जापान सरकारले विद्यालय क्षेत्र सुधार कार्यक्रम कार्यान्वयन गर्न २८ करोड २० लाख रुपैयाँ अनुदान उपलब्ध गराउने भएको छ ।
सहयोग उपलब्ध गराउनेसम्बन्धी समझदारी पत्रमा मङ्गलबार अर्थ मन्त्रालयमा आयोजित एक कार्यक्रममा अर्थ सचिव शान्तराज सुवेदी र नेपालका लागि जापानका राजदूत मासासी ओगावाले हस्ताक्षर गरे । साथै, उनीहरुले आ–आफ्नो देशको सरकारका तर्फबाट उक्त समझदारी पत्र आदान प्रदान गरे ।
उक्त सहयोगअन्तर्गत प्राप्त हुने अनुदानसम्बन्धी समझदारी पत्रमा भने अर्थ मन्त्रालयका सहसचिव एवम् अन्तर्राष्ट्रिय आर्थिक सहयोग समन्वयमा महाशाखाका प्रमुख बैकुण्ठ अर्याल र जाइकाका प्रतिनिधि जुन साकुमाले हस्ताक्षर गरे ।
त्यस अवसरमा राजदूत ओगावाले शैक्षिक विकासबाटै राष्ट्रनिर्माणको आधारशिला तयार हुने बताउँदै नेपालको गरिबी निवारण तथा विकासका प्रयासमा जापानले सहयोग गर्ने प्रतिबद्धता व्यक्त गरे ।
सचिव सुवेदीले जापान सरकारबाट निरन्तर प्राप्त सहयोगप्रति हार्दिक आभार व्यक्त गरे । रासस
-1746009348.jpg)
