काठमाडौंको सानोभर्याङस्थित काष्ठ उद्योगमा लागेको आगलागीबाट २० लाख रुपैयाँ भन्दा बढीको क्षति भएको छ।
काठमाडौं महानगरपालिका–१५ सानोभर्याङस्थित काष्ठ उद्योगमा मंगलबार राति आगलागी भएको थियो।
राति ९ बजे पृथ्वीबहादुर थापाले सञ्चालन गरेको इचङ्गुनारायण काष्ठ उद्योगमा एक्कासि आगलागी हुँदा उक्त रकम बराबरको क्षति भएको हो।
जिल्ला प्रहरी परिसर काठमाडौंका प्रवक्ता प्रहरी उपरीक्षक नवराज अधिकारीले एक घण्टासम्म लागेको आगलागी तीन दमकलको सहायतामा नियन्त्रणमा लिइएको जानकारी दिए।
आगलागी भएलगत्तै नेपाल प्रहरी र सशस्त्र प्रहरी बलको टोली घटनास्थलमा पुगेर आगलागी नियन्त्रणमा ल्याएको थियो। विद्युत् ‘सर्ट’बाट आगलागी भएको थियो।
