तिम्रो जिन्दगी हरियाली बनोस्
तिम्रा जिन्दगीका सबै गह्राहरू
बारीहरू अनि बाझा रहेका खोरियासमेत
हराभरा बनोस्!
मुस्कुराउँदै डाँडाको पिपलुले पनि भनोस्
हरियो रङको शुभकामना!
होलीको शुभकामना!!
बिहानी पखको किरण जस्तै फैलियोस्
तिम्रो कान्ति दूर दूरसम्म
तिम्रो जिन्दगीमा उपलब्धिका
फलहरु लटरम्मै फलून्!
पहेँलै पाकेको फलले पनि भनोस्
पहेँलो रङको शुभकामना!
होलीको शुभकामना!!
तिमी निश्चल कञ्चन बन्नु
तिमीलाई छुँदा पनि सेतो रङ डराओस्,
मान्छे यहाँ जे पनि गर्न तयार छ्न्
मर्न र मार्न पनि!
सजग रहनु- तिमी अपवाद बन्नु
एक उत्कृष्ट उदाहरण बन्नु!
आकाशमा उड्ने परेवासँग मीत लगाउनु!
त्यही परेवाले पनि भनोस्
सेतो रङको शुभकामना!
होलीको शुभकामना!!
तिमी वीर बन्नु,
नेपाली भएकोमा गर्व गर्नु
पुर्खाले त्यसै बगाएका हैनन् रगत
स्वदेशमै स्वदेशकै उन्नतिमा लाग्नु
तिम्रो शरीरमा बग्ने रगतले पनि भनोस्
रातो रङको शुभकामना!
होलीको शुभकामना!!
मैले के शुभकामना दिउँ र?
झुल्कने इन्द्रेणीले सबै रङ बोकेर
तिम्रोसामू आएर
सबै रङ अर्पण गर्दै
देओस् सबै रङ्गको शुभकामना!
होलीको शुभकामना!
