दाङमा ट्रयाक्टर दुर्घटना हुँदा १८ जना घाइते भएका छन्।
तुलसीपुर सुकौरा सडकखण्ड अन्तरगत तुलसीपुर उपमहानगरपालिका वडा नं. १० राईखल्यानको मोडमा मंगलबार दिउँसो रा १ त १६७५ नम्वरको ट्रयाक्टर दुर्घटना हुँदा १८ जना घाइते भएको प्रहरीले जानकारी दिएको छ।
दुर्घटनाका १८ घाइतेमध्ये १६ जनालाई राप्ती अञ्चल अस्पताल तुलसीपुरको प्रारम्भीक उपचारपछि थप उपचारका लागि बाँकेको कोहलपुर मेडिकल कलेजमा ‘रेफर’ गरिएको छ। दुर्घटनामा परेका सबै तुलसीपुर उपमहानगरपालिका वडा नं. १० बनगाउँ निवासी रहेको ईलाका प्रहरी कार्यालय तुलसीपुरका प्रमुख एवं डिएसपी प्रकाश सापकोटाले जानकारी दिए।
उनीहरू तुलसीपुर बजारमा माघीको अवसरमा नाच्नका लागि आउँदै गरेका बेला दुर्घटनामा परेका थिए। दुर्घटनामा परेका चालक लगायत सबैले मदिरा सेवन गरेको खुल्न आएको प्रहरीले बताएको छ।
माघीको अवसरमा मनोरञ्जन गर्न र नाचगान गर्न बजार आउँदै गरेका एउटै गाउँका थारु समुदायका व्यक्तिहरू दुर्घटनामा परेको प्रहरीले बताएको छ। घाइतेमध्ये दुईजनाको राप्ती अञ्चल अस्पताल तुलसीपुरमा उपचार भइरहेको छ ।
