रूसी कच्चा तेल किनेको भनेर भारतलाई अमेरिकी राष्ट्रपति डोनाल्ड ट्रम्पले उच्च भन्सार महसुल लगाएपछि भारतीय अर्बपति मुकेश अम्बानीको परिवारले न्युयोर्कमा गर्ने भनेको सांस्कृतिक कार्यक्रम स्थगित भएको छ।
रूसी तेल किनेकोमा सबैभन्दा धेरै फाइदा भारतीय प्रधानमन्त्री नरेन्द्र मोदीसँग निकट मानिने मुकेश अम्बानीलाई भएको छ।
ट्रम्प सरकारका अधिकारीले पनि अम्बानीको नाम नलिए पनि भारतीय सरकार निकटका तेल व्यापारीले रूसी तेल किनेर अर्बौं डलर किनेको आरोप लगाउँदै आएका छन्।
यस्तो माहौलमा मुकेश अम्बानीकी पत्नी निता अम्बानीले सेप्टेम्बर १२ देखि १४ सम्म लिङ्कन सेन्टरमा आयोजना गर्ने तय भएको 'इन्डिया विकेन्ड' कार्यक्रम स्थगित भएको छ।
निता मुकेश अम्बानी सांस्कृतिक केन्द्रले (एनएमएसिसी) आफ्नो वेबसाइटमा एक विज्ञप्ति जारी गरेर 'अप्रत्याशित परिस्थिति' को कारण देखाउँदै सो कार्यक्रम स्थगित भएको जानकारी दिएको छ।
'हामीलाई यो जानकारी गराउनु पर्दा गहिरो दुःख लागेको छ कि सेप्टेम्बर १२ मा सुरू हुने तय भएको न्युयोर्कको एनएमएसिसी इन्डिया विकेन्ड अप्रत्याशित परिस्थितिका कारण स्थगित गरिएको छ। यो रद्द गरिएको होइन, केवल स्थगित गरिएको हो, र हामी एनएमएसिसीलाई पछि कुनै समय न्युयोर्कमा ल्याउन पूर्ण रूपमा प्रतिबद्ध छौँ,' निता आफैले नेतृत्व गर्ने केन्द्रको विज्ञप्तिमा भनिएको छ।
सो कार्यक्रमको मुख्य आकर्षणहरूमध्ये मिशेलिन स्टार सेफ विकास खन्ना र डिजाइनर मनिष मल्होत्राको शो पनि थिए।
भारत र प्रधानमन्त्री मोदीमाथि ट्रम्पको बढ्दो आक्रमणको यो कार्यक्रम पछिल्लो शिकार बनेको भनेर ब्लुमबर्गले लेखेको छ।
ट्रम्प र उनका सहयोगीहरूले युक्रेनमा युद्ध समाप्त गर्ने उनीहरूको प्रयासलाई कमजोर बनाएको आरोप लगाउँदै सस्तो रूसी तेल खरिद गरेकोमा भारतको आलोचना गरिरहेका छन्।
ट्रम्पले जुलाईको अन्त्यमा भारतबाट आयात हुने सबै सामानमा २५ प्रतिशत भन्सार लगाउने घोषणा गरेका थिए। त्यसपछि भारतले अझै रूसी कच्चा तेल किनिरहेको भनेर अगस्ट २७ देखि लागू हुने गरी भारतबाट आयात हुने सबै सामानमा थप २५ प्रतिशत भन्सार शुल्क लगाए।
सन् २०२२ फेब्रुअरीमा रूसले युक्रेनमाथि आक्रमण गरेपछि अमेरिका लगायत पश्चिमा देशले रूसी तेलमा प्रतिबन्ध लगाएका छन्। तर भारतले भने सस्तोमा रूसी तेल किनिरहेको छ। त्योभन्दा अघि नगण्य मात्रामा रूसी तेल किन्ने भारत त्यसपछिका दिनमा भने रूसको मुख्य ग्राहक बनेको छ।
यसरी सस्तोमा रूसी तेल किनेको सबभन्दा धेरै फाइदा भने अम्बानीको रिलायन्स इण्डस्ट्रिज र अर्को एक निजी कम्पनीलाई भएको भनेर भारतीय पत्रिका द बिजनेस स्टयान्डर्डले लेखेको छ।
रूसी लगानी रहेको नायरा एनर्जीमा रूसको सरकारी तेल कम्पनी रसनेफ्टको झण्डै ५० प्रतिशत सेयर छ।
अमेरिकी अर्थमन्त्री स्कट बेसेन्टले हालै भारतीय सरकार निकटका तेल व्यापारीले रूसी तेल किनेर १६ अर्ब डलरको मुनाफा कमाएको दाबी गरेका थिए।
त्यस्तै, ट्रम्पका व्यापार विज्ञ पिटर नाभारोले पनि भर्खरै फाइनान्सियल टाइम्समा भारतले रूसी तेल किनेकोबारे एक लेख लेखेका थिए। सो लेखमा भारतीय सरकार निकटका तेल व्यापारीले रूसी तेल किनेर फाइदा कमाएको बेसेन्टको आरोप पनि नाभारोले दोहोर्याएका थिए। उनीहरूले कसैको नाम नलिए पनि उनीहरूको टिप्पणी अम्बानी लक्षित भएको देखिन्छ।
यस्तो तनावपूर्ण स्थितिमा अम्बानी परिवारले सो कार्यक्रम स्थगित गरेको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1756794700.JPG)
-1746009348.jpg)
