नेपाली कांग्रेसका नेताहरू विमलेन्द्र निधि र कृष्णप्रसाद सिटौला पनि चुनावअघि महाधिवेशन गर्न तयार भएका छन्।
सभापति शेरबहादुर देउवा र कार्यवाहक सभापति पूर्णबहादुर खड्कासँग आज भेटेर कुराकानी गरेपछि निधि, सिटौलासहित सभापति देउवा पक्षका केही नेताहरू पुसभित्रै १५ औं महाधिवेशन कार्यतालिका ल्याउन तयार भएका हुन्।
निधि, सिटौला, विजयकुमार गच्छदार, सीता गुरूङ, किरण पौडेल, कुन्दनराज काफ्ले, गुरू बराललगायत नेताहरूले सुरूमा कार्यवाहक सभापति खड्कासँग कुराकानी गरेका थिए। त्यसपछि उनीहरू सभापति देउवालाई भेट्न निवासमा गएका थिए।
‘हामीले कार्यवाहक सभापति र सभापतिज्यूसँग कुराकानी गर्यौं, पुसभित्रै १५ औं महाधिवेशन गर्ने कार्यतालिका कार्यवाहक सभापतिजीले आजको केन्द्रीय समितिमा पेस गर्दै हुनुहुँदो रहेछ, हामीले सहमति जनाएका छौं,’ निधिले सेतोपाटीसँग भने।
पूर्वमहामन्त्रीद्वय शशांक कोइराला र प्रकाशमान सिंहकोसमेत सहमतिमा आफूहरू पुसभित्रै महाधिवेशन गर्न तयार भएको पनि उनले जानकारी दिए।
‘कार्यवाहक सभापतिजीले हामीलाई पार्टी कार्यालय सानेपामा कुरा गर्नुभएको हो। उहाँले सभापतिज्यूकै निर्देशनमा पुसका लागि कार्यतालिका ल्याउन लागेको र तपाईंहरूको सहयोग चाहियो भन्नुभयो, त्यसो हो भने सभापतिजीकहाँ हामी जान्छौं र उहाँसँगै कुरा गर्छौं भनेर सभापतिजीकै निवासमा गएर कुरा पनि गर्यौं,’ निधिले भने।
सभापति देउवाले अग्रसरता लिएर निकास दिन खोजेकोले त्यसलाई आफूहरूले समर्थन गर्न उनले बताए।
‘तपाईंले नै अग्रसरता लिएर निकास दिन लाग्नुभएको छ, त्यसलाई अहिले हामी समर्थन गर्छौं। तर निर्वाचनलाई प्राथमिकता दिने र निर्वाचनपछि महाधिवेशन गर्ने भन्ने धारणा थियो, त्यो विकल्प कायमै रहन्छ,’ सभापति देउवालाई भनेका कुरा उल्लेख गर्दै नेता निधिले भने, ‘अहिले तपाईंले निकाल्नुभएको समाधानलाई समर्थन छ भनेर आयौं।’
पुसको अन्तिम साता १५ औं महाधिवेशन गर्ने गरी कार्यवाहक सभापति खड्काले आजको केन्द्रीय समितिमा प्रस्ताव राख्ने र पारित गर्ने तयारी छ।
यसअघि पुसभित्रै नियमित महाधिवेशन गर्न सभापति, कार्यवाहक सभापति, उपसभापति धनराज गुरूङ, महामन्त्रीद्वय गगन थापा र विश्वप्रकाश शर्मा तथा नेता शेखर कोइराला, रमेश लेखक र बालकृष्ण खाण उभिएका थिए।
त्यसबेला नेताहरू निधि र सिटौलाले यसो भएमा नोट अफ डिसेन्ट लेख्ने बताएका थिए। त्यसैले उनीहरूसँग कार्यवाहक र सभापतिले कुराकानी गरेर पुसभित्रै महाधिवेशन गर्न सहमत गराएका हुन्।
फागुन २१ गतेको चुनावअघि महाधिवेशन गर्ने कि पछि भन्नेमा सभापति देउवानिकट केन्द्रीय सदस्यहरूको मत बाँडिएको थियो।
करिब ९० जना केन्द्रीय सदस्य चुनावपछि वैशाखमा महाधिवेशनका पक्षमा थिए भने २८ जना चुनावअघि महाधिवेशन गर्नुपर्ने पक्षमा थिए।
साथै ५४ प्रतिशत महाधिवेशन प्रतिनिधिहरूले असोज २९ गते कार्यवाहक सभापतिलाई हस्ताक्षर बुझाएर विशेष महाधिवेशन माग गरेका थिए।
त्यसअनुसार पुस २८ गतेभित्र विशेष महाधिवेशन गर्नुपर्ने हुन्छ। सोही अवधिमा नियमित महाधिवेशन गर्न शीर्ष नेताहरू तयार भएका हुन्।
केन्द्रीय समितिले छोटो समयको तयारीबीच नियमित महाधिवेशन गर्ने गरी कार्यतालिका ल्याउने र त्यसअनुसार कामहरू अघि बढेनन् भने विशेष महाधिवेशनको सम्भावना रहेको पनि नेताहरूले बताउँदै आएका छन्।
कांग्रेसमा करिब ९ लाख क्रियाशील सदस्यता रहेकोमा वडा तहमा अहिलेसम्म ६ लाख क्रियाशील नवीकरण भएको छ भने नयाँ क्रियाशील वितरण भएको छैन। अब कार्यतालिकामा क्रियाशील टुंगो लगाउनेदेखि ७ तहका अधिवेशन मिति पनि आउनेछ।
विशेष महाधिवेशन पक्षधरका नेता बलदेव तिमल्सिनाले निर्वाचनअघि नियमित महाधिवेशन छलफलको एक विकल्प रहेको बताएका छन्।
तर चुनावअघि महाधिवेशन सम्भव छैन भनेर कतिपयले आजसम्म आलटाल, अलमल र समय बर्बादी गरेको उनको भनाइ छ।
‘क्रियाशील सदस्यता फाइनल गरी क्रियाशील सदस्यले महाधिवेशन प्रतिनिधि निर्वाचित गर्ने र ती महाधिवेशन प्रतिनिधि मार्फत मंसिरभित्र नै केन्द्रीय महाधिवेशन सम्पन्न गर्न सक्ने अवस्था अझै छ,’ उनले भने, ‘यो बाटो अपनाउॅंदा केन्द्रीय समितिको म्याद थप्न पर्दैन। यो प्रक्रिया अपनाउॅंदा केबल २ तहको मात्र महाधिवेशन गर्दा हुन्छ। निर्वाचनको निम्ति उपयुक्त समय पनि मिल्नेछ। पार्टीको तल्लो तह पूर्ण रुपले चलायमान हुनेछ।’
-1746009348.jpg)
