विदेशी जासुसले किम जोङ उनको डिएनए लगायत नमूना फेला नपारून् भनेर रूसी राष्ट्रपति भ्लादिमिर पुटिनसँग बेइजिङमा भेट गरेपछि किमले छोएका वस्तुहरूलाई उत्तर कोरियाली कर्मचारीहरूले सावधानीपूर्वक पुछेर सफा गरेका छन्।
फासीवाद विरूद्धको विश्वयुद्ध र जापानी आक्रमण विरूद्ध चिनियाँ जनताको 'प्रतिरोधी युद्ध' मा विजयको ८० औं वार्षिकोत्सवको अवसर पारेर चीनले बुधबार आयोजना गरेको विशाल सैन्य परेडमा सहभागी हुन किम चीन पुगेका थिए। चीनमा रहँदा उनले पुटिनसँग पनि भेट गरेका थिए।
बुधबारको सो भेटको फुटेजमा किमको डिएनए लगायत स्वास्थ्य सम्बन्धी कुनै पनि सुराक लुकाउनका लागि उत्तर कोरियाले अपनाएका असाधारण उपायहरू देखिएको भनेर समाचार संस्था रोएटर्सले लेखेको छ।
रूसका पत्रकार अलेक्जेन्डर युनाशेभले सामाजिक सञ्जाल टेलिग्राममा साझा गरेको एउटा भिडिओको हवाला दिँदै रोएटर्सले यस्तो लेखेको हो।
सो भिडिओमा किम र पुटिनबीच दुई घण्टाभन्दा बढी भेट भएको कोठालाई दुई उत्तर कोरियाली कर्मचारीले सावधानीपूर्वक सफा गरिरहेको देखिन्छ।
कुर्सीको पछाडिको भाग र हात राख्ने भागहरू सफा गरिएको थियो र किमको कुर्सीनजिकै रहेको कफी टेबल पनि पुछिएको थियो। किमले पानी पिएको गिलास पनि हटाइएको थियो।
'वार्ता सकिएपछि, उत्तर कोरियाका प्रमुखका साथमा आएका कर्मचारीहरूले किमको उपस्थितिका सबै निशानहरू सावधानीपूर्वक नष्ट गरे,' ती पत्रकारले भनेका छन्।
कोठामा कुराकानीपछि किम र पुटिन चिया बैठकका लागि निस्किएका थिए। त्यसपछि सो ठाउँ सफा गरिएको थियो।
अघिल्ला विदेश यात्राहरूमा जस्तै किमले आफ्नो स्वास्थ्यको सुराक लुकाउनका लागि उनको हरियो रङको विशेष ‘बुलेटप्रुफ’ रेलमा आफ्नै शौचालय लिएर गएको भनेर दक्षिण कोरियाली र जापानी गुप्तचर निकायहरूलाई उद्धृत गर्दै जापानी मिडियाले लेखेको छ।
किमले विशेष शौचालय र आवश्यक फोहोर राख्ने झोला पनि साथै लिएर विदेश जाने गर्छन्। ताकि चुरोटका ठुटा लगायत उनले प्रयोग गरेका अरू सामानबाट शत्रूका गुप्तचर निकाय मात्रै नभएर उनी गएका देशकै गुप्तचरले पनि उनको नमूना प्राप्त गर्न नसकून्। कपाल र छालाको टुक्राहरूबाट पनि किमको स्वास्थ्य अवस्थाबारे जानकारी मिल्न सक्छ। किमका बुबा किम जोङ इलकै पालादेखि त्यस्तो उपायहरू अवलम्बन गरिन्छ।
सन् २०१९ मा अमेरिकी राष्ट्रपति डोनाल्ड ट्रम्पसँग हनोईमा भएको शिखर सम्मेलनपछि पनि किमका गार्डहरूलाई उनी बसेको होटलको तल्लामा अरूलाई जानबाट रोकेर घण्टौंसम्म कोठा सफा गरिरहेको देखिएको थियो। उनीहरूले ओछ्यानको गद्दा लगायतका सामानहरू पनि बाहिर निकालिरहेको देखिन्थ्यो।
किमले कुनै पनि वस्तु प्रयोग गर्नुअघि पनि उनको टोलीले त्यसलाई सावधानीपूर्वक सफा गरिरहेको विगतमा देखिएको छ।
सन् २०१८ मा तत्कालीन दक्षिण कोरियाली राष्ट्रपति मुन जे-इनसँगको भेटमा किमका सुरक्षा गार्डहरूले किम बस्न आउनुअघि एउटा कुर्सी र डेस्कमा सेनिटाइजर छर्केका थिए र त्यसलाई पुछेका थिए।
सन् २०२३ मा पुटिनसँग अर्को शिखर सम्मेलनमा बस्नुअघि उनको सुरक्षा टोलीले उनको कुर्सीलाई कीटनाशकले पुछेको र कुर्सी सुरक्षित छ भनी सुनिश्चित गर्नका लागि कडाइका साथ जाँच गरेको थियो। भिडिओ फुटेजमा एक गार्डले मेटल डिटेक्टर प्रयोग गरी सिट स्क्यान गरेको पनि देखिएको थियो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
