नेपालका लागि भारतीय राजदूत मन्जिव सिंह पुरीले प्रधानमन्त्री शेरबहादुर देउवाको आसन्न भारत भ्रमणमा जलविद्युतदेखि सडक सञ्जाललगायतका विषयमा छलफल हुने बताएका छन् ।
सोमबार राजधानीमा अायोजित एक कार्यक्रममा उनले सो कुरा बताएका हुन् । कार्यक्रममा बोल्दै उनले भने,‘प्रधानमन्त्री शेरबहादुर देउवाको आसन्न भारत भ्रमणको तयारी तीव्र गतिमा भइरहेको छ। भ्रमणमा जलविद्युत, रेल्वे, सडक र सम्पर्क सञ्जालजस्ता विषयमा छलफल र परामर्श हुनेछ ।’ भारतको सहयोगमा वा अन्य कुनै पनि जारी निर्माणाधिन परियोजना र कार्यान्यनवमा भ्रमणमा जोड दिइने उनले बताए ।
प्रधानमन्त्री देउवाको यो भ्रमण फलदायी र सफल हुन्छ भन्ने हाम्रो कामना र चाहना छ हामी सोही अनुसार तयारीमा लागेका छौँ। भ्रमणमा दुई पक्षीय हितका विषयमा कुरा हुने उनले बताए । नेपालले चाहेको सहयोग गर्न भारत सधै तयार रहेको भन्दै पुरीले भने, ‘नेपालले के चाहन्छ त्यसको लागि भारत सधै सहयोग गर्न तयार छ।’
नेपालमा सञ्चालन र निर्माणाधिन परियोजनामा अाफ्नो क्षमताले भ्याएसम्म साथ दिन तयार रहेको पुरीले बताए।
विगत केही दिनदेखि मुलुकको तराई क्षेत्रमा आएको बाढीका विषयमा उनले समस्या समाधानका लागि दुई देश बसेर छलफल गरेर टुंग्याउनुपर्ने बताए।
६ महिनाको बीचमा नेपाल र भारतबीचमा भएको उच्च स्तरीय भ्रमण संसारको कुनै पनि मुलुकमा नभएको भन्दै उनले यो सम्बन्ध प्रगाढ र सौहार्दपूर्ण भएको बताए।
भारतीय प्रधानमन्त्री नरेन्द्र मोदीको नेपाल भ्रमणबारे कुनैपनि टुंगो नभएको भन्दै उनले नेपाल सरकारको औपचारिक निमन्त्रणपछि मात्र मिति तय हुने हुने बताए।
‘मोदीको नेपाल भ्रमणबारे कुनै पनि टुंगो भएको छैन। नेपाल सरकारको औपचारिक आग्रह र निमन्त्रणा आएपछि छलफल गरेर अगाडिको मिति तय हुन्छ,’ उनले भने,‘तर प्रधानमन्त्री मोदी कुनै एउटा महत्वपूर्ण परियोजनाको शिलान्यासमा आउने कुरा भएको छ।’
-1746009348.jpg)
