शिक्षामन्त्री महावीर पुनले राष्ट्र,राष्ट्रियता, धर्म, संस्कृति र नागरिक बचाउ अभियानका संयोजक दुर्गा प्रसाईंलाई तथ्य बुझेर मात्रै कुरा गर्न सुझाव दिएका छन्।
२० लाखमुनिका ऋण मिनाह गर्ने, ६ लाख जनतालाई कालो सूचीबाट हटाउने, सेना प्रहरीको तलब मासिक १ लाखसम्म पुर्याउने प्रसाईंको अभिव्यक्तिप्रति लक्ष्य गर्दै मन्त्री पुनले तथ्य बुझेर मात्रै बोल्न आग्रह गरेका हुन्।
बजेट अभावकै कारण शिक्षकहरूलाई स्थानीय भत्ता र महँगी भत्ता खुवाउन नसकेको अवस्थामा ती ऋण मिनाह गर्ने कुरा हावादारी रहेको मन्त्री पुनले बताएका हुन्।
‘कति साह्रै हावा कुरा गरेको हाउ यो दुर्गा भाइले - शिक्षा मन्त्री भएर पैसाको अभावमा मैले धेरै शिक्षकहरूलाई स्थानीय भत्ता र महंगी भत्ता खुवाउन सकेको छैन,’ उनले भने।
छाना नभएर र कक्षा कोठा नभएर सहयोग माग्न आउने विद्यालयहरुलाई खाली हात फर्काउन परेकोदेखि शिक्षकको अभाव भएर एक जना भए पनि शिक्षक दिन अनुरोध गर्ने स्कुलहरुलाई शिक्षक पठाउने जगेडा बजेट सरकारसँग नभएको मन्त्री पुनले बताएका छन्।
‘६ लाख जनतालाई कालो सुची वाट हटाउने, सेना प्रहरीको तलब महिनाको १ लाख बनाउने र २० लाख रुपैयाँ भन्दा कमको ऋण मिनाहा गरिदिने काम कसरी गरिदिने?,’ उनले भनेका छन्।
उनले त्यस्ता कुरा गरेर जनता नझुक्याउन पनि आग्रह गरेका छन्।
‘१२ वर्षमा नेपाललाई दक्षिण एशियाको एकदमै धनी देश बनाउने र नेपाललाई सिंगापुर बनाउने भन्ने जस्ता हावा कुरा धेरैले गरेका थिए । यस्तो हावादारी कुरा गऱ्यो भने हाँसोको पात्र भइन्छ,’ उनले भने।
-1746009348.jpg)
