काठमाडौं महानगरपालिकाले दरबारमार्गको फुटपाथमा ग्रानेट बिछ्याएसँगै सामाजिक सञ्जालमा बहस सुरू भएको छ। धेरैले यस्तो ग्रानेट चिप्लो हुने भएकाले बर्खामा हिँड्न गाह्रो हुने बताइरहेका छन् भने कतिले फुटपाथ राम्रो भएको भन्दै प्रशंसा गरेका छन्।
महानगरपालिकाले दरबारमार्गमा राखेको ग्रानेट कस्तो हो त? के यो चिप्लिने खालको ग्रानेट हो?
हामीले यही प्रश्न महानगरको सार्वजनिक निर्माण विभागका निर्देशक सुरेशकुमार राईलाई सोधेका छौं।
उनका अनुसार दरबारमार्गमा बिछ्याइएको ग्रानेट चिप्लिने खालको होइन।
'ग्रानेट भन्नासाथ चिप्लिने भुइँ भन्ने हाम्रो मानसिकता छ,' उनले भने, 'तर त्यसो होइन। ग्रानेट स्लिपरी (चिप्लिने) र नन-स्लिपरी (नचिप्लिने) दुई किसिमको हुन्छ। हामीले हालेको नचिप्लिने किसिमको हो।'
लन्डन, न्यूयोर्क लगायत संसारका ठुल्ठूला सहरमा यस्तो खालको नन-स्लिपरी ग्रानेट प्रयोग गरिएको र कहीँ पनि पैदलयात्रु चिप्लिने घटना नभएको उनले बताए।
दरबारमार्गमा बिछ्याइएको ग्रानेटको लागत ५ करोड १४ लाख भएको उनले जानकारी दिए।
निर्देशक राईका अनुसार मेयर बालेन शाहको नेतृत्वमा दरबारमार्गको फुटपाथमा ग्रानेट बिछ्याउने काम भएको हो।
'भिआइपी एरिया भएकाले दरबारमार्गलाई युरोपेली स्तरमा बनाउन पाए हुन्थ्यो भन्ने उहाँको योजना थियो,' उनले भने, 'त्यसैअनुरूप काम भइरहेको छ।'
काठमाडौंका अन्य ठाउँमा पनि यस्तै ग्रानेट बिछ्याउने योजना छ त भन्ने प्रश्नमा उनले दरबारमार्गमा मात्र यो योजना रहेको बताए।
महानगरको सार्वजनिक निर्माण विभागका प्रमुख सुरज शाक्य पनि १६ एमएमको उच्च गुणस्तरयुक्त ग्रानेट बिछ्याउने काम भइरहेको बताउँछन्।
महानगरले नारायणहिति संग्रहालय अगाडिको महानगर प्रहरी वृत्तदेखि महेन्द्र शालिकसम्म दुवैतर्फको फुटपाथमा ग्रानेट बिछ्याउने काम गरिरहेको छ। यहाँ पैदल मार्गको चौडाइ कम्तिमा ३ मिटरदेखि बढीमा ६ मिटरसम्म छ।
फेसबुक, ट्विटर लगायतका सामाजिक सञ्जालमा ग्रानेटमा हिँड्न धेरै गाह्रो हुने भन्दै आलोचना गरिएको छ। कतिपयले ढुंगा वा इँटाको सट्टा ग्रानेट बिछ्याउँदा सहरको मौलिक शैली हराएको पनि बताएका छन्। ग्रानेट हाल्दा जमिनले पानी सोस्न नपाउने भन्दै आलोचना पनि गरिएको छ।
कतिपय सामाजिक सञ्जाल प्रयोगकर्ताले भने ग्रानेट बिछ्याएर दरबारमार्गलाई थप आकर्षित बनाएको भन्दै महानगरको प्रशंसा गरेका छन्।
