नेपाल पर्यटन बोर्डमा वरिष्ठ प्रबन्धकका रूपमा कार्यरत श्रद्धा श्रेष्ठ महिला, बालबालिका तथा ज्येष्ठ नागरिक मन्त्री नियुक्त भएकी छन्।
प्रधानमन्त्री सुशीला कार्कीले शुक्रबार थपेका चार जना मन्त्रीको सूचीमा उनको पनि नाम समावेश छ। श्रेष्ठसहित चारै जना नयाँ मन्त्रीले शुक्रबार अपराह्न साढे ३ बजे शपथ लिएका छन्।
पर्यटन पेसाकर्मी श्रेष्ठ करिब २० वर्षदेखि पर्यटन क्षेत्रमा संलग्न रहँदै आएकी छन्।
उनी पर्यटन बोर्डमा 'सस्टेनेबल टुरिजम' परियोजना प्रमुखका रूपमा कार्यरत छिन्। यो राष्ट्रसंघीय विकास कार्यक्रम (युएनडिपी) सँगको सहकार्यमा सञ्चालन भइरहेको परियोजना हो। यसले ग्रामीण र समुदायमा आधारित पर्यटनलाई जोड दिने लक्ष्य राख्छ।
श्रेष्ठलाई पर्यटन बोर्डमा जागिर खाँदाखाँदै मन्त्री नियुक्त गरिएको हो।
उनी लामो समयदेखि पर्यटन क्षेत्रमा आबद्ध रहँदै आएकी छन्। उनले पर्यटन बोर्डको ब्रान्ड प्रवर्द्धन र कर्पोरेट पार्टनरसिप प्रबन्धकका रूपमा विभिन्न मुलुकमा नेपालका पर्यटन गन्तव्यको प्रवर्द्धन गर्न भूमिका खेलेकी छन्।
त्यस्तै, नेपालका पर्यटन गन्तव्यहरू अन्तर्राष्ट्रिय जगतमा चिनाउन डिजिटल अभियान चलाउनुका साथै अन्तर्राष्ट्रिय पर्यटन मेलाहरूमा नेपालको प्रतिनिधित्व समेत गरेकी छन्।
कोभिड महामारी बेला उनी पर्यटन संकट समाधान टिमका एक मुख्य सदस्य थिइन्। उक्त टिमले कोभिड महामारी बेला पर्यटक क्षेत्रको उद्धार, पुनरूत्थान र पुनर्स्थापना कार्यक्रम अघि बढाएको थियो।
पोखराकी श्रेष्ठले अमेरिकाको मिसिगन विश्वविद्यालयबाट विकास अर्थशास्त्र र अन्तर्राष्ट्रिय विकासमा स्नातकोत्तर अध्ययन गरेकी छन्।
उनी ब्लगर र ब्रान्ड विशेषज्ञ पनि हुन्। पर्यटन क्षेत्रमा युवा सहभागिता र महिला उद्यमशीलतालाई प्रवर्द्धन गर्न उनले उल्लेखनीय भूमिका निर्वाह गरेकी छन्।
-1765533629.jpg)
-1763886130.jpeg)
-1746009348.jpg)
