रूसले युक्रेनको विद्युत गृहमा ड्रोन खसालेपछि झन्डै ६० हजार युक्रेनी परिवारहरू विद्युतविहीन भएका छन्।
आइतबार रूसले युक्रेनमा १४६ वटा ड्रोनले हमला गरेको थियो। तीमध्ये अधिकांश ड्रोनहरु युक्रेनी डिफेन्स सिस्टमले निस्तेज पारे पनि १० ठाउँमा भने क्षति पुर्याएको भनेर अन्तर्राष्ट्रिय समाचार संस्था रोयटर्सले लेखेको छ।
ती ड्रोनहरू युक्रेनको ओडेसामा रहेको चार ऊर्जा संरचनामा खसेका थिए। ड्रोनले विद्युतगृहमा क्षति पुर्याएपछि झन्डै ३० हजार उपभोक्ता बिजुलीविहीन भएका थिए।
ओडेसाको तटीय सहर चोर्नोमोर्स्कमा घर र व्यापारिक भवनहरूसमेत क्षति भएको भनेर गभर्नर ओलेह किपरले टेलिग्राममार्फत जानकारी दिएका छन्।
उनले महत्वपूर्ण संरचनाहरू जेनेरेटरमा चलेको बताएका छन्। यस आक्रमणमा एक जना घाइते भएका छन्।
आइतबार बिहान उत्तरी चेरनिहिभ क्षेत्रको अर्को विद्युतगृहमा पनि ड्रोन आक्रमण हुँदा ३० हजार घरधुरी विद्युत् विहीन भएको रोयटर्सले जनाएको छ।
रूसको रक्षा मन्त्रालयले भने युक्रेनी बन्दरगाह संरचनालाई नष्ट गरेको र ती संरचना सैन्य प्रयोजनका लागि प्रयोग भइरहेको दाबी गरेको छ।
युक्रेनका राष्ट्रपति भोलोदिमिर जेलेन्स्कीले रूसलाई कडा जबाफ दिने चेतावनी दिएका छन्।
उनले जबाफको रणनीति तयार भइसकेको पनि बताएका छन्।
'रूसविरूद्ध जस्तो आवश्यक हुन्छ, त्यसरी नै सक्रिय अभियान जारी रहनेछ। त्यसका लागि नयाँ गहिरा प्रहारहरूको योजना तयार छ' उनले भनेका छन्।
पछिल्ला हप्ताहरूमा दुवै पक्षले हवाई आक्रमण तीव्र पारेका छन्। रुसले युक्रेनका ऊर्जा र यातायात प्रणालीलाई निशाना बनाइरहेको छ भने युक्रेनले रूसी तेल प्रशोधन केन्द्र र पाइपलाइनमाथि आक्रमण गरिरहेको छ।
युद्ध अन्त्य गर्न अमेरिकी राष्ट्रपति डोनाल्ड ट्रम्पले अघि सारेको पहलमा यूरोपेली मुलुकहरूले अवरोध गरेको क्रेमलिनको आरोप छ। उसले किभ वार्ताका लागि तयार भएको ठोस संकेत नआएसम्म आक्रमण जारी राख्ने बताएको छ।
युक्रेनी सेनाले भने रूसले ग्रीष्मकालीन आक्रमणमा ठूलो सफलता पाएको दाबी अतिरञ्जित भएको भन्दै अहिलेसम्म कुनै प्रमुख शहरमाथि पूर्ण नियन्त्रण नजमाएको दाबी गरेको छ।
रूसले पछिल्ला साताभित्रै दुई पटक ठूलो आक्रमण गरी दर्जनौं सर्वसाधारणको ज्यान लिएको र शहरी संरचना नष्ट गरेको युक्रेनको आरोप छ।
'युद्ध चाहने एक मात्र देश रूस हो। त्यसैले दबाब जारी रहन्छ। यो युद्धले विश्व प्रक्रियामै अस्थिरता ल्याएको छ, त्यसको मूल्य उसले तिर्नुपर्नेछ,' जेलेन्स्कीले भनेका छन्।
उनले अमेरिका, यूरोप र जी–२० राष्ट्रको बलियो समर्थनको अपेक्षा गरेका छन्।
-1746009348.jpg)
