पोखराको पर्यटकीय क्षेत्र डेविज फल (पातले छाँगो) ४० वर्ष ठेक्कामा दिने निर्णयको विरोध गर्नेलाई खुकुरी प्रहार भएको छ।
ठेकेदार कम्पनी सेती क्यानोन प्रालिले शुक्रबार राखेको सार्वजनिक सुनुवाइ कार्यक्रममा ठेक्काको विरोध गर्ने समूहमाथि खुकुरी प्रहार गरेको आरोपमा प्रहरीले वंशसिँह खवासलाई पक्राउ गरेको छ।
कास्की प्रहरी प्रवक्ता डिएसपी हरिबहादुर बस्नेतका अनुसार खुकुरी प्रहारबाट स्थानीय विद्यार्थी निर्दोषविक्रम पौडेल घाइते भएका छन्।
खुकुरी प्रहारको आरोपमा पक्राउ परेका खवासका साथबाट खुकुरी पनि बरामद गरेको डिएसपी बस्नेतले बताए। उनी अहिले प्रहरी हिरासतमा छन्।
पोखरा महानगरपालिकाले डेविज फलमा सिसाको पुल राखेर पर्यटकीय आकर्षण बनाउने भन्दै ४० वर्षका लागि सेती क्यानोन प्रालिलाई २०७८ साउन १४ गते ठेक्का दिएको थियो।
महानगरले ठेक्का दिएकै वर्ष २०७४/७५ मा १० लाख ३० हजार पर्यटकले डेविज फलको अवलोकन गरेको र प्रवेश शुल्कबापत त्यहीबेला २ करोड २८ लाख आम्दानी भएको भन्दै स्थानीयले अहिले कौडीको भाउमा लामो समयका लागि ठेक्का दिएको भन्दै विरोध जनाएका हुन्।
स्थानीयवासी समेत रहेका पोखरा–१७ का नेपाली कांग्रेस वडा समिति सभापति देवराज आचार्यले डेभिज फलमा प्रवेश शुल्क दोब्बरभन्दा बढी बढाउने तर राजस्व अहिले भएको भन्दा कम आउने गरी सम्झौता गर्नु गलत भएको बताए।
२०३८ सालदेखि छोरेपाटन माविले उपभोग गर्दै आएको डेविज फल ५ वर्षका लागि चुनिएर आएको जनप्रतिनिधिले ४० वर्ष सम्मका लागि ठेक्का दिनु नै गलत भएको उनको जिकिर छ।
‘कौडीको भाउमा डेविज फल ठेक्का दिइँदैछ, यो ठेक्का लागु हुन हामी दिँदैनौं,’ उनले भने, ‘५ वर्षका लागि आएका जनप्रतिनिधिले हाम्रो सम्पदा ४० वर्षका लागि बेच्न पाउँदैन।’
सार्वजनिक सुनुवाइ कार्यक्रम स्थानीयले विरोध जनाएपछि स्थगित भएको छ।
कार्यक्रममा सहभागी हुन पुगेका पोखराका मेयर धनराज आचार्य स्थानीयको विरोध भएपछि सुरक्षा घेरा राखेर बाहिरिएका थिए।
सेती क्यानोन प्रालिका डेविज फलमा सिसाको पुल राखेर पर्यटकीय आकर्षण बनाउन ४४ करोड रुपैयाँ लगानी गर्ने सम्झौतामा उल्लेख छ।
कम्पनीका अध्यक्ष कर्केन गुरूङले समयमै काम गर्न नपाएकाले लागत बढेर ६५ करोड रुपैयाँ पुगिसकेको बताए।
ठेक्का सम्झौता लगायत प्रक्रिया पूरा भएकाले केही समयभित्रै निर्माण कार्य अघि बढाउने गुरूङको भनाइ छ।
‘डेविज फल परियोजनाको वातावरणीय अध्यन प्रतिवेदन पास गर्न सार्वजनिक सुनुवाइ आयोजना गर्दा केही व्यक्तिले अवरोध गरे,’ उनले भने, ‘हामी अब केही समयभित्रै डेभिज फलमा सिसाको पुल राख्ने काम अघि बढाउँछौं।’
-1746009348.jpg)
