विश्व साइकल दिवसको अवसरमा शनिबार 'स्वच्छ हावा र साइकल यात्रीको सुरक्षित सडक अधिकारका लागि साइकल र्याली' आयोजना गरियो।
नेपाल साइकल सोसाइटीको संयोजकत्वमा विभिन्न साइकल संस्था र अभियानकर्ताहरूको सामूहिक नेतृत्वमा उक्त कार्यक्रम आयोजना गरिएको हो।
नेपाल विद्युत प्राधिकरणका पूर्वकार्यकारी निर्देशक कुलमान घिसिङ र कलाकार मदनकृष्ण श्रेष्ठले झन्डा फहराएर उद्घाटन गरेको कार्यक्रममा झरीका बाबजुद करिब ८०० साइकल यात्री सहभागी थिए।
र्याली वसन्तपुरबाट सुरू भई जमल, त्रिपुरेश्वर, कुपन्डोल, जाउलाखेल, बल्खु, चोभार, कीर्तिपुर, कालिमाटी, भिमसेनस्थान हुँदै फेरि वसन्तपुरमा समापन भएको थियो। र्यालीको दुरी करिब १८ किलोमिटर थियो।
पछिल्लो समय काठमाडौं विश्वकै सबभन्दा वायु प्रदूषित सहरहरूमध्ये एक बन्दै गएको छ। यो समस्याको दीगो समाधानका लागि सरकारी निकायहरूको प्रभावहीन प्रयास र असंवेदनशीलताले वायु प्रदूषणजस्ता जटिल समस्या नयाँ पुस्तामा हस्तान्तरण भइरहेको साइकल सोसाइटीले जनाएको छ।
सरकार र समाज यो समस्याप्रति संवेदनशील भएर दीर्घकालीन समाधानमा लाग्न प्रेरित होस् भनी कार्यक्रम आयोजना गरिएको सोसाइटीको भनाइ छ।
यस सन्दर्भमा साइकल एलायन्सले उपत्यकाव्यापी साइकल लेन र पूर्वाधार विकासका लागि गुरूयोजना तयार गरी कार्यान्वयनमा ल्याउन सरकारसँग माग गरेको छ। नेपालको सन्दर्भ र आवश्यकताअनुसार 'राष्ट्रिय साइकल दिवस' घोषणा गर्न पनि माग गरिएको छ।
कार्यक्रममा प्रमुख अतिथि उपप्रधान तथा सहरी विकास मन्त्री प्रकाशमान सिंहसमक्ष यी माग राखिएका थिए।
