धादिङ जिल्ला समन्वय समितिको आज भएको निर्वाचनमा नेकपा(एमाले)का उम्मेदवारको पूरै समूह विजयी भएको छ ।
२६ मतदाता रहेको जिसस प्रमुखमा एमालेका जगन्नाथ नेपाल १७ मत प्राप्त गरी विजयी भएका हुन्। उनका निकटतम प्रतिद्वन्द्वी नेपाली काँग्रेस र नेकपा(माओवादी केन्द्र) गठबन्धनका तर्फबाट उम्मेदवार भएका काँग्रेसका भक्त लामाले ८ मत प्राप्त गरे । त्यसैगरी, उपप्रमुखमा एमालेका बिन्दा बरामु नेपाली १६ मत प्राप्त गरी विजयी भएकी छन् । उनका निकटतम प्रतिद्वन्द्वी काँग्रेस र माओवादी केन्द्र गठबन्धनका तर्फबाट उम्मेदवार भएका माओवादी केन्द्रका ध्रुव सुवेदीले ९ मत प्राप्त गरे ।
जिससका सदस्यमा एमालेकै कृष्ण अर्याल, खुनराज थापा, उर्मिला रेग्मी, कमलनारायण श्रेष्ठ, सान्नानी परियार, सावित्रा सुनार र उर्गेनवती तामाङ १६/१६ मत प्राप्त गरी विजयी भए।
विजयी उम्मेदवारलाई आजै मुख्य निर्वाचन अधिकृत भरत लम्सालले शपथ गराए । निर्वाचनपछि कार्यभार सम्हाल्दै जिससका प्रमुख जगन्नाथ नेपालले जिल्लाको विकास निर्माणलगायत कार्यमा स्थानीय सरकारलाई सहयोग पुर्याउने र विकासका निम्ति लागिपर्ने बताए । रासस
-1746009348.jpg)
