बाराको सिमरामा एमाले कार्यकर्ता र जेनजी समूहबीच बुधबार भएको झडपपछि उत्पन्न तनाव साम्य पार्न जिल्ला सुरक्षा समिति बारा र मधेस जेनजी समूहबीच वार्ता सुरू भएको छ।
जितपुर सिमरा उपमहानगरपालिका-३ को पथलैयास्थित सशस्त्र प्रहरी कार्यालयमा वार्ता सुरू भएको जेनजी समूहका अगुवा कपिल खरेलले बताए।
यो वार्ता बिहीबार नै बस्ने भनिएको थियो। जिल्ला प्रशासन कार्यालय बाराले वार्तामा डाके पनि जेनजी समूहले बुधबार आफूहरूमाथि कुटपिट गर्ने मुख्य व्यक्ति अरविन्द साहलाई पक्राउ नगरेसम्म वार्ता नगर्ने अडान लिएका थिए।
प्रहरीले बिहीबार राति साहलाई पक्राउ गरेपछि जेनजी समूह वार्तामा बस्न राजी भएको हो।
खरेलका अनुसार वार्ताका लागि प्रमुख जिल्ला अधिकारी धर्मेन्द्रकुमार मिश्रसहित जिल्ला सुरक्षा समितिका सदस्यहरू आएका छन्।
यही घटना मिलाउन भन्दै युवा तथा खेलकुद मन्त्री बब्लु गुप्ताको नेतृत्वमा सुदन गुरूङ, शिव यादव लगायतको टिम बिहीबारै काठमाडौंबाट जनकपुर गएको थियो। उनीहरूले बिहीबार राति सिमराका आन्दोलनरत जेनजीहरूसँग कुराकानी गरी वार्ताको माहोल बनाएका थिए।
मन्त्री गुप्ता जनकपुरबाट काठमाडौं फर्किसकेका छन् भने सुदन गुरूङ, शिव यादव लगायतको टिम वार्तामा सहभागी हुन बारा आइरहेको खरेलले जानकारी दिए।
'हामीले यहाँ वार्ता सुरू गरेका छौं। उहाँहरू यतै आउँदै हुनुहुन्छ,' खरेलले भने, 'हामी कुराकानी अघि बढाउँछौं, उहाँहरू पछि जोडिनुहुन्छ।'
बुधबार जेनजी समूहलाई एमाले कार्यकर्ताले कुटपिट गरेको भन्दै प्रदर्शन र तोडफोड भएको थियो। स्थिति साम्य पार्न कर्फ्यू लगाउनुपरेको थियो।
त्यही तनावले बिहीबार पनि निरन्तरता पायो। प्रहरी र जेनजी प्रदर्शनकारीहरूबीच झडप हुँदा हवाई फायर र अश्रुग्यास प्रहार गर्नुपरेको थियो। केही प्रहरी र जेनजी युवा घाइते भएका थिए। झडपका कारण बिहीबार पनि कर्फ्यू लगाउनुपरेको थियो।
कर्फ्यूकै बीच जेनजी प्रदर्शनकारीले सडक आवागमन ठप्प पारेका थिए। जेनजी समूहले बुधबारको घटनामा आफूहरूमाथि कुटपिट गर्ने सात जनाविरूद्ध प्रहरीमा जाहेरी दिएका थिए। तीमध्ये दुई जनालाई बिहीबार पक्राउ गरिएको थियो।
जेनजीहरूले भने मुख्य व्यक्ति साह पक्राउ नपरेसम्म प्रदर्शन जारी राख्ने र वार्तामा नबस्ने अडान लिए।
वार्ताको विस्तृत विवरण आउन बाँकी छ।
-1746009348.jpg)
