उदयपुरमा गाडीबाट खस्दा एक जनाको मृत्यु भएको छ।
मंगलबार बिहान ९ बजे उदयपुरगढी गाउँपालिका-५ स्थित गाडी दुर्घटना हुँदा एक जनाको मृत्यु भएको जिल्ला प्रहरी कार्यालयका प्रहरी नायब उपरीक्षक बेदप्रसाद गौतमले जानकारी दिए।
ना ३ ख ७९४४ नम्बरको गाडी भित्री सडकखण्ड हुँदै उदयपुरगढीबाट गाईघाट जाँदै थियो। त्यही बेला त्यस गाडीमा सवार सोही ठाउँका ५० वर्षीय कृष्णबहादुर राई झर्न खोजेका थिए।
झर्नेक्रममा लडेर सोही गाडीको पछाडिको चक्काले किचेर घटनास्थलमै मृत्यु भएको प्रहरी नायब उपरीक्षक गौतमले बताए।
प्रहरी चौकी उदयपुरगढीबाट खटिएको प्रहरी टोलीले घटनास्थल सुरक्षित राखेको बताएको छ।
थप अनुसन्धान तथा कानुनी प्रक्रियाको लागि जिल्ला प्रहरी कार्यालय उदयपुरबाट प्रहरी निरीक्षकको टोली खटिएको छ।
गाडी चालक रौतामाई गाउँपालिका-७ बस्ने ४० वर्षीय राजनकुमार राउतलाई प्रहरीले नियन्त्रणमा लिएको बताएको छ।