जिल्ला खेलकुद विकास समिति ओखलढुंगाका अध्यक्ष बालकुमार खनालसँग 'सम्बन्ध राख्न' भन्दै बालिकालाई फकाएको आरोप लागेकी कार्यालय सहयोगी धरौटीमा रिहा भएकी छन्।
कार्यालय सहयोगीको रूपमा काम गर्दै आएकी सिद्धिचरण नगरपालिका-१२ की प्रमिला विश्वकर्मालाई जिल्ला अदालतले १ लाख २५ हजार रूपैयाँ धरौटीमा रिहा गरेको हो।
उनले १३ वर्षीया बालिकालाई हाकिमसँग 'सम्बन्ध राख्न' फकाएको आरोपमा साउन २१ गते पक्राउ भएको थियो। २३ दिन हिरासतमा राखिएपछि भदौ १३ गते अध्यक्ष खनाल र प्रमिलाविरूद्ध मुद्दा दर्ता भएको थियो।
उनीहरूविरूद्ध बाल यौन दुर्व्यवहारमा मुद्दा दर्ता गरिएको जिल्ला प्रहरी कार्यालय ओखलढुंगाका डिएसपी मदन केसीले जानकारी दिए।
'प्रमिलाले हाकिमले भनेअनुसार नै बालिकालाई यौन सम्बन्ध राख्न फकाएको बताएकी छन्। प्रमिलालाई जागिर दिएपछि उनलाई बालिका फकाउन लगाएका बयान दिएकी छन्,' उनले भने।
प्रमिलाले प्रहरीलाई दिएको बयानमा भनेकी छन्- तिमीलाई जागिर दिए तिमीले अब मलाई एउटा सहयोग गर्नुपर्छ भनेपछि मैले के होला सरभन्दा हाकिमले तिमीसँग बोल्ने केटीसँग मसँग घुम्न तथा सुत्न राजी बनाई देउ, म निज केटीलाई अलिअलि खर्च दिन्छु भनेपछि मैले बालिकासँग कुरा गरेकी हुँ।'
उनले बालिकालाई फकाउने काम हाकिमकै आदेशअनुसार गरेको बताएकी छन्। यस घटनामा मुख्य आरोपी अध्यक्ष खानाल भने फरार छन्।
हाकिमले भनेअनुसार प्रमिलाले बालिकालाई फकाएको बताएकी छन्। तर पनि अध्यक्ष खनाल पक्राउ नपरेसम्म यकिन हुन नसक्ने डिएसपी केसीको भनाइ छ।
बालिकाले हाकिमसँग यौन सम्बन्ध राख्नका लागि भन्दै आफूलाई फकाएको भन्दै साउन २१ गते खेलकुद समितिका अध्यक्ष खनाल र कार्यालय सहयोगी प्रमिलाविरूद्ध प्रहरीमा जाहेरी दिएकी थिइन्।
घटना साउन दोस्रो सातातिरको हो।
बालिका कक्षा ८ मा पढ्छिन्। उनका आमाबुबा रोजगारीका निम्ति भारतमा छन्।
जाहेरी अनुसार प्रमिलाले एक दिन बालिकालाई उनकी बहिनीमार्फत बोलाउन पठाएकी थिइन्।
'तिम्रो दिदीलाई बोलाऊ, कम्प्युटर सिकाइदिन्छु, जागिर लगाइदिन्छु भनेर बहिनीलाई भनेर पठाउनु भएछ,' बालिकाले भनिन्, 'बहिनीलाई किन यस्तो भनेर पठाउनुभएको होला भन्ने लागिरहेको थियो।'
त्यसपछि साउन ११ गते साँझ ५ बजेतिर बालिकाको प्रमिलासँग भेट भयो।
'त्यति बेला ठूलो मान्छेसँग संगत गर, खेलमा पनि लगाइदिनु हुन्छ भन्नुभएको थियो। खास वास्ता गरिनँ,' बालिकाले भनिन्।
१५ गते उनी भलिबल खेलिरहेकी थिइन्। प्रमिला पनि उनीहरूसँगै खेलिन्।
'पछि माथि भर्याङ उक्लिँदै गर्दा तिमीले ठूलो मान्छेसँग संगत गरेको भए हुन्थ्यो, कोही चोखो हुँदैन भनिरहनुभएको थियो,' उनले भनिन्, 'त्यसमा पनि मैले केही जबाफ फर्काइनँ।'
बालिकाका अनुसार प्रमिलाले विभिन्न प्रलोभन देखाइरहिन्।
'तिमी सरसँग जाने कि नजाने भनेर १७ गतेसम्म भन्नु भन्नुभयो,' उनले भनिन्, 'पटक पटक त्यस्तो भनेपछि सरलाई भनिदिने सोचेर मोबाइलमा कुरा रेकर्ड गरेँ।'
प्रमिलाले उनलाई फकाउँदै गरेको भनिएको अडिओमा पनि यसबारे सुनिन्छ।
रेकर्डमा प्रमिलाले भनेकी छन्, 'सरले तिमीलाई मन पराउनुहुन्छ। तिमीसँग बस्न चाहनुहुन्छ। खर्च पनि दिन्छु भन्नुभएको छ। सर विवाहित केटीसँग सम्बन्ध राख्न चाहनुहुन्न। मेरो मोबाइलमा तिम्रो फोटो देखेर मन पराउनुभएको हो।'
त्यसपछि बालिकाले कस्तो सम्बन्ध भनेर सोधेकी छन्।
प्रमिला भन्छिन्— ठूला मान्छेहरूसँग संगत गर्नुपर्छ, भोलि बच्चा बसिहाल्यो भन्यो पनि औषधि हुन्छ। अहिले सम्बन्ध नराख्ने कोही हुँदैन, कोही चोखो हुँदैन। तिमीले सम्बन्ध राखे पनि हामीलाई मात्र थाहा हुन्छ। तिमीलाई मनले खाएको मान्छे भनेर भनिदिएको हो। अरू कुनै ठाउँमा लिएर जाने हो। तिमीलाई सजिलो हुन्छ। फोन बिग्रिएको रहेछ। सरले बनाइदिनु हुन्छ। बनेन भने नयाँ किनिदिनुहुन्छ।'
बालिकाले कहाँ जाने भनेर सोध्दा प्रमिलाले हुलाक डाँडा भन्छिन्। उनले 'सर' को नामसमेत सोधेपछि प्रमिलाले नाम पनि भन्छिन्। बालिकालाई प्रमिलालाई आधा घन्टासम्म फकाएकी थिइन्।
यो पनि :
आफ्ना हाकिमसँग 'सम्बन्ध राख्न' भन्दै बालिकालाई फकाउने कार्यालय सहयोगी पक्राउ
बालिकालाई 'फकाउन' कार्यालय सहयोगी परिचालन गर्ने हाकिमविरूद्ध पक्राउ पुर्जी जारी
-1756794700.JPG)
-1746009348.jpg)
