अख्तियार दुरूपयोग अनुसन्धान आयोगका नक्कली कर्मचारी बनेर आर्थिक लाभ लिएको आरोपमा दुई जना पक्राउ परेका छन्।
अख्तियारको कारबाहीबाट बच्न एक करोड रुपैयाँ लाग्ने भनेर रकम असुली गरेको आरोपमा दुई जनालाई पक्राउ गरेको काठमाडौं उपत्यका अपराध अनुसन्धान कार्यालयका एसपी अंगुर जिसीले जानकारी दिए।
डोटीका २७ वर्षीय लक्ष्मण पनेरू र झापाका ५४ वर्षीय विनोद साह प्रहरीको हिरासतमा छन्।
प्रहरीका अनुसार साह मुख्य योजनाकार र पनेरू धम्क्याउने व्यक्ति हुन्। पनेरू विप्लव नेतृत्वको माओवादीका जिल्ला अध्यक्ष समेत भइसकेका व्यक्ति रहेको प्रहरीले बताएको छ।
साहको योजनामा पनेरूले टोखाका एक व्यक्तिलाई आफू अख्तियारको कर्मचारी हुँ भनेर चिनाएका थिए।
पनेरूले ती व्यक्तिलाई ‘तपाईंको परिवारको नेपाली नागरिकता नक्कली रहेको सूचना प्राप्त भई हामीले अनुसन्धान गरिरहेका छौं र उक्त कारबाहीबाट बच्ने हो एक करोड रुपैयाँ दिएमा फाइल बन्द गरिदिन्छौं। नत्र तिमीहरू सबैलाई जेल हाल्छौं’ भनेर धम्क्याएका थिए।
यसरी पटकपटक फोनबाट आएपछि पीडित आफै अख्तियारमा हाजिर हुन गएका थिए।
‘पीडितलाई अख्तियारबाट फोन आएको भनेपछि टंगालमा हाजिर हुन गएछन्। त्यहाँ गएपछि मात्रै नक्कली कर्मचारीले धम्क्याएको भन्ने खुल्यो,’ एसपी जिसीले भने।
अख्तियारले पीडितलाई अपराध अनुसन्धान कार्यालयमा जान सुझाव दियो। त्यसपछि कुराकानी गरी पनेरूलाई कलंकी बोलाइयो।
कलंकी आउँदा उनी एउटा कारमा आएका थिए। उनले अख्तियारकै कर्मचारीको भेषमा थिए।
दुई लाख रुपैयाँ नगद पीडितबाट लिइसकेपछि अपराध अनुसन्धानको टोलीले उनलाई पक्राउ गरेको हो।
पनेरू पक्राउ परेपछि मात्रै यसको मुख्य योजनाकार साह रहेको खुलेको हो।
अनुसन्धानको क्रममा पीडित व्यक्ति र साह दुई जनाबीच राम्रै चिनजान समेत भएको खुल्यो।
‘दुई जनाबीच पहिल्यै चिनजान समेत रहेको देखियो। दुबै जना व्यापारी नै हुन्। तर किन धम्क्याउन लगाएर रकम असुल गरेको भन्ने अनुसन्धान भइरहेको छ,’ उनले भने।
यस घटनामा थप अनुसन्धान गर्न दुबै जनालाई जिल्ला प्रहरी परिसर काठमाडौंमा पठाइएको छ।
-1746009348.jpg)
