नेकपा (एमाले)मा आगामी ५ वर्षका लागि नेतृत्व चयन हुँदैछ।
शनिबारदेखि तीन दिनसम्म चल्ने महाधिवेशनबाट नेतृत्व चयन हुँदैछ।
महाधिवेशन उद्घाटन समारोह भक्तपुरको सल्लाघारीमा सुरू हुँदैछ।
सल्लाघारीमा बिहानैदेखि नेता, कार्यकर्ता र प्रतिनिधिहरूको जमघट छ।
यसपालि पार्टी नेतृत्वका लागि हालसम्मको अवस्थामा वरिष्ठ उपाध्यक्ष ईश्वर पोखरेलले प्रतिस्पर्धा गर्ने देखिएको छ।
सेतोपाटीले महाधिवेशन स्थलमा उपस्थित केही प्रतिनिधिहरूसँग यसबारेमा कुराकानी गरेको छ।
एमाले बागमती प्रदेश कमिटी सदस्य ईश्वर अधिकारीले नेतृत्व चयन सौहार्द ढंगले हुनुपर्ने बताए।
'देशभरिबाट २२ सय प्रतिनिधि आएका छन्। नेतृत्वमा कसलाई ल्याउने भन्ने निर्णय उनीहरूले गर्छन्,' अधिकारीले भने।
व्यक्तिगत रूपमा आफू भने अहिलेको अवस्थामा केपी शर्मा ओली नै कायम हुनुपर्ने उनले बताए।
'अहिलेको परिस्थिति हेर्दा अध्यक्क्ष ओली नै उपयुक्त हुन्छ,' उनले भने।
राप्ति नगरपालिका चितवनबाट आएका पुरूषोत्तम आचार्यले पनि सबैको चाहना ओली नै नेतृत्वमा दोहोरिऊन् भन्ने रहेको बताए।
'सबैको चाहना ओली नै हुनुहुन्छ। उहाँ नै चाहिन्छ भन्ने छ। त्यसकारण नेतृत्व उहाँले नै गर्नुहुन्छ,' उनले भने।
उनले युवाशक्तिलाई माया गर्ने ओलीबाहेक अन्य नरहेको पनि बताए।
गुल्मीका केदारचन्द्र भूसाल ओली प्रधानमन्त्री हुँदा विकास निर्माणका कामहरू द्रूत गतिमा अगाडि बढेकाले ओली पुनः अध्यक्ष हुँदै प्रधानमन्त्री बन्नुपर्ने बताए।
यो महाधिवेशनले फेरि नेतृत्व निर्माण गर्छ र विगतमा भएका कामहरूलाई निरन्तरता दिँदै फेरि जनताबाटै अनुमोदन भएर सरकारमा आउनेछ,' उनले भने।
एक प्रतिनिधि केदार बस्नेतले जेनजी आन्दोलनपछिको परिस्थितिका कारण यसपालिको एमाले महाधिवेशन अरू बेलाकोभन्दा पृथक रहेको बताए।
दुवै नेता (ओली र पोखरेल) नेतृत्वको विषय भने प्रतिनिधिकै सुझबुझमा निर्भर रहने उनले बताए।
आफूले व्यक्तिगत रूपमा भने पोखरेलले यसपटक पार्टीको नेतृत्व गर्नुपर्ने उनले बताए।
'अहिलेको परिप्रेक्ष्यमा नेतृत्व परिवर्तन हुँदा राम्रो देखिन्छ। ओलीले असल सल्लाहकारको भूमिका निर्वाह गरी पार्टी चलाइदिए हुन्थ्यो भन्ने धारणा हो,' उनले भने।
गोरखाकी अन्जु केसी ओलीलाई नै नेतृत्वमा ल्याउनुपर्ने बताउँछिन्।
'उहाँले एमालेलाई अझै केही समय लिड गर्नुपर्छ,' उनले भनिन्।
सुर्खेतका एक प्रतिनिधिले भने सर्वसम्मत नेतृत्व चयन हुँदा राम्रो सन्देश जाने बताए।
यद्यपि निर्वाचन भए ओली बाहेक अरू विकल्प नहुने उनले बताए।
'अहिलेको अवस्थामा प्रहार थेग्न सक्ने केपी ओली मात्रै हो। अहिलेको विकल्प अरू हुनै सक्दैन,' उनले भने।
-1763886130.jpeg)
-1746009348.jpg)
