राष्ट्र, राष्ट्रियता, धर्म संस्कृति तथा नागरिक बचाउ महाअभियानका संयोजक दुर्गा प्रसाईंले सर्वोच्च अदालतमा बन्दीप्रत्येक्षीकरणको रिट दर्ता गराएका छन्।
उनका छोरा निराजनले सर्वोच्चमा रिट दर्ता दिएका हुन्। रिटको सुनुवाइ बिहीबार हुँदैछ।
सुनुवाइ न्यायाधीश मेघराज पोखरेलको इजलासमा हुने तय भएको छ।
प्रसाईंले दिएका अभिव्यक्तिका आधारमा प्रहरीले सोमबार मध्यराति पक्राउ गरेको थियो।
उनीमाथि सार्वजनिक शान्ति विरूद्धको कसुरमा पक्राउ गरेको थियो।
त्यस्तै उनका बडिगार्ड दिपक खड्कालाई पनि पक्राउ गरी अभद्र व्यवहारको कसुरमा अनुसन्धान अघि बढाएको छ।
प्रसाईंलाई सोमबार राति नै पक्राउ गर्ने निर्णय किन भयो?
यसका पछाडि सोमबार दिउँसो भक्तपुरमा आयोजित पत्रकार सम्मेलनमा उनले बोलेको कुरा मुख्य कारण देखिएको छ।
उक्त पत्रकार सम्मेलनमा प्रसाईंले भदौ २४ गते नयाँबानेश्वरमा प्रहरीमाथि गरिएको दुर्व्यवहार, कुटपिट लगायत घटना ठिक रहेको अभिव्यक्ति दिएका थिए। त्यही अभिव्यक्तिकै कारण उनलाई रातारात पक्राउ गर्नुपर्ने अवस्था आएको प्रहरी अधिकारीहरूले बताएका छन्।
'यिनलाई (प्रहरी) खोलामा खेदी खेदी त्यत्तिकै कुटेका हुन् त अस्ति। नांगै बनाएर खेदेका थिए नि! यहाँ गेटमा आएर हाम्रो पर्चा पनि लिएर गएछन्। हाम्रो गेटमा आएर पर्चा लानुपर्ने कारण के छ? यिनीहरूको महिनाको एक लाख तलब पुर्याउने भनेर म लागेको, यिनीहरूलाई अझै पुगेको छैन,' प्रसाईंले भनेका थिए।
प्रसाईंको यही अभिव्यक्ति उनलाई रातारात पक्राउ गर्ने 'ट्रिगर प्वाइन्ट' बन्यो।
उनले केही दिनयता प्रधानमन्त्री सुशीला कार्की, गृहमन्त्री ओमप्रकाश अर्याल लगायतलाई चिढ्याउने अभिव्यक्ति पनि दिइरहेका थिए। सोमबार भने प्रहरी प्रशासनकै मनोबल गिराउने खालका अभिव्यक्ति दिएकाले पक्राउ गर्ने निर्णय भएको प्रहरी अधिकारीहरूले बताएका छन्।
'प्रहरीको मनोबल गिराउने उद्देश्यले अराजक अभिव्यक्ति बोल्दै हिँडेका थिए। हिजो भक्तपुरमा त कोटेश्वरको घटनालाई लक्ष्य गर्दै प्रहरीविरूद्ध नै अभिव्यक्ति दिए,' प्रसाईंलाई पक्राउ गर्ने अपरेसनमा संलग्न एक अधिकारीले भने।
पत्रकार सम्मेलनमा दुर्गा प्रसाईं आफैले पक्राउको सुइँको पाएको बताएका थिए।
आफूलाई पक्राउ गर्ने खबरहरू पाइरहेको भन्दै उनले काठमाडौंका प्रमुख जिल्ला अधिकारी ईश्वरराज पौडेललाई फोन गरेको पनि उल्लेख गरे।
'काठमाडौंका सिडिओ साबलाई सोधेँ, मलाई पक्रिने खबर के हो? म आउनुपर्छ भने आउँछु भनेँ। भक्तपुरको पुलिसको मति छैन के,' उनले भनेका थिए।
उनले त्यही पत्रकार सम्मेलनमा नवनियुक्त आइजिपी दानबहादुर कार्कीले प्रधानमन्त्री कार्की र गृहमन्त्री ओमप्रकाश अर्याललाई समेत पक्राउ गर्नुपर्ने तर 'दम' नभएको अभिव्यक्ति दिएका थिए।
राष्ट्र, राष्ट्रियता, धर्म संस्कृति नागरिक बचाउ महाअभियानका संयोजक रहेका प्रसाईंले पछिल्लो समय आन्दोलन भड्काउने अभिव्यक्ति दिँदै आएका थिए। देश गृहयुद्धमा जान लागेको र त्यसका लागि रासनपानी बन्दोबस्त गरेर राख्नू भन्ने जस्ता अभिव्यक्ति दिएर उनले समाजलाई भ्रमित पार्दै आएका थिए।
सामाजिक सञ्जालमा भाइरल भइरहेका उनका अभिव्यक्ति पत्याएर धेरैमा डर र त्रास छाएको थियो।
त्यसबाहेक राजनीतिक तथा निजी क्षेत्रका सार्वजनिक व्यक्तित्वमाथि लाञ्छना लगाउने काम पनि उनले गर्दै आएका थिए। पुष्टि नभएका आधारहिन र भ्रमपूर्ण सूचना फैलाएर राज्यविरूद्ध भड्काउने अभिव्यक्ति पनि दिँदै आएका थिए।
उनका यी गतिविधि आसन्न निर्वाचन र शान्ति सुरक्षाका लागि चुनौतिपूर्ण रहेको विश्लेषण सरकारले गरेको थियो।
सरकारले उच्च निगरानीमा राखेको भए पनि प्रसाईंले सरकार र निर्वाचनविरूद्धका गतिविधि रोकेनन्। मंसिर ७ गते देशव्यापी आन्दोलन नै घोषणा गरे।
उक्त आन्दोलनले ठूलो सुरक्षा चुनौती उत्पन्न हुने आकलन गरेर सरकारले प्रसाईंलाई वार्तामा बोलायो।
कात्तिक २६ गते गृह मन्त्रालयमा भएको वार्तामा उनको समूह सहभागी भयो। उनी आफै भने सहभागी भएनन्।
'वार्तामा बोलाउँदा पनि आएनन्। आफू सिधै प्रधानमन्त्रीसँग मात्र वार्ता गर्ने भनेर समूहलाई पठाइदिएका थिए,' गृह स्रोतले भन्यो, 'त्यहाँ उनको समूहले २७ बुँदे मागपत्र अघि सारेको थियो।'
प्रसाईंको महाअभियानका प्रवक्ता रहेका माधव कल्पितको टोलीले पेस गरेको मागपत्रमा संविधान र प्रदेश खारेजी, बौद्ध किराँतसहित वैदिक सनातन धर्म सापेक्ष हिन्दु अधिराज्य र संवैधानिक राजसंस्थाको माग, ५ विकास क्षेत्र, १४ अञ्चल र ७५ जिल्ला कायम लगायत माग राखिएका थिए।
गृहमन्त्री अर्याल सहभागी उक्त वार्तामा माधव कल्पित लगायतलाई 'दल दर्ता गरी निर्वाचनमै सहभागी हुन' भनिएको स्रोत बताउँछ।
माधव कल्पित नै सभापति रहने गरी प्रसाईंको समूहले कात्तिक ३० गते निर्वाचन आयोगमा दल दर्ता गरिसकेका छन्।
यिनै घटनाक्रमपछि आइतबार बसेको केन्द्रीय सुरक्षा समितिको बैठकमा प्रसाईंको विषय उठेको थियो। निर्वाचनमा सेना परिचालनसहित प्रसाईंलाई पक्राउ गर्ने कि नगर्ने भन्नेबारे छलफल भएको स्रोतले जानकारी दियो।
त्यति बेला तत्काल पक्राउ नगर्ने कुरा भए पनि सोमबारको अभिव्यक्तिपछि राति नै पक्राउ गर्ने निधो भएको अधिकारीहरू बताउँछन्।
त्यसपछि भक्तपुरका एसपीको कमान्डमा अपराध अनुसन्धान कार्यालय सहितको टोली राति १० बजेतिर भक्तपुरस्थित प्रसाईंको घर पुगेको थियो। सबैजसो प्रहरी सिभिल ड्रेसमै थिए।
उनलाई २०८१ असोज ६ गते पक्राउ गर्न पुग्ने प्रहरी पनि त्यहाँ थिए। त्यति बेला प्रहरीलाई घर भित्र प्रवेश गर्न दिइएको थिएन। प्रवेश गर्न नदिएपछि प्रहरीले भर्याङ नै लिएर भित्र छिरेको थियो। सोमबार पनि यस्तै अवस्था आउनसक्ने भन्दै प्रहरीले भर्याङ लिएरै गएको थियो।
तर भर्याङ लगाउँदा लगाउँदै भित्रबाट ढोका खोल्न आएको प्रहरी स्रोत बताउँछ।
उनलाई जिल्ला प्रशासन कार्यालय काठमाडौंले चार दिन हिरासतमा राख्न अनुमति दिएको छ। प्रहरीले सार्वजनिक शान्तिविरूद्धको कसुरमा उनीमाथि अनुसन्धान थालेको जनाएको छ।
दुर्गा प्रसाईं चौथो पटक पक्राउ परेका हुन्।
सुरूमा आपत्तिजनक अभिव्यक्ति दिएको आरोपमा प्रहरीले २०८१ असोज ६ गते साइबर मुद्दामा पक्राउ परेका थिए। त्यसै वर्ष तत्कालीन प्रधानमन्त्री केपी शर्मा ओलीको कम्बोडियामा लगानी रहेको दाबी गरेपछि मंसिर ४ गते दोस्रो पटक पक्राउ परेका थिए।
तेस्रो पटकको पक्राउ चैत १५ गते काठमाडौंको तीनकुनेमा भएको घटनासँग सम्बन्धित थियो। दुई जनाको ज्यान जाने गरी भएको उक्त घटनामा उनी मुख्य अभियुक्त थिए। उक्त घटनापछि फरार भएका प्रसाईंलाई प्रहरीले भारतको असमबाट पक्रेर ल्याएको थियो।
त्यति बेला जिल्ला अदालत काठमाडौंले ज्यानसम्बन्धी कसुर, आपराधिक उपद्रव कसुर र संगठित अपराध कसुरमा पुर्पक्षका लागि थुनामा पठाउन आदेश दिएको थियो। पछि उच्च अदालत पाटनले २५ लाख रूपैयाँ धरौटीमा छाड्न आदेश दियो।
त्यसपछि छुटेका उनी फेरि अराजक गतिविधिमा लागेको भन्दै प्रहरीले अहिले चौथो पटक पक्राउ गरेको हो।
***
यी पनि पढ्नुहोस्:
दुर्गा प्रसाईंलाई समाउन घर चढ्ने भर्याङ लिएर गएको थियो प्रहरी
दुर्गा प्रसाईं चौथो पटक पक्राउ– पहिले आसामबाट ल्याइयो, त्यसअघि भर्याङ हालेर पस्नुपर्यो घरभित्र
-1746009348.jpg)
