नेकपा (एमाले) का अध्यक्ष केपी शर्मा ओलीले आसन्न ११ औं महाधिवेशनमा पार्टीको नीतिमा छलफल नहुने दोहोर्याएका छन्।
वरिष्ठ उपाध्यक्ष ईश्वर पोखरेल सहितका नेताहरूले भदौ २३ र २४ को परिवर्तनपछि त्यो घटना समेतको वस्तुपरक समीक्षा हुनुपर्ने खाँचो औंल्याइरहेका बेला ओलीले छलफल नै नहुने बताएका हुन्।
‘तीन महिनाअगाडि मात्रै विधान महाधिवेशन गरेर नीतिमा छलफल भएको छ। हाम्रो इतिहास, हाम्रा काम, हाम्रा सफलताहरू, कमीकमजोरी, सबै समीक्षा गरेका छौं। हाम्रा राजनीतिक प्रस्ताव, राजनीतिक प्रतिवेदन प्रस्ताव पारित गरिसकेका छौं। संगठनको अवस्था, परिस्थिति के छ कसो छ छलफल भइसकेको छ। अहिले त्यसमाथि, संगठनात्मक नीतिमा कुनै परिवर्तन गर्नुपर्ने आवश्यकता छैन। भर्खरै महाधिवेशनले गरेको छ,’ आइतबार पार्टीको लोगो सार्वजनिक गर्दै अध्यक्ष ओलीले भने।
अध्यक्ष ओलीले राजनीतिक प्रतिवेदनमा कुनै हेरफेर गरिरहनुपर्ने अवस्था रहेको बताएका छन्।
‘किनभने भर्खरै महाधिवेशनले गरिसकेको छ। विधानमा धेरै ठूलो हेरफेर गर्नुपर्ने छैन। केही सानातिनो गर्नुपर्ने रहेछ भने महाधिवेशनले छोटो विधिबाट गर्नेछ, त्यसमा लामो छलफल हुँदैन।छोटो विधिबाट हामी टुंग्याउन सक्छौं। त्यस महाधिवेशन ती संगठनात्मक संरचना, नीतिलाई अघि बढाउने नेतृत्व छान्नुपर्नेछ। त्यो काम गर्नेछ,’ उनले भने, ‘त्यसमा कुनै प्रकारको असहमति राख्नुपर्ने, कुनै ठाउँ पनि छैन आवश्यकता पनि छैन।’
-1746009348.jpg)
