भएका सभामुख घर्ती मगरले दाङको राप्ती गाउँपालिका बुटवलमा गरी दुई वटा स्थानमा सरकारी निवास प्रयोग गर्दै आएका छन्।
प्रदेशको अस्थायी मुकाम बुटवलमा रहेको बेला बुटवल उपमहानगरपालिका वडा नं. १० रामनगरस्थित राष्ट्रिय व्यावसायिक प्रशिक्षण प्रतिष्ठानका दुई वटा भवन सभामुखको निवासको लागि प्रयोग गरिएका थिए।
प्रदेश सभाको पहिलो कार्यकालमा तत्कालीन सभामुख पूर्णबहादुर घर्तीले प्रयोग गरेको सोही प्रशिक्षण प्रतिष्ठानका भवन अहिले पनि सभामुखको निवासको रूपमा प्रयोग भइरहेका छन्।
२०७९ मंसिरमा बुटवलबाट दाङको राप्ती उपत्यकामा प्रदेश राजधानी सारिएपछि मुख्यमन्त्रीदेखि मन्त्री र सभामुखहरूका निवास पनि राप्ती उपत्यकामै सारिएका थिए।
राजधानी दाङ सारिएपछि राप्ती गाउँपालिकाको पुरानो वडा कार्यालयलाई मर्मत सम्भार गरी सभामुख घर्ती मगरको लागि सरकारी निवास बनाइएको थियो। अहिले पनि सभामुख घर्ती मगर सोही निवासमा बस्दै आएका छन्।
तर, राजधानी दाङ सारिएको ३ वर्षसम्म पनि सभामुख घर्ती मगरले बुटवलमा रहँदा प्रयोग गरिएको सरकारी निवास खाली गरेका छैनन्।
अधिकांश समय दाङमै रहेको निवासमा बस्ने घर्ती मगर रूपन्देही र पाल्पा आएको बखत बुटवलको निवासमा बस्दै आएका छन्।
सभामुख घर्ती मगर मात्रै होइन प्रदेश सभा सचिवालयका सचिव दुर्लभ कुमार पुनले समेत सोही भवनको एक हिस्सालाई आफ्नो निवासको रूपमा प्रयोग गरिरहेको त्यहाँ कार्यरत सुरक्षाकर्मी बताउँछन्।
प्रदेश सभाका सूचना अधिकारी गिरिराज खनालले बुटवलमा पहिले रहेको निवासलाई अहिले सभामुखको सम्पर्क कार्यालयको रूपमा प्रयोग गरिएको बताए।
संघीय सरकारको मापदण्डभित्र नपरे पनि आर्थिक सुशासनको सन्देश दिन निजी सचिवालय विघटन गरेको बताएका सभामुख घर्ती मगरले एउटै प्रदेशभित्र दुई वटा सरकारी निवास प्रयोग गरी राज्यलाई अतिरिक्त आर्थिक भार पारिरहेका छन्।
सभामुख घर्ती मगरले देशको आर्थिक अवस्थालाई मध्यनजर गर्दै मंसिर १ गतेदेखि लागू हुने गरी आफ्नो पाँच जनाको निजी सचिवालय (स्वकीय सचिव, प्रेस संयोजक, कम्प्युटर अपरेटर, सवारी चालक र कार्यालय सहयोगी) विघटन गरेका थिए।
एकातिर सचिवालय विघटन गरेर सरकारको खर्च घटाएको प्रचार गर्ने र अर्कोतर्फ कार्यकारी पद नहुँदा पनि एउटै प्रदेशभित्र दुई वटा सरकारी निवास प्रयोग गरी रहनुले सभामुख आफैले गरेको मितव्ययिताको प्रतिबद्धतामाथि प्रश्न उब्जिएको छ।
प्रदेश राजधानीका सबै प्रशासनिक संरचना दाङ सारिएपछि सभामुखको निवासको रूपमा प्रयोग गरिएको भवन खाली गर्न प्रशिक्षण प्रतिष्ठानले पटक पटक प्रदेश सभालाई पत्र पठाएको छ।
प्रतिष्ठानका प्रमुख गिरिराज ज्ञवालीका अनुसार सभामुखको निवासको लागि प्रयोग गरिएका भवन खाली गर्न चालु आर्थिक वर्षमा मात्रै प्रदेश सभालाई दुई वटा पत्र पठाइएको छ। तर सभामुखको निवास खाली गराउने विषयमा भने प्रदेश सभा र प्रदेश सरकार दुवैले चासो दिएका छैनन्।
सभामुख घर्ती मगर अधिकांश दिन दाङमा रहेको निवासमा बस्छन् भने बुटवलमा रहेको भवनमा सुरक्षाकर्मी बस्दै आएका छन्।
प्रतिष्ठानका प्रमुख ज्ञवालीले आठ वर्षदेखि सभामुखको निवासको लागि भवन प्रयोग हुँदा प्रतिष्ठानको तालिम र प्रशासनिक काम प्रभावित बनेको बताए।
भवन अभावमा प्रतिष्ठानले तालिम सञ्चालन गर्ने सभा हललाई पार्टेसन गरेर साँघुरो ठाउँबाट कार्यालय सञ्चालन गर्दै आएको छ।
सभामुखको निवासको लागि प्रयोग गरिएका भवन प्रतिष्ठानको प्रशासनिक कामका लागि निर्माण गरिएका थिए।
प्रदेश सभाले सभामुखको निवास खाली गराएको खण्डमा प्रशासनिक काम त्यहाँ सार्ने र हालको भवनलाई पूर्ण रूपमा तालिम केन्द्र बनाउने ज्ञवालीले बताए।
-1746009348.jpg)
