महोत्तरीमा गए राति गोली चलेको छ। अज्ञात समूहले चलाएको गोली लागेर एक जना महिला घाइते छिन्।
लोहारपट्टी नगरपालिका वडा नम्बर ६ मा गोली चलेको हो। स्थानीय रामशरण साहको घरमा करिब ५/६ जनाको समूहमा आएका लुटेराको समूहले गोली चलाएको प्रहरीले जनाएको छ।
उनीहरूले साहको घरमा लुटपाट पनि गरेका छन्। नगदसहित करिब एक लाख बराबरको सामान चोरी गरेर उक्त समूहले गोली चलाएको थियो।
घरमा लुटपाट भएपछि साहकी श्रीमती ४५ वर्षीय गायत्रीदेवी साहले हारगुहार मागेकी थिइन्। त्यसपछि लुटेराहरूको समूहले उनीमाथि गोली चलाएको प्रारम्भिक अनुसन्धानबाट खुलेको प्रहरीले जनाएको छ।
जिल्ला प्रहरी कार्यालय महोत्तरीका प्रहरी नायब उपरीक्षक प्रकाश विष्टले गोली लागेर घाइते भएकी साहको जनकपुरस्थित प्रादेशिक अस्पतालमा उपचार भइरहेको सेतोपाटीलाई बताए।
घटनामा संलग्नहरूको खोजि भइरहेको उनले बताए।
