शंकराचार्य निश्चलानन्द सरस्वतीलाई टुँडिखेलमा नागरिक अभिनन्दन (भिडियो रिपोर्ट र तस्बिरमा)

नारायण महर्जन

काठमाडौं, जेठ १

जगन्नाथपुरीस्थित पूर्व यामना ऋग्वेद गोवद्र्धन मठका शंकराचार्य निश्चलानन्द सरस्वतीलाई टुँडिखेलमा नागरिक अभिनन्दन गरिएको छ।

नेपालको साताव्यापी धार्मिक यात्रामा आएका उनलाई मंगलबार प्रधानमन्त्री केपी शर्मा ओलीले अभिनन्दन गरेका हुन्। नागरिक अभिनन्दनपछि उनले टुँडिखेलमा प्रवचन दिएका थिए।

प्रधानमन्त्री केपी शर्मा ओलीले मंगलबार काठमाडौंको टुँडिखेलमा आयोजित धार्मिक प्रवचन कार्यक्रममा जगतगुरु निश्चलानन्द सरस्वतीको नागरिक अभिनन्दन गरेका हुन्। जगत गुरु शंकराचार्यलाई हिन्दु धर्म दर्शनको सबैभन्दा विद्धानको रुपमा लिइन्छ । यसै अवसरमा बोल्दै प्रधानमन्त्री ओलीले सबै धर्मले विश्व शान्ति, मित्रता र सदभाव चाहेको स्पष्ट पारे। उनले ‘सबै मानव सुखी रहून’ भन्ने सबै धर्मको उद्देश्य रहेको पनि स्मरण गराए। प्रधानमन्त्री ओलीले महाभारतमा अन्यायको नाश गर्न गरिएका प्रयासहरुको वर्णन गर्दै समयक्रममा सबै धर्मले क्रोधमुक्त हुन आह्वान गरेको पनि उल्लेख गरे।

प्रधानमन्त्री ओलीले १० दिने नेपाल भ्रमणका लागि आईतबार काठमाडौं आइपुगेका जगतगुरु शंकराचार्यलाई नेपालमा आउनु भएको पनि आभार व्यक्त गरेका थिए।

जगतगुरु शंकराचार्यद्धारा लिखित धर्मदर्शन पुस्तकमध्ये १ सय ६१ वटा पुस्तक विश्व विख्यात छन । उनी सन १९९२ देखि जगतगुरु शंकराचार्य बनेका हुन्। नेपाल बसाईको क्रममा उनले पशुपतिनाथको पूजाआराधनाका अलावा चितवन, हेटौडा र वीरगंजमा पनि आध्यामिक यात्रा गर्ने कार्यक्रम तय गरिएको छ।

जेठ २ गते बुधबार त्रिभुवन विश्वविद्यालय संस्कृत विभागले कीर्तिपुरस्थित स्मृति हलमा आयोजना गर्ने कार्यक्रमलाई शंकराचार्य निश्चलानन्द सरस्वतीले सम्बोधन गर्ने कार्यक्रम तय भएको छ।

जेठ ४ गते भरतपुर र ६ गते वीरगञ्जमा आयोजना हुने कार्यक्रममा पनि उनले प्रवचन गर्नेछन्। आद्य शंकराचार्यले बसालेका चार मठमध्ये गोवद्र्धन मठ एक हो । अन्य तीन मठमा श्रृंगेरी, द्वारका र ज्योतिर्मठ छन् । निश्चलानन्द गोवद्र्धन मठका १४५औँ शंकराचार्य हुन् ।

यसअघि विसं २०५४ मा तत्कालीन उपप्रधान एवं गृहमन्त्री वामदेव गौतमको निमन्त्रणामा जगद्गुरु शंकराचार्य जयेन्द्र सरस्वती नेपालको धार्मिक यात्रामा आएका थिए। यसपटक पशुपति क्षेत्र विकास कोष र नेपाल पर्यटन बोर्डले शंकराचार्य निश्चलानन्द सरस्वतीलाई धार्मिक पर्यटनका लागि नेपाल आमन्त्रण गरेका हुन् ।

अघिल्लो वर्ष माघमा जगतगुरु शंकराचार्यले पूर्वराजा ज्ञानेन्द्र शाहलाई आफ्नै पीठमा बोलाएर हिन्दु सम्राट घोषणा गरेका थिए।

https://youtu.be/qxkhDglQQ10

हेर्नुहोस् तस्बिरमा