साइबर मुद्दामा राष्ट्रिय स्वतन्त्र पार्टी (रास्वपा) का नेता अरनिको पाँडे र नेकपा (एमाले) का नेता ऐन महरलाई फरक व्यवहार गरिएको भन्दै आलोचना भएको छ।
सत्तारूढ एमालेका महर र प्रतिपक्षी रास्वपाका पाँडेलाई प्रहरी प्रशासनले फरक व्यवहार गरेको भन्दै सामाजिक सञ्जाल लगायतमा केही दिनदेखि आलोचना भइरहेको छ।
एमाले नेता महर र रास्वपा नेता पाँडेमाथि नेपाल प्रहरीको साइबर ब्युरोले विद्युतीय कारोबार ऐन २०४७ को दफा ४७ अनुसार अनुसन्धान गरेको हो।
रास्वपा केन्द्रीय सदस्य पाँडे आजसम्म प्रहरी हिरासतमा छन् भने एमाले नेता महर भने नियन्त्रणमा परेकै दिन छुटेका थिए।
उनीहरू दुवै जना भदौ ११ गते ब्युरोको नियन्त्रणमा पुगेका हुन्।
तर त्यही दिन सत्तारूढ दल एमालेका नेता महर छुटे भने रास्वपा नेता पाँडेलाई हिरासतमै राखेपछि उस्तै प्रकृतिको आरोपमा फरक व्यवहार गरेको भन्दै आलोचना भएको हो।
दुवै जनामाथि उस्तै प्रकृतिको मुद्दा लाग्दा एक जना छुट्ने र अर्का नछुट्ने अवस्था किन र कसरी आयो भनेर हामीले प्रहरी र सरकारी वकिलसँग कुरा गरेका छौं।
मुद्दाको प्रकृति र परिस्थितिका कारणले एक जना छुट्ने र अर्का नछुट्ने अवस्था बनेको उनीहरूको भनाइ छ। यद्यपि विभेद भने नगरिएको उनीहरूले बताए।
साइबर ब्युरोका प्रवक्ता तथा एसपी दीपकराज अवस्थीले कसैलाई पनि विभेद नगरिने बताए। उनले विभेद भएको हो/होइन भन्नेबारे नियन्त्रणमा रहेका व्यक्ति स्वयंलाई भेटेर पुष्टि गर्न सकिने पनि बताए।
‘विभेद भएको भन्नेबारेमा अरनिको पाँडेजीलाई भेटेर यथार्थ बुझे हुन्छ। त्यतिकै विभेद भएको भन्न मिल्दैन,’ उनले भने।
उनका अनुसार पाँडेविरूद्ध साउन १२ गते साइबर ब्युरोमा निवेदन परेको थियो। एक महिलाले आफूलाई पाँडेले जिमेलमार्फत अपशब्द प्रयोग गरेको भन्दै निवेदन दिएकी थिइन्।
भदौ ५ गते ब्युरोमा जाहेरी आएको र त्यही दिन जिल्ला अदालत काठमाडौंबाट पक्राउ पुर्जीसमेत लिएको एसपी अवस्थीले बताए।
‘हामीले पक्राउ पुर्जी जारी भयो भनेर भन्दैनौं। त्यो भन्ने कुरा पनि होइन। खोजीकै क्रममा उहाँसम्म यो कुरा पाँडेसम्म पनि पुग्यो,’ उनले भने, ‘अहिले मुद्दा ३५ दिनभित्र बुझाउनुपर्छ। त्यसपछि भदौ ११ गते अपराह्न साढे ४-५ बजेतिर उहाँ ब्युरो आउनुभयो।’
पाँडे हाजिर भएपछि प्रहरी र सरकारी वकिलले त्यही दिन बयान लिएको पनि उनले बताए।
‘राति १० बजेसम्म बसेर बयान सकाएका थियौं। सबै बुझेर हामीले रातिसम्म बसेर बयान लिएका हौं,’ उनले भने, ‘बयानको काम सके पनि अनुसन्धान प्रतिवेदन नै बुझाउने भएकाले पुर्जी भएको मान्छेलाई बयान लिएपछि स्वास्थ्य जाँच गर्यौं।’
भदौ १२ गते मिसिलसहितको प्रतिवेदन सरकारी वकिलको कार्यालयमा बुझाएको उनले बताए। अभियोजन गरेर पनि नसकिएपछि बिहीबार म्याद थपका लागि अदालत लगिएको उनको भनाइ छ।
जिल्ला अदालत काठमाडौंबाट पनि अनुसन्धानका लागि चार दिनसम्म म्याद दिएको थियो।
तर एमाले नेता ऐन महरको घटनामा पीडित महिलाले हुलाकबाट जाहेरी दिएकी थिइन्। जाहेरी परेपछि भदौ ९ गते जिल्ला अदालत काठमाडौंबाट म्याद थप भएको थियो। यो मुद्दामा साइबर ब्युरोले पीडित महिलाको जाहेरी स्वीकार नगरेपछि हुलाकबाट पठाएकी थिइन्।
एसपी अवस्थीका अनुसार यस मुद्दामा महर र पीडित महिलासमेत पक्राउ परेका थिए।
‘महरको मुद्दामा दुवै जनाले एकले अर्कालाई जाहेरी दिएका थिए। त्यसमा उहाँहरूको केसमा त्यसरी नै बयान लिएर हामीले सरकारी वकिलको कार्यालयमा बुझाएका हौं,’ उनले भने, ‘यसमा दुवै जना त्यही दिन छुटेका हुन्।’
यही विषयमा हामीले सरकारी वकिलको कार्यालय काठमाडौंका प्रमुख तथा सहन्यायाधिवक्ता रामहरि शर्मा काफ्लेसँग पनि कुराकानी गर्यौं।
उनले ऐन महर र अरनिको पाँडेको मुद्दामा फरक अवस्था रहेको बताए।
‘परिस्थिति र विषयवस्तु हेरेर निर्णय हुने गर्छ। अरनिकोजीको मुद्दाको अभियोजन नै भइसक्यो। आज थुनछेक हुँदैछ,’ उनले भने, ‘अभियोग पेस भएको मान्छेलाई छोड्ने भन्ने हुँदैन। ऐन महरको मुद्दामा अनुसन्धान बाँकी छ। त्यसकारण छाडिएको हो। यी दुई मुद्दाको एउटा भिन्नता यो हो।’
महरको मुद्दामा लामो अनुसन्धान गर्न बाँकी नै रहेको उनले जानकारी दिए। भदौ ११ गते अनुसन्धानको सुरूवात मात्रै भएको पनि उनको भनाइ थियो।
महरको मुद्दामा महिला र पुरूष दुवै जनाले एकअर्काविरूद्ध दिएको र त्यही दिन दुबै जनालाई छाडिएको दोस्रो कारण उनले बताए।
‘महरले महिलाविरूद्ध र महिलाले महरविरूद्ध जाहेरी दिएका छन्। यो दुवै अनुसन्धानमा छन्। दुवैलाई हाजिर जमानीमा छाडेका छौं। यसमा दुवै जनालाई हामीले बराबर व्यवहार गरेका छौं,’ उनले भने।
पाँडेको मुद्दामा पनि हिरासतमा नराखी अभियोग पेस गर्ने तयारी भए पनि नभ्याइएकाले शुक्रबार मात्रै पेस गर्नुपरेको उनले बताए।
‘हिजै बुझाउने तयारी भएपनि नभ्याएपछि आज बिहानै हामीले दर्ता गरिसकेका छौं। थुनछेक आजै हुन्छ। हामीले उहाँलाई हिजै छाड्दा त्यसको औचित्य प्रष्ट पार्न सक्दैनौं। हिजो छाड्ने, आज मुद्दा दर्ता गर्दा अदालतमा मान्छे नहुँदा किन छाडियो भनेर फेरि अर्को प्रश्न उब्जिन्छ,’ उनले भने, ‘निरन्तर भइरहेको प्रक्रियाअनुसार कारबाही हुने भएकाले उहाँलाई नछाडिएको हो। महरको मुद्दामा भने अनुसन्धान सकेर नआइसकेको र दोहोरो विषयवस्तु समेत भएकाले छाडिएको हो।’
सरकारी वकिलले पाँडेविरूद्ध शुक्रबार बिहान काठमाडौं जिल्ला अदालतमा मुद्दा दर्ता गरिसकेको छ।
उनको मुद्दा ध्रुवराज कार्कीको इजलासमा सुनुवाइ हुनेछ। बयान पछि थुनछेक बहस हुनेछ भने न्यायाधीश कार्कीले धरौटी वा हाजिर जमानी वा थुनामा पठाउने आदेश दिनेछन्।
-1755241369.jpg)
-1746009348.jpg)
