अमेरिकी राष्ट्रपति डोनाल्ड ट्रम्पले रूस-युक्रेन युद्धविरामको खाका तयार पारिसकेको खुलेको छ।
रूससँगको झन्डै तीन वर्ष लामो युद्ध अन्त्यका लागि ट्रम्पले तयार गरेको प्रस्ताव युक्रेनी राष्ट्रपति भोलोदिमिर जेलेन्स्कीसमक्ष पुगिसकेको विभिन्न अन्तर्राष्ट्रिय सञ्चारमाध्यमहरूले जनाएका छन्।
रोयटर्सका अनुसार ट्रम्पले युद्धविरामका लागि मुख्यगरी दुईवटा प्रस्ताव उल्लेख गरेका छन्।
युक्रेनले आफ्नो भूभाग त्याग्नुपर्ने र सेनाको आकार घटाउन पनि तयार हुनुपर्ने प्रस्तावित मस्यौदामा उल्लेख रहेको भनेर रोयटर्सले स्रोतलाई उद्धृत गर्दै लेखेको छ।
युद्ध अन्त्यका लागि रूसले बारम्बार भन्दै आएको विषय पनि यिनै हुन्।
राष्ट्रपति भ्लादिमिर पुटिनले युद्ध क्रममा आफूले कब्जा गरेको युक्रेनी भूभागा रूसकै दाबी रहने बताउँदै आएका छन्।
साथै युक्रेनी सेनाको आकार घटाउनुपर्ने पनि उनकै माग थियो। त्यो भनेको युक्रेनलाई नेटो सदस्यको मान्यता दिन नहुने उनको माग छ।
यी दुवै प्रस्ताव ट्रम्पले रुसलाई फाइदा हुनेगरी तयार पारेका हुन्।
यी दुवै प्रस्तावमा सहमत हुन पनि ट्रम्पले जेलेन्स्कीलाई दबाब दिएको भनेर रोयटर्सले लेखेको छ।
दुई प्रस्तावलाई लएर अमेरिकी अधिकारीहरू छलफलका लागि किभ पुगिसकेका छन्।
बिबिसीका अनुसार अमेरिकी सेना सचिव डान ड्रिस्कोल नेतृत्वको प्रतिनिधिमण्डल किभ पुगिसकेका छन्। सेनाका प्रमुख जनरल र्यान्डी जर्ज पनि टोलीमा छन् र उनीहरूले बिहीबार जेलेन्स्कीसँग भेट गर्ने कार्यक्रम छ।
जेलेन्स्की र उसका युरोपेली सहयोगी मुलुकहरूले युक्रेनले आफ्नो भूभाग गुमाउने र सेनाको आकार घटाउनुपर्ने गरी युद्धविराम सम्झौता गर्न नसकिने बताउँदै आएको छ।
यद्यपि पछिल्लो समय रुसले युक्रेनको पूर्वी भूभागमा तीव्र पारेको हमला र किभमा बढ्दो भ्रष्टाचार प्रकरणको बीचमा जेलेन्स्कीमाथि ट्रम्पको प्रस्ताव स्वीकार गर्न राजनीतिक दबाब परेको भनेर रोयटर्सले लेखेको छ।
गएराति रूसी आक्रमणबाट युक्रेनमा२५ जनाको मृत्यु भएको छ।
बुधबार युक्रेनको ऊर्जा र न्याय मन्त्रीलाई संसदले बर्खास्त गरेको विषयले पनि जेलेन्स्की अहिले दबाबमा छन्।
भूमि त्याग्नुपर्ने र सेनाको आकार पनि घटाउने भनेर तयार पारिएको प्रस्तावमा युक्रेनको कुनै संलग्नता छैन।
अमरिकी प्रस्तावको ठाडै अस्वीकार गर्न नसके पनि जेलेन्स्कीले युद्धविरामका लागि अमेरिकाको भूमिका प्रभावकारी हुनुपर्ने बताएका छन्।
उनले यसका लागि अमेरिकी नेतृत्व पनि बलियो हुनुपर्ने बताएका छन्।
अलास्कामा ट्रम्प र पुटिनबीच प्रत्यक्ष वार्ता भएयता युद्धविराम बारे कुनै ठोस सहमति हुन सकेको छैन।
यद्यपि पुटिनसँग ट्रम्पले लगातार टेलिफोन संवाद गर्दै आएका छन्।
अमेरिकाले तोमहक मिसाइल दिन्छ भनेर ढुक्क भएर ह्वाइट हाउस पुगेका जेलेन्स्की ट्रम्पले पुटिनसँग टेलिफोन संवाद गरेपछि रित्तो हात फर्कनुपरेको थियो।
पुटिन यूक्रेनले नेटो प्रवेश त्याग्नुपर्ने, रूसले आफ्नो भूभाग मानेका चार प्रदेशबाट यूक्रेनी सेना फिर्ता हुनुपर्ने माग पहिलेदेखि नै राख्दै आएका छन्। किभले भने यस्ता माग स्वीकार्य नहुने बताएको छ।
हाल रूसी फौजले करिब १९ प्रतिशत यूक्रेनी भूभाग नियन्त्रणमा लिएको अनुमान छ, र जाडो अघि ऊर्जा पूर्वाधारमाथि निरन्तर प्रहार भइरहेका छन्।
-1746009348.jpg)
