प्रधानमन्त्री सुशीला कार्कीले सबै राजनीतिक दललाई समयमै र जिम्मेवारीपूर्वक निर्वाचन प्रक्रियामा सहभागिताका लागि आग्रह गरेकी छन्।
बुधबार प्रधानमन्त्री तथा मन्त्रिपरिषद कार्यालयमा आयोजित सर्वदलीय बैठकमा सम्बोधन गर्दै उनले यस्तो बताएकी हुन्।
निष्पक्ष निर्वाचनमार्फत बिनापैसा, न्यूनतम खर्चमा, उम्मेदवार चयन हुन सकोस् भन्दै उनले आफ्नो सरकार निर्वाचन गराउनकै निम्ति आएको पनि बताइन्।
'हामी चाहन्छौं यो देश नयाँ पुस्ताको हातमा जाओस्। केही भिजन भएको मान्छेले सम्हालिदेओस्,' प्रधानमन्त्री कार्कीले भनिन्, 'मलाई झापामा चुनाव लड्न आऊ भनेको पनि सुनेकी छु। म चुनाव लड्दिनँ। चुनाव लड्न आएको पनि होइन।'
निर्वाचन आयोगले ६० प्रतिशत तयारी पूरा भइसकेको जानकारी गराएको भन्दै प्रधानमन्त्री कार्कीले आफूहरू चुनाव हुन्छ भन्नेमा ढुक्क रहेको बताइन्।
पढ्नुस् प्रधानमन्त्री कार्कीले बैठकमा राखेको समापन मन्तव्यः
हामीले दललाई बोलाएका थियौं। यहाँहरू आइदिनुभयो। पुनः धन्यवाद दिन चाहन्छु। यहाँहरूले नै पनि एकापसमा चिन्ने, चिनिने मौका पाउनुभयो भन्ने पनि लागेको छ।
१२५ दलमध्ये ११० भन्दा बढी दलको उपस्थिति यहाँ छ। अहिलेसम्म ५६ जनाले बोल्नुभयो। सबैको कुरा मैले भ्याएसम्म टिपेकी छु।
यस्तो भेला पहिला नै पनि गरौं भन्ने लागेको थियो। तर अन्य कार्यव्यस्तता र वातावरण मिलाउँदा आजको दिन जुर्यो।
सुरूमा त दलहरूलाई भेट्ने अवस्था नै थिएन। जेनजीहरू एकदमै उग्र र आक्रोशित थिए। आक्रोश हुनु स्वाभाविक पनि थियो। आन्दोलनकारी, घाइते र सहिद परिवारका कुरा सुन्यौं। उहाँहरूको आक्रोश सुन्ने र मत्थर पार्ने नै हाम्रो पहिलो प्राथमिकता रह्यो। त्यो आक्रोश सुन्न हामीले पर्याप्त समय नदिएको भए फेरि सडकमा पोखिन सक्थ्यो। सडकमा जानबाट रोक्यौं।
हामी राजनीतिक अनुभव भएका कोही थिनौं। कोही न्यायाधीश कोही वकिल। आ–आफ्नो पेसागत क्षेत्रको मात्र अनुभव हामीसँग थियो। हठात् रूपमा यहाँ आयौं।
हाम्रा बालबालिका यसरी मारिए, जुन अहिले सम्झिँदा पनि मन थाम्न गाह्रो हुन्छ। भर्खरको पढिरहेको बच्चाको टाउकोमा, छातीमा गोली लागेको छ। परिवारको सहारा गुमेको छ। घरको दियो निभेको छ। भर्खर २० वर्षकी दुलहीले श्रीमान गुमाएकी छन्। दुई वर्षकी छोरीले बाबु खोजिरहेको छन्।
यस्तो अवस्था आउला भन्ने कसले कहिले सोचेको थियो र? कहिल्यै नहुने काम भयो। अब कहिल्यै नहोस् पनि। यस्तो हृदयविदारक घटना पुनः नहोस्।
यति ठूलो घटना किन भयो त? यहाँ उकुसमुकुस थियो। भ्रष्टाचार थियो। निराशा थियो। आक्रोश थियो। त्यो विस्फोट भयो। छताछुल्ल भयो। अब यसलाई सम्हाल्नुपर्छ। सम्हालिनुपर्छ।
हामी पनि सम्हाल्न भनेरै आएका हौं। राष्ट्र सम्झेर आएका हौं। देशको अवस्था देखेर आएका हौं। ती निर्दोष बच्चाको माया लागेर आएका हौं।
हामी लागेर देश जोगाउन सक्छौं कि भनेर यो अप्ठ्यारो परिस्थितिमा आएका हौं। हामी गाडी चढ्ने रहरले वा कुनै सुविधा पाउने लोभले आएका होइनौं।
खासमा भन्दा म प्रधानमन्त्री हुँ भन्ने अनुभूति पनि छैन। गौरव पनि छैन। देशको यो दुर्गति भएका बेला मुलुक, धर्म र इमान सम्झेर केही बचाउन सकिन्छ कि भनेर आएका हौं। यो समाज बिथोलिएको अवस्थामा केही जोड्न सकिन्छ कि भनेर आएका हौं।
हामीले सरकारमा कस्ता व्यक्ति ल्यायौं त्यो पनि हेर्नुहोस्, जो जिन्दगीभर अपहेलित भए हिजो। कुलमान घिसिङ काम गर्दागर्दै अपहेलित हुनुभयो। महावीर पुन पुस्तक बेच्दाबेच्दै आउनुभयो। मैले ८ र अरू मन्त्रीजीहरूले पनि तीन/चार मन्त्रालय बोकेर हिँडेका छौं। राति १ बजेसम्म पनि काम गरेर पनि बसेका छौं।
हामी निर्वाचन गराउनै भनेर आएका हौं। हामी चाहन्छौं नयाँ पुस्ताको हातमा जाओस् यो देश। केही भिजन भएको मान्छेले सम्हालिदेओस् यो देश।
हिजोका सबै भ्रष्टाचारी फटाहा भन्न खोजेको होइन। तर अब निष्पक्ष निर्वाचनमार्फत बिनापैसा, न्यूनतम खर्चमा, उम्मेदवार चयन हुन सकोस्। कम खर्चमा चुनाव लड्न सक्ने वातावरण बनोस् भनेर हामी लागेका छौं।
मलाई झापामा चुनाव लड्न आऊ भनेको पनि सुनेको छु। म चुनाव लड्दिनँ। चुनाव लड्न आएको पनि होइन।
हामी गाडी चढ्न र रमाइलो गर्न पनि आएका होइनौं। महात्मा गान्धीले सादा वेशमै सडकमा निस्केर बाटो देखाउनुभयो। नेल्सन मन्डेलाले पनि देश सम्झेर गरेको त्याग विश्वले देखेको छ। हामी त्यो तहमा नहौंला तर हामीमा देशप्रति एउटा भावनामा छ, माया छ, चिन्ता पनि छ। त्यसैले हामीलाई केही नगरी बस्न दिएको छैन।
निर्वाचनको ६० प्रतिशत तयारी पूरा भइसक्यो भनेर निर्वाचन आयोगले नै भनिसकेको छ। हामी यहाँ आएको ३ दिनपछि नै निर्वाचनको काम सुरू गरिसकेका हौं। आयोगसँग सम्पूर्ण साधन छन्। हामीले कुनै कमी हुन दिएका छैनौं। चुनाव हुन्छ भन्नेमा हामी ढुक्क छौं।
लुटिएका ८२१ हतियार फिर्ता भइसके। सात हजार कैदीबन्दी नियन्त्रणमा आइसके।
प्रहरीमा नयाँ नेतृत्व आइसकेको छ र एक्सनमा जाने अवस्था छ। प्रहरीको मनोबल हामीले दुई महिनामा खस्काएका होइनौं। हिजो गैरघातक सामग्री र अरू बन्दोबस्तीका सामान हामीले नदिएका होइनौं। गृह र अर्थ मन्त्रालयमा फाइल हामीले अड्काएका होइनौं। बरू हामीले फटाफट काम अघि बढाएका छौं।
नेता र तिनका आफन्त नातेदारहरूका घरमा घरमा भाँडा माझ्न पनि प्रहरी राखिएका थिए हिजो। तिनलाई फिर्ता गरेका छौं। अब भन्नुहोस् मनोबल कसले घटायो र बढायो?
३५ वर्षमा घटाइएको मनोबल एकपछि अर्को गरी उठाउँदैछौं हामी। सम्पूर्ण साधन पनि जुटाउँदैछौं। प्रत्येक प्रहरी कर्मचारीको शिर उठाउने र तिनले गर्व गर्न सक्ने संगठन होस् भनेर हामी निर्णयहरू गर्दैछौं।
हामीलाई प्रशंसा चाहिएको छैन। अहिले धन्यवाद पनि चाहिएको छैन। हाम्रा राम्रा कुरा लेखिदिएनन् भनेर पत्रिकाहरूसँग गुनासो पनि छैन। भर्खरै कान्तिपुरले वायु सेवा निगममा बिनाप्रतिस्पर्धा अध्यक्ष नियुक्त गर्यो भनेर झुट लेख्यो। हामीले त्यहाँ नियुक्ति नै गरेका छैनौं। भइरहेकै सञ्चालक समितिबाट चलाउन खोज्यौं। आलोचना नगरी पत्रिका बिक्दैन। त्यसमा मेरो भन्नु केही छैन।
अख्तियार दुरूपयोग अनुसन्धान आयोगसँग हामी सम्पर्कमै छौं। प्रत्येक दिन कति प्रगति भयो भनेर सोधिरहेको छु। सिआइबी र अन्य निकायले पनि अनुसन्धान तीव्र रूपमा अघि बढाएका छन्। तर यी गम्भीर अपराधको अनुसन्धानमा समय लाग्छ। नतिजामा पुग्नुअघि थुप्रै प्रक्रियागत चरण गुजार्नुपर्ने हुन्छ।
निर्वाचन आयोगमा पनि तीन जना आयुक्त हुनुहुन्छ। उहाँहरू पनि रातदिन खटिरहनुभएको छ।
मैले सरकारी काम कारबाही प्रायः सिंहदरबारमै गर्छु। निर्णयहरू सिंहदरबारमै हुन्छ। विदेशीसँग भेटघाट पनि सिंहदरबारमै परराष्ट्र मन्त्रालयका प्रतिनिधि समेतको उपस्थितिमा मात्र गरेकी छु। बालुवाटार वा अन्यत्र गोप्य रूपमा विदेशीसँग भेटघाट भएको छैन। त्यो मेरो प्रकृति पनि होइन।
काम गर्दा नियम कानुन मिचिन्छ कि भनी पाइला पाइलामा हामी सतर्क हुन्छौं।
नभएका आरोप लगाएर दोष दिँदा आनन्द त आउला तर यो समयमा त्यस्ता कार्यको असर के हुन्छ भनेर हेर्नुपर्ला।
हामीलाई अहिले धन्यवाद दिनुपर्दैन। जुन दिन निर्वाचन होला, त्यसैको भोलिपल्ट धन्यवाद दिनुहोला।
योभन्दा बढी के बोल्नु?
सेवारो।
***
-1746009348.jpg)
