पूर्वभौतिक पूर्वाधार तथा यातायातमन्त्री रमेश लेखकले महाकाली नदीमा बन्ने चार लेनको पक्की पुल निर्माणस्थलको आज स्थलगत निरीक्षण गरेका छन् ।
भीमदत्तनगरपालिका–१२ ओदालीस्थित पुल निर्माणस्थलमा पुगेर उनले निरीक्षण गरेका हुन् ।
आठ सय मिटर लम्बाई रहेको सो पुल शिलान्यासका लागि भोलि बिहान प्रधानमन्त्री शेरबहादुर देउवा कञ्चनपुर आइपुग्ने कार्यक्रम तय भएको छ ।
कञ्चनपुर क्षेत्र नं– ४ का सांसदसमेत रहेका पूर्वमन्त्री लेखकले पुलसँगै निर्माण हुने ६ लेनको सडक निर्माणमा सहयोग पुर्याउन स्थानीयवासीसँग आग्रह गरे । यो पुल निर्माण भएपछि कञ्चनपुरको आर्थिक क्रान्तिको मार्ग प्रशस्त हुने विश्वास व्यक्त गर्दै उनले पुलसंँगै दोधारा चादँनीमा सुख्खा बन्दरगाहसमेत निर्माण हुने हुँदा यो पश्चिमको ठूलो व्यापारिक नाकाका रूपमा विकास हुने बताए ।
महाकाली नदीमा पक्की पुल निर्माणका लागि पूर्वमन्त्री रमेश लेखक लामो समयदेखि प्रयासरत थिए।
सरकारले पुल निर्माणका लागि चालू आर्थिक वर्षमा ९९ करोड ६५ लाख रुपैयाँ रकम विनियोजन गरेको छ । जसमध्ये १० करोड रुपैयाँ रकम पुलसँगै निर्माण हुने सडकका लागि जमिन मुआब्जामा खर्च गरिने भएको छ ।
तीन अर्ब २७ करोड ९३ लाख ३४ हजार रुपैयाँमा पुल निर्माणको सम्झौता भएको छ । निर्माण अवधि तीन वर्ष तोकिएको छ । रासस
-1746009348.jpg)
