नेपाल समाजवादी पार्टी (नयाँ शक्ति), जनार्दन शर्माको प्रगतिशील राष्ट्रिय अभियान र राष्ट्रिय स्वतन्त्र पार्टी (रास्वपा) परित्याग गरेका सन्तोष परियारबीच एकतापछि बनेको प्रगतिशील लोकतान्त्रिक पार्टी आइतबार घोषणा हुँदैछ।
काठमाडौंको प्रदर्शनीमार्गस्थित राष्ट्रिय सभागृहमा दिउँसो साढे १२ बजे पार्टी एकता घोषणा कार्यक्रम हुने नेता सुदन किराँतीले जानकारी दिए।
एकता घोषणा कार्यक्रमअघि शनिबार काठमाडौंमा नेताहरूबीच आन्तरिक छलफल भएको थियो, जहाँ नेतृत्व, विचारधारा, कार्यदिशा लगायत विषयमा छलफल भएको नेता किराँतीले जानकारी दिए।
उनका अनुसार पार्टीको नेतृत्व सामूहिक र समावेशी हुनेछ। नेतृत्व आलोपालो चल्ने पनि उनले बताए।
'एउटा अध्यक्ष मण्डल वा परिषद मानेर हामी क्लस्टरका आधारमा ५–६ जनाको नेतृत्व घोषणा गर्छौं। त्यसले नै कार्यकारी भूमिका निर्वाह गर्छ,' उनले भने।
पार्टीको संगठन नै नयाँ प्रकारको मोडलमा बनाएर जान लागिएको जानकारी दिँदै नेता किराँतीले भने, 'त्यो समावेशी पनि हुन्छ, सामूहिक पनि।'
पार्टीको केन्द्रीय सदस्य तत्काललाई १५१ सदस्यीय हुने सहमति भएको उनले जानकारी दिए। केन्द्रीय समिति चयन गर्दा पूर्वपार्टीको भनेर भागबन्डा हुने छैन।
'फिल्डमा जो जान सक्छ, ती व्यक्तिलाई समावेश गरिएको छ। केन्द्रीय समिति भनेर काठमाडौं घुमी हिँड्नेहरू समावेश हुँदैनन्। केन्द्रीय सदस्य पाइसकेपछि फिल्डमा पठाउने भन्ने सहमति भएको छ,' किराँतीले भने।
शीर्ष नेताहरू कार्यकारी जिम्मेवारीमा नरहे पनि केन्द्रीय समितिमा भने अटाउने उनले जानकारी दिए।
पार्टीको चुनाव चिह्न आँखा र झन्डा पनि आँखा अंकित राखिनेमा करिब सहमति जुटेको नेता किराँतीले जानकारी दिए।
पार्टीको मार्गनिर्देशक सिद्धान्त प्रगतिशील समाजवाद रहने उनले बताए।
'मार्क्सवाद र पुँजीवादका सकारात्मक कुराहरूलाई हामी अँगाल्छौं। लोकतन्त्र सहितको समाजवादतिर जान्छौं। हिजोको राज्यनियन्त्रित समाजवाद होइन, लोकतन्त्र सहितको समाजवाद पार्टीको सिद्धान्त रहनेछ,' उनले भने, 'त्यो हिजोको जस्तो राज्यनियन्त्रित पुँजीवाद हुने छैन। यसलाई अझै प्रगतिशील समाजवाद भन्न सकिन्छ।'
माओवादी केन्द्रले १० वटा वाम घटकसँग एकता गरी नेपाली कम्युनिस्ट पार्टी गठन गर्दा माओवाद छाडेको थियो। नेता जनार्दन शर्माले एकतामा असन्तुष्टि जनाएका कयौं विषयमध्ये माओवाद छाडेको विषय पनि एक थियो। त्यसलाई प्रगतिशील लोकतान्त्रिक पार्टीले पनि छाडेको हो भनेर हामीले नेता किराँतीलाई सोधेका छौं।
'वामपन्थी वा कम्युनिस्ट शब्द राख्ने कि नराख्ने भन्ने खास विषय होइन र समस्या पनि होइन। मार्क्सवाद र पुँजीवादका सकारात्मक कुरा समेटेर प्रगतिशील समाजवादमा जान्छौं,' उनले भने।
'लोकतान्त्रिक गणतन्त्र भनेर हामीले चुनुवाङ बैठकबाट अख्तियार गर्यौं। लोकतान्त्रिक गणतन्त्रको बाटोबाट पुगिने त त्यहीँ नै हो। तर राज्यनियन्त्रित समाजवाद होइन। त्यही कुरा अंगीकार गरेपछि कसरी छाडेको हुन्छ?' उनले भने।
बरू अहिले सरकारमा जाँदा नीति तथा कार्यक्रम र बजेटमा कुनै सीमा र साँध नराखी पुँजीवादी अर्थतन्त्र अँगालेको उनको भनाइ छ।
'त्यस कारण पुँजीवादी अर्थतन्त्रमा पनि फेल भएको विषय छानेर त्यसका सकारात्मक कुरा अंगीकार गर्छौं र मार्क्सवादका वैज्ञानिक पक्ष आत्मसात गर्छौं,' उनले भने।
जुनसुकै वाद भने पनि त्यसले अन्यायको अन्त्य गर्नुपर्छ भन्ने भएकाले सबै खालको अन्याय अन्त्य गर्ने र लोकतन्त्र सहितको समाजवाद निर्माण गर्ने गरी पार्टीलाई अघि बढाउने उनले बताए।
पार्टी घोषणापछि महाधिवेशन भने परिस्थिति हेरेर तय गरिने किराँतीको भनाइ छ।
***
-1763886130.jpeg)
-1746009348.jpg)
