राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले मुलुकलाई संकटबाट जोगाउन 'राजा', राजनीतिक दल र जेनजी पुस्ताबीच समझदारी नयाँ समझदारी हुनुपर्ने बताएका छन्।
मंगलबार राप्रपाले रत्नपार्कमा गरेको कार्यक्रममा बोल्दै उनले प्रधानमन्त्री सुशीला कार्कीलाई निर्वाचनअघि नै 'राजा', राजनीतिक दल र जेनजी पुस्ताबीच सर्वपक्षीय सम्मेलन गरेर मुलुकलाई निकास दिने कामको नेतृत्व गर्न आग्रह गरेका हुन्।
‘म फेरि पनि भन्छु– यो समस्याको समाधान होइन। फागुन २१ गते अथवा यही व्यवस्था अन्तर्गत निर्वाचन गर्नु भनेको समस्यालाई अलि परतिर धकेल्ने कुरा मात्र हो। यो समस्याको समाधान होइन। यो भन्दा ठूलो ध्वस देशले व्यहोर्नुपर्ने हुनसक्छ। आज हामीले आवरणमा देखिएको मुद्दा र समस्या मात्रै होइन, आज जनताले महसुस गर्नेगरी देशको राज्य शक्तिको अवस्था के छ। र हामीले बारम्बार भन्दै आइरहेका छौं–नेपाली जनताको निर्णायकत्व नेपाली जनताको हातमा हुनपर्दछ,’ उनले भने।
देशलाई निकास दिनका लागि चुनावभन्दा अगाडि नै 'राजा', राजनीतिक दल र अहिले आन्दोलनले स्थापित गरेको शक्ति जेनजी नयाँ समझदारी कायम गरेर जानुपर्ने उनले बताए।
‘चुनावअघि नै यो नवीन समझदारी गरेर देशलाई निकास दिनुपर्दछ। राजा भनेको राष्ट्रिय एकताको प्रतिक हो। राजनीतिक दल भनेको लोकतन्त्र प्रजातन्त्रसँग सम्वद्ध र जेनजी पुस्ता भनेको हाम्रो भविष्य,’ उनले भने।
- न्युज एजेन्सी नेपाल
-1746009348.jpg)
