अमेरिकी सेनाका एक अधिकारीले सैन्य शिविरभित्रै आफ्ना सहकर्मीमाथि अन्धाधुन्ध गोली चलाएका छन्।
अमेरिकाको जर्जिया राज्यको फोर्ट स्ट्युवार्ट सैन्य शिविरमा बुधबार एक जना सैनिकले आफ्ना साथीहरूमाथि नै गोली चलाएका हुन्।
अन्तर्राष्ट्रिय समाचार संस्था एशोशिएटेड प्रेस (एपी)का अनुसार शिविर भित्रै भएको गोलीकाण्डमा पाँच जना घाइते भएका छन्।
गोली २८ वर्षीय कोर्नेलियस र्याडफोर्डले चलाएका हुन्। उनी सर्जेन्ट पदमा कार्यरत रहेको एपीको समाचारमा उल्लेख छ।
उनले शिविरभित्र गोली चलाएर पाँच जना सैनिकहरूलाई घाइते तुल्याएका छन्।
घटनालगत्तै उनलाई नियन्त्रणमा लिइएको शिविरका ब्रिगेडियर जनरल जोन लुबासलाई उद्धृत गरेर एपीले लेखेको छ।
र्याडफोर्डले शिविरमा भएको बन्दुकले नभई व्यक्तिगत हतियार प्रयोग गरेर आक्रमण गरेका हुन्।
'र्याडफोर्ड आफै कार्यरत रहेको ठाउँमा गोली चलाएका थिए। तर उनको उद्देश्य के थियो भन्ने कुरा अहिले स्पष्ट छैन, थ्रीड इन्फेन्ट्री डिभिजनका कमाण्डर रहेका ब्रिगेडियर जनरल लुबासले एपीसँग भनेका छन्।
घाइतेहरूलाई तत्काल अस्पताल पुर्याइएको थियो। पाँच जनामध्ये तीन जनालाई शल्यक्रिया गरिएको सेनाले जनाएको छ। उनीहरू सबैको स्वास्थ्य अवस्था स्थिर रहेको पनि बताइएको छ।
घटनापछि शिविर करिब एक घन्टा बन्द गरिएको थियो। त्यसपछि गेटहरू सामान्य रूपमा खोलिएका थिए।
कमाण्डर लुबासले त्यहाँ रहेका अन्य सैनिकहरूले आक्रमणकारीलाई तत्काल नियन्त्रणमा लिएर थप क्षति हुनबाट जोगाएका थिए। 'उनीहरूको साहस प्रशंसनीय छ,' उनले भनेका छन्।
र्याडफोर्ड सन् २०१८ मा अमेरिकी सेनामा भर्ना भएका थिए। उनी ‘सप्लाइ सर्जेन्ट’ पदमा कार्यरत थिए। उनी हालसम्म कुनै विदेशी मिसनमा गएका छैनन्।
उनीमाथि यसअघि पनि आरोप लागेको थियो।
गत मे १८ मा राति १ बजे हाइन्सभिल भन्ने सानो सहरमा उनी मदिरा सेवन गरेर गाडी चलाएको आरोपमा पक्राउ परेका थिए।
त्यसबेला उनले ट्राफिक नियम उल्लंघन गर्दै रातो बत्ती पार गरेका थिए। त्यतिबेला उनलाई १ हजार ८१८ डलर धरौटीमा रिहा गरिएको थियो।
उनका वकिल स्नेह पटेलले गोलीकाण्डबारे कुनै प्रतिक्रिया दिएका छैनन्।
राष्ट्रपति डोनाल्ड ट्रम्पले घटनापछि ह्वाइट हाउसमा पत्रकारहरूसँग कुरा गर्दै आक्रमणकारीलाई 'घृणित व्यक्ति' भनेका छन्।
एफबीआईका उप–निर्देशक ड्यान बोनजिनोका अनुसार संघीय अनुसन्धान ब्युरो (एफबिआई) पनि घटनाको अनुसन्धानमा संलग्न छ।
फोर्ट स्ट्युवार्ट अमेरिका पूर्वी क्षेत्रमा पर्ने सबैभन्दा ठूलो सैन्य शिविर हो।
जहाँ हजारौं सैनिक र उनीहरूका परिवार बसोबास गर्छन्। सन् २०१६ मा स्थापना गरिएको यो 'स्पार्टन ब्रिगेड' सेनाको सबैभन्दा आधुनिक जमिनी लडाइँ इकाइ मानिन्छ।
सैन्य शिविरहरूलाई सामान्यतया सर्वाधिक सुरक्षित स्थान मानिँदै आएको भए पनि यस्ता घटना पटक–पटक दोहोरिंदै आएको भनेर एपीले लेखेको छ।
सन् २००९ मा टेक्सासको फोर्ट हुडमा एक सैन्य चिकित्सकले गोली चलाउँदा १३ जनाको मृत्यु भएको थियो। २०१३ मा वाशिङ्टन नेभी यार्डमा एक पूर्वसैनिकले १२ जनाको हत्या गरेका थिए। यस्तै २०१९ मा फ्लोरिडाको नेवल एयर स्टेसनमा भएको गोलीकाण्डमा तीन जनाको मृत्यु भएको थियो।
यसरी फोर्ट स्ट्युवार्टमा भएको पछिल्लो घटनाले फेरि एक पटक अमेरिकी सैन्य संस्थाहरूभित्रकै सुरक्षा व्यवस्थाप्रति गम्भीर प्रश्न खडा गराएको छ।
सेनाले यसबारेमा विस्तृत अनुसन्धान अघि बढाएको जनाएको छ।
-1746009348.jpg)
