भारतका सत्तारुढ र विपक्षी दलहरूले नेपालका प्रधानमन्त्री शेरबहादुर देउवाको भारत भ्रमणले दुई देशबीच विश्वासको वातावरण बनाउन सफल भएको भन्दै भ्रमण फलदायी भएको बताएका छन् ।
भारतका गृहमन्त्री राजनाथ सिंहले नेपालका प्रधानमन्त्री देउवाको भ्रमणले दुई देशबीच विश्वासको वातावरण बनाएको भन्दै भ्रमण सफल भएको निष्कर्षमा आफूहरूले निकालेको बताए । उनले नेपालको लोकतन्त्रलाई संस्थागत गर्ने उद्देश्यसहित हुन लागेका निर्वाचन तोकिएकै समयमा सफलता पूर्वक सम्पन्न होस् भन्ने भारतको चाहना रहेको सुनाउँदै निर्वाचन सफलता पूर्वक सम्पन्न गराउन नेपाल सरकारले चाहेको सबै खालका सहयोग गर्न भारत तयार रहेको बताए ।
यसैगरी, यातायात मन्त्री नितिन गडगडीले नेपालको सडक विस्तार र रेलमार्ग निर्माणमा भारतको सहयोग रहने बताउँदै पूर्वाधार विकासमा भारत सहयोग गर्न तयार रहेको बताए । ‘नेपालीले रेल चढ्न पाउनु पर्छ । काठमाडांैसम्म दिल्लीबाट रेल पुगोस् भन्ने हामी चाहन्छौ । हुलाकी राजमार्ग पनि बेलैमा निर्माण सम्पन्न हुन्छ - उनले भने ।’
सत्तारुढ भारतीय जनता पार्टीका वरिष्ठ नेता मुरलीमोहन जोसीले नेपालका प्रधानमन्त्रीको जारी भ्रमणले नेपाल र भारत सम्बन्धमा नयाँ आयाम थपेको भन्दै भ्रमणले दुई देशबीच विश्वासको वातावरण बनाउँदै सुखद सन्देश दिएको बताए ।
उनले नेपालको आर्थिक विकाससहित स्थायित्वको लागि भारतको सक्दो सहयोग रहने विश्वास व्यक्त गर्दै नेपालमा आएको बाढी डुबानबाट भारत चिन्तित रहेकोले यसको दिर्घकालीन समाधानको लागि भारतको सहयोग सधै रहने प्रतिबद्धता व्यक्त गरे ।
कांग्रेस आईका नेता गुलाम अली नवाजले नेपालका प्रधानमन्त्रीको भारत भ्रमणले सम्बन्धमा सकारात्मक वातावरण बनाएको भन्दै आफूहरू नेपालको संविधान लागू भई तोकिएकै मितिमा सबै निर्वाचन सम्पन्न होस् भन्ने चाहना व्यक्त गरे । उनले नेपाली जनताको बाढी र डुबानको समस्या समाधान हुनुपर्ने भन्दै त्यसको लागि सहयोग गर्न आफूहरु सकारात्मक रहेको प्रतिक्रिया दिए ।
भारतीय कम्युनिष्ट पार्टीका माक्र्सवादीका महासचिव सीताराम ऐचुरीले नेपालका प्रधानमन्त्री शेरबहादुर देउवाको भारत भ्रमण सफल भएको भन्दै यसले सम्बन्धमा रहेको दूरी घटाएको बताए ।
जनता दल यूनाईटेडका उपमहासचिव केसी त्यागीले देउवाको भारत भ्रमण सफल भएको भन्दै नेपाल र बिहारको साझा समस्या बाढी भएकोले त्यसलाई मिलेर दिर्घकालीन रुपमा समाधान गर्न संयुक्त संयन्त्र बनाइने बताए ।
उनले भने– ‘बाढी नेपाल र बिहारको साझा समस्या हो । देउवाजी बिहार जाँदै हुुनु हुन्छ त्यहाँ उहाँको भव्य स्वागत हुन्छ । मुख्य मन्त्री नितिस कुमारजीसँग यो विषयमा उहाहँरूबीच कुराकानी हुन्छ ।’
-1746009348.jpg)
